ប្រជាពលរដ្ឋភូមិទំពាំងបង្កង់បានអះអាងថា ផ្ទៃដីទំហំ២ហិកតា និង៩៨អា ស្ថិតខាងលិចភូមិជាទីបច្ឆាសម្រាប់បញ្ចុះសព និងមានផ្នូរសពចំនួន២៦រួចមកហើយ គិតមុនឆ្នាំ១៩៧៩ក៏មាន និងរហូតដល់ឆ្នាំ១៩៨៩។ បន្ទាប់មក មានប្រជាជន៥គ្រួសារ បានរំលោភកាន់កាប់គាស់រានដីបច្ឆាក្លាយជាដីស្រែស្ទើរទាំងអស់ ធ្វើឲ្យបាត់បង់ផ្នូរ និងមួងមួយចំនួន ហើយប្រជាជនប្រឈមជួបការលំបាក នៅពេលមានមនុស្សស្លាប់ម្តងៗ មិនដឹងយកទៅបញ្ចុះនៅឯណា? កន្លងមក បើមានមនុស្សស្លាប់ គឺបញ្ចុះនៅក្នុងដីភូមិរៀងៗខ្លួនតែម្ដង។
ប្រជាពលរដ្ឋ បានសំណូមពរឲ្យខាងអាជ្ញាធរស្រុកជួយពន្លឿនការដោះស្រាយឲ្យបានឆាប់ និងសូមបញ្ឈប់រាល់សកម្មភាពបង្កបង្កើនផលលើដីទំនាស់នេះ ដោយរង់ចាំលទ្ធផលដោះស្រាយសិន។
លោក សុខ មករា អភិបាលរងស្រុកបានបញ្ជាក់ថា កន្លងមកខាងអាជ្ញាធរបានដោះស្រាយ ជាបន្តបន្ទាប់ ក្នុងនោះឃើញថា មានបងប្អូនចំនួន២គ្រួសារគាត់យល់ ហើយបានប្រគល់ដីចំនួន៣០អា ក្នុងចំណោមផ្ទៃដី២ហិកតា និង៩៨អា មកដាក់ជាសម្បត្តិរួមវិញ បើបងប្អូនយកសពមកបញ្ចុះត្រូវបញ្ចុះលើផ្ទៃដី៣០អានោះទៅរង់ចាំស្រុកដោះស្រាយសិន។
លោក យិន ពៅ ប្រធានការិយាល័យភូមិបាលស្រុកក៏បានបញ្ជាក់ដែរថា ប្រជាពលរដ្ឋដែលបានកាន់កាប់ដីនោះ ពិតជាមានឯកសារចុងសន្លឹកពិតប្រាកដមែន តែចុងសន្លឹកទាំងនោះមានកែលុប ដោយពួកគាត់មានការកាប់រានយកដីបន្ថែម។ រង់ចាំយើងឆែកឯកសារផ្ទៀងផ្ទាត់នោះ ទើបច្បាស់ជាង។
ចាស់ទុំក្នុងស្រុកក៏បានបញ្ជាក់ដែរថា ដីនោះពិតជាទីបច្ឆាបញ្ចុះសាកសពពិតប្រាកដមែន ពីមុនសុទ្ធតែព្រៃ ក្រោយមកមានការកាប់រានវាទយកដីនោះធ្វើជាកម្មសិទ្ធិមែន៕
ប្រជាពលរដ្ឋ សូមឲ្យអាជ្ញាធរស្រុកអូររាំងឪ ពន្លឿនការដោះស្រាយដីបច្ឆាទុកបញ្ចុះសពអ្នកភូមិ
0 Comments