កំពង់ធំ ៖ អគ្គិភ័យឆេះផ្ទះមួយខ្នងទៀតហើយ នៅស្រុកសណ្ដាន់ ខេត្តកំពង់ធំ ក្នុងនោះរថយន្ត អន្តរាគមន៍ពន្លត់អគ្គិភ័យ ប្រចាំអធិការស្រុកបារាយណ៍ ពុំបានចេញទៅជួយអន្តរាគមន៍ពន្លត់ភ្លើងឆេះផ្ទះទេ ដោយសមត្ថកិច្ចពន្លត់អគ្គិភ័យអះអាងថា ដោយសារតែទទួលព័ត៌មាន មានការយឺតយ៉ាវ ធ្វើឲ្យចេញទៅអន្តរាគមន៍មិនទាន់ បណ្តាលឲ្យអគ្គិភ័យលេបត្របាក់ផ្ទះមួយខ្នង បានទាំងស្រុង។
តាមការឲ្យដឹងពីសមត្ថកិច្ច នៃអធិការដ្ឋាននគរបាលស្រុកសណ្ដាន់បានបញ្ជាក់ថា ហេតុការណ៍ដែលមាន អគ្គិភ័យឆេះផ្ទះរបស់អ្នកភូមិនេះ គឺបានកើតឡើង នៅវេលាម៉ោង១០និង០០នាទីព្រឹក ទី១២ ខែកុម្ភៈ ឆ្នាំ២០១៩។ ម្ចាស់ផ្ទះត្រូវបានស្គាល់ ឈ្មោះ សៅ ព្រីង ភេទប្រុស អាយុ៦៣ឆ្នាំ ផ្ទះទំហំ៥មx៦មធ្វើអំពីឈើ ប្រក់ស្បូវ ជញ្ជាំងក្តារ ស្ថិតនៅភូមិឈូក ឃុំសណ្ដាន់ ស្រុកសណ្ដាន់។
ចំណែកលទ្ធផលសរុប នៃការខូចខាត ក្នុងគ្រាមានអគ្គិភ័យកើតឡើងនេះ មានផ្ទះឈើ០១ខ្នងឆេះទាំងស្រុងមានទំហំ៥មx៦ម ,ប្រាក់រៀលចំនួន៣លានរៀល, ស្រូវចំនួន២០បេ, រួមទាំងសម្ភារៈប្រើប្រាស់ក្នុងផ្ទះមួយចំនួនទៀត។ ចំពោះមូលហេតុដែល បានធ្វើឲ្យមានអគ្គិភ័យឆេះផ្ទះនេះ សមត្ថកិច្ចបានបញ្ជាក់ថា គឺបណ្តាលមកពីមានការធ្វេសប្រហែស ពុំមានពន្លត់ភ្លើងចង្ក្រាន ទើបធ្វើឲ្យឆេះរាលដាល ដល់លំនៅដ្ឋាន។
ក្នុងនោះ ក៏មានមតិសំណូមពរដល់កងកម្លាំងសមត្ថកិច្ច ដែលមានតួនាទីប្រចាំការ ចាំជួយអន្តរាគមន៍ដល់ ប្រជាពលរដ្ឋ ដែលមានទុក្ខលំបាក ឬគ្រាអាសន្នដែលបានកើតឡើងជាយថាហេតុ មានការត្រៀមលក្ខណៈ ដើម្បីជួយអន្តរាគមន៍ជួយដល់ប្រជាពលរដ្ឋ ដើម្បីឲ្យសមទៅនឹងការតបស្នងសងគុណដល់ម្ចាស់ឆ្នោត ក៏ដូចជាការអនុវត្តយុទ្ធសាស្ត្ររបស់ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឲ្យមន្ត្រីជាខ្ញុំបម្រើរាស្ត្រ ដឹងពីសុខទុក្ខរបស់រាស្ត្រ ចាំជួយអន្តរាគមន៍ ដោយគ្មានការធ្វេសប្រហែស៕
Source: Kampuchea Thmey Daily
0 Comments