សៀមរាប ៖ នៅក្នុងវេទិកាសាធារណៈថ្នាក់ជាតិ ក្នុងគោលបំណងស្វែងយល់អំពីទុក្ខកង្វល់ និងសំណូមពររបស់ប្រជាពលរដ្ឋ ដែលបានធ្វើឡើងនាព្រឹកថ្ងៃទី៣១ ខែសីហា ឆ្នាំ២០១៥ នៅភូមិស្ពានក្អែក ឃុំកណ្តែក ស្រុកប្រាសាទបាគង ខេត្តសៀមរាប បានរំលេចចេញនូវសេចក្តីក្លាហានក្នុងការបញ្ចេញមតិជាច្រើនបញ្ហា ដែលទាក់ទងទៅនឹងជីវភាពរស់ប្រចាំថ្ងៃរបស់ប្រជាពលរដ្ឋ ដែលក្នុងនោះរួមមានវត្តមានរបស់មន្ត្រីជំនាញគ្រប់ស្ថាប័នជុំវិញខេត្ត ក្នុងនាមជាវាគ្មិន រង់ចាំឆ្លើយតបសម្របសម្រួល និងបង្ហាញនូវដំណោះស្រាយផ្សេងៗផងដែរ។ លោកជំទាវ អ៊ឹម ស៊ីថែ រដ្ឋលេខាធិការក្រសួងកិច្ចការនារី និងជាប្រធានក្រុមការងារថ្នាក់ជាតិ ចុះជួយស្រុកប្រាសាទបាគង មានវត្តមានក្នុងឱកាសនោះ ជាមួយនឹងលោក ភូ សំអាត អភិបាលស្រុកប្រាសាទគង ដែលជាអ្នកសម្របសម្រួលដ៏សំខាន់ សម្រាប់កិច្ចដំណើរការរបស់អង្គវេទិកានោះ។
លោក ភូ សំអាត បានបញ្ជាក់ថា វេទិកាសាធារណៈដែលបានដំណើរការនេះ មានអាជ្ញាធរដែនដី និងប្រជាពលរដ្ឋចំនួន២ឃុំ បានចូលរួម គឺឃុំកណ្តែក និងឃុំបាគង ហើយនេះគឺជាលើកទី២ហើយដែរ ដែលវេទិកាសាធារណៈថ្នាក់ជាតិ បានធ្វើឡើងជាថ្មីម្តងទៀតសម្រាប់ឃុំទាំងពីរ បន្ទាប់ពីវេទិកាសាធារណៈថ្នាក់ជាតិលើកទី១ បានប្រព្រឹត្តទៅកាលពីជាង១ឆ្នាំមុន។
មានទុក្ខកង្វល់និងសំណូមពរមួយចំនួនដែលប្រជាពលរដ្ឋបានលើកឡើងនៅក្នុងវេទិកានោះ មានទាំងបញ្ហាថ្មីៗដែលទើបនឹងកើតឡើង និងបញ្ហាចាស់មួយចំនួនដែលនៅសេសសល់មិនទាន់ដោះស្រាយពីលើកមុន ដូចជាបញ្ហាធ្វើអត្តសញ្ញាណប័ណ្ណខុសទិន្នន័យនិងយឺតយ៉ាវ បញ្ហាសំណូមពរពន្លឿនការតបណ្តាញអគ្គិសនី សំណូមពរឲ្យមានសាលាមត្តេយ្យនៅក្នុងភូមិ ការអនុវត្តគោលនយោបាយភូមិឃុំមានសុវត្ថិភាព ជាដើម។ល។ ជាមួយនឹងបញ្ហាជាច្រើនទាំងនោះ ករណីដែលមានកម្ដៅខ្លាំងជាងគេនៅក្នុងវេទិកាសាធារណៈនោះ គឺប្រជាពលរដ្ឋកើតទុក្ខមិនសុខចិត្ត ចំពោះការចោទប្រកាន់ជាផ្លូវការ របស់ខណ្ឌរដ្ឋបាលជលផលសៀមរាប លេខ ២២៦ ចរជ សរ ចុះថ្ងៃទី២០ ខែសីហា ឆ្នាំ២០១៥ ចុះហត្ថលេខាដោយលោក ព្រិន សាវិន នាយខណ្ឌរដ្ឋបាលជលផល ផ្ញើជូនអភិបាលខេត្តសៀមរាប និងបានចម្លងជូនទៅអធិការដ្ឋានរដ្ឋបាលជលផលខាងជើងបឹងទន្លេសាប ( ដើម្បីជ្រាប ) និងចម្លងជូនទៅសាលាស្រុកប្រាសាទបាគង ដើម្បីជួយមានវិធានការ។
លិខិតនោះ បានចែងនៅក្នុងកម្មវត្ថុថា របាយការណ៍ ចុះទប់ស្កាត់និងស្រាវជ្រាវសាវតារជនសង្ស័យប្រព្រឹត្តិបទល្មើសជលផល អំពីបទកាប់គាស់ រានព្រៃលិចទឹក ក្នុងដែននេសាទ(តំបន់៣) ភូមិសាស្ត្ររដ្ឋបាលឃុំកណ្តែក ស្រុកប្រាសាទបាគង និងសង្កាត់ជ្រាវ ក្រុងសៀមរាប។ សេចក្តីនៅក្នុងលិខិតនោះបានបញ្ជាក់ថា ក្នុងពេលបំពេញបេសកកម្មដល់កន្លែងកើតហេតុនាសប្តាហ៍ដើមខែសីហា ឆ្នាំ២០១៥ ជនសង្ស័យបានរត់គេចខ្លួនអស់ ដោយបន្សល់ទុកស្លាកស្នាម ជាវត្ថុតាង មានដីព្រៃលិចទឹកបានកាប់រាន ដុត បោះតម្រុយហ៊ុមព័ទ្ធចំនួន៦៥ហិតា ស្ថិតនៅចំណុចចេកខៀវ ជ្រោយវល្លិប្រេង និង រោងតាប៉ាវ ។ របាយការណ៍នេះ មានកំណត់និយាមកាផងដែរ។
របាយការណ៍បានសរសេរបញ្ជាក់ទៀតថា ករណីនេះ ក្រុមការងារបានស្រាវជ្រាវអត្តសញ្ញាណជនសង្ស័យមានចំនួន៧២នាក់ ដែលជាប្រជាពលរដ្ឋមកពីឃុំកណ្តែក ក្នុងនោះមាន៦នាក់ ជាមេ ចលនា។ នៅខាងក្រោមឈ្មោះជនសង្ស័យទាំង៦នាក់ បានសរសេរបន្តថា តាមការប្រមូលព័ត៌មាននិងស្រាវជ្រាវសាវតាជនសង្ស័យនៅកន្លែងកើតហេតុ បានឲ្យដឹងថា ការកាប់គាស់ រានព្រៃលិចទឹកនៅតំបន់នោះ ដោយមានការយល់ព្រមពីប្រធានក្រុមប្រឹក្សាឃុំកណ្តែក និងក្រុមបក្សពួកជាជនសង្ស័យទាំង៦នាក់ខាងលើ បានបែងចែកផ្ទៃដី លក់ឲ្យប្រជាពលរដ្ឋដទៃទៀត។
ការកើតទុក្ខមិនសុខចិត្តចំពោះរបាយការណ៍ចោទប្រកាន់ខាងលើ ត្រូវបានលើកឡើងនៅក្នុងវេទិកាសាធារណៈនោះ ដោយឈ្មោះ ឱ អួន និងឈ្មោះ ខាំ លួត ដែលអ្នកទាំង២ មានឈ្មោះនៅក្នុងបញ្ជី ៦នាក់នោះ ដើម្បីសុំរកយុត្តិធម៌ ព្រោះខ្លួនពុំបានប្រព្រឹត្ត ដូចការចោទប្រកាន់នោះទេ។ លោក ភូ សំអាត អភិបាលស្រុកប្រាសាទបាគង បានសម្របសម្រួលថា អត់បញ្ហាទេ បើសិនជាមិនបានប្រព្រឹត្តិ តែបើសិនជាបានប្រព្រឹត្តដូចការចោទប្រកាន់មែននោះ គឺត្រូវមានទោស ព្រោះនៅក្នុងដែននេសាទតំបន់៣ ពុំបានការអនុញ្ញាតិឲ្យមានដីចំការនោះទេ ក្រៅពីទំហំដីស្រែប្រាំងមួយចំនួន ដែលរដ្ឋកាត់ឆ្វៀលជូនកសិករកន្លងមក។ លោកបានបញ្ជាក់ថា ការកាត់ឆ្វៀលដីស្រែប្រាំង អាចធ្វើទៅបានដោយសារមានសំណើពីម្ចាស់ស្រែទាំងនោះ ឯម្ចាស់ដីចំការ អត់មានអ្នកស្នើសុំទេ ដូច្នេះដីចំការបើមានអ្នកណាធ្វើ គឺខុសច្បាប់ អាជ្ញាធរបឹងទន្លេសាប បានកំណត់រួចហើយ។
លោក ហ៊ុល សាវួន នាយរងសង្កាត់ជលផលបាគង បានឡើងការពាររបាយការណ៍ចោទប្រកាន់ខាងលើ ដោយអះអាង ដីដែលច្បាប់ទទួលស្គាល់នៅក្នុងតំបន់ដែលមានបញ្ហានោះ គឺទំហំ ៨ ហិតា ក្រៅពីនោះគឺជាដីក្នុងបទល្មើសទាំងអស់ សារុប ៦៥ ហិតា ដែលប្រជាពលរដ្ឋជាជនសង្ស័យចំនួន ៧២នាក់ រំលោភបំពាន។
លោក ខាំ លឿ ប្រធានក្រុមប្រឹក្សាឃុំកណ្តែក ដែលមានឈ្មោះក្នុងបញ្ជីខ្មៅក្នុងចំណោម៦នាក់ ដែលខាងជលផលចោទប្រកាន់ ថាជាបក្សពួកបែងចែក និងលក់ដីនោះ បានបង្ហាញប្រតិកម្មថា លោកមិនបានបែងចែក លក់ដីទាំងនោះឲ្យទៅអ្នកណាម្នាក់នោះទេ ព្រោះដីទាំងនោះ គឺជាដីចំការដែលប្រជាពលរដ្ឋចំនួន២ភូមិ គឺភូមិគោកធ្លក និងភូមិត្រពាំងទឹម ចំនួន៧២គ្រួសារ បានអាស្រ័យផលទាំងពីរឆ្នាំ១៩៨០មកម្លេះ បើសិនជាលោកចង់លក់មែន ក៏ប្រជាពលរដ្ឋទាំង៧២គ្រួសារមិនយល់ព្រមនោះដែរ លោកមានប្រជាពលរដ្ឋជាសាក្សី។
ការចោទប្រកាន់ដែលមាននៅក្នុងរបាយការណ៍របស់ខណ្ឌរដ្ឋបាលជលផលសៀមរាប និងប្រតិកម្មរបស់លោកមេឃុំកណ្តែក( ខាំ លឿ ) គឺមិនអាចសម្របសម្រួលដោះស្រាយនៅក្នុងវេទិកានោះបានទេ។ លោក ភូសំអាត អភិបាលស្រុកប្រាសាទបាគង បាននិយាយថា លោក ខាំ លឿ មេឃុំកណ្តែក ហាក់ដូចជាស្ពាយកំហឹង២បាវ មកជះលើជលផល ហើយសូមឲ្យលោក ហ៊ុល សាវួន នាយរងសង្កាត់ជលផលបាគង គត់ត្រាយកសំដីទាំងនោះ ទៅជំរាបមេរបស់ខ្លួនឲ្យដឹងផង។
លោក សំមៀម ជំទប់ទី២ឃុំកណ្តែក បាននិយាយអះអាងថា លោកមេឃុំមិនដែលប្រព្រឹត្តិដូចការចោទប្រកាន់នោះទេ ។ បើនិយាយអំពីប្រវត្តិដីចំការនោះ អ្នកស្រុកបានអាស្រ័យផលតាំងពីសង្គមចាស់ ប៉ុន្តែសម្រាប់សង្គមថ្មីរបស់យើង គឺតាំងពីឆ្នាំ១៩៨០។
ដោយសារតែរឿងនេះ ជាបញ្ហាប្រឈមដ៏ក្តៅគគុកសម្តាប់លោកមេឃុំកណ្តែក(ខាំ លឿ )នោះ ក្រោយពីវេទិកាសាធារណៈនេះត្រូវបានបញ្ចប់ តាមរយៈនៃបទសម្ភាសន៍តូចមួយនៅសាលាឃុំកណ្តែក លោក ខាំ លឿ បាននិយាយថា វាជាអកុសលខ្លាំងណាស់សម្រាប់លោក។ បើតាមការចោទប្រកាន់កន្លងមក រួមទាំងការចោទប្រកាន់ពីសំណាក់គណបក្សប្រឆាំងផងដែរ ដីព្រៃលិចទឹករាប់រយហិកតា ដែលត្រូវបានលោកកាប់បំផ្លាញ ហើយដីស្រែប្រាំង ដីចំការ ប្រមាណជាមួយពាន់ហិចតាហើយ ដែលត្រូវបានលក់។
លោកបានបញ្ជាក់ទៀតថា ការពិតឬមិនពិតដែលអាចបញ្ជាក់ពីភាពត្រឹមត្រូវរបស់លោក គឺលោកពឹងអាស្រ័យទៅប្រជាពលរដ្ឋជាសាក្សី ។ លោកហ៊ានអះអាងយ៉ាងដូច្នេះ ព្រោះថាអ្វីៗទាំងអស់់ គឺលោកធ្វើ ដើម្បីបំរើផលប្រយោជន៍ជូនប្រជាជន តែប៉ុណ្ណោះ។
វិលមកបញ្ហាក៏ក្តៅគគុកវិញ លោក ខាំ លឿ បាននិយាយថា វាជាការពិត ដីចំការជិត៧០ហិតា របស់ប្រជាពលរដ្ឋ៧២គ្រួសារនៅក្នុងដែននេសាទតំបន់៣ ពុំបានធ្វើសំណូមពរ សុំកាត់ឆ្វៀល ដូចលោកអភិបាលស្រុកលើកឡើងប្រាកដមែន។ អាស្រ័យយ៉ាងដូច្នេះហើយ កាលពីថ្ងៃទី២៤ ខែមិនា ឆ្នាំ២០១៥ នៅក្នុងអង្គប្រជុំមួយ លោកអភិបាលស្រុកបានណែនាំឲ្យឃុំ ប្រមូលប្រជាពលរដ្ឋទាំង៧២គ្រួសារនោះ ធ្វើពាក្យស្នើសុំបង្កបង្កើនផលលើដីទាំងនោះ ដើម្បីកុំឲ្យខុសទៅនឹងច្បាប់ ។ ថ្ងៃទី១១ ខែឧសភា ឆ្នាំ២០១៥ បងប្អូនបានមកបំពេញពាក្យស្នើសុំនោះ ហើយឯកសារទាំងនោះ ត្រូវបានបញ្ជូនឡើងទៅស្រុក នៅថ្ងៃទី២៦ ខែមិថុនា ឆ្នាំ២០១៥ ស្រាប់តែថ្ងៃទី២០ ខែសីហា ឆ្នាំ២០១៥ ក៏មានរបាយការណ៍ចោទប្រកាន់ពីខណ្ឌរដ្ឋបាលជលផលសៀមរាប ថាប្រជាពលរដ្ឋទាំង ៧២គ្រួសារនោះ ជាជនសង្ស័យប្រព្រឹត្តិបទល្មើស ហើយរូបលោកក៏ជាប់ការចោទប្រកាន់ ថាជាអ្នកបែងចែក និងលក់ដីទាំងនោះផងដែរ៕
បើកវេទិកាសាធារណៈថ្នាក់ជាតិអំពីបទល្មើសជលផល ដែលពាក់ព័ន្ធអំពីបទកាប់គាស់ រានព្រៃលិចទឹក
0 Comments