សៀមរាប ៖ កូនត្រីរ៉សប្រមាណជា១០ម៉ឺនក្បាលដែលក្រុមឈ្មួញដឹកមកពីប្រទេសវៀតណាមឆ្ពោះមកលក់នៅតំបន់ចុងឃ្នៀសក្រុងសៀមរាបដើម្បីចិញ្ចឹមនោះត្រូវបានកម្លាំងអាវុធខេត្តសៀមរាបដេញស្ទាក់ចាប់បានរួចប្រគល់ឲ្យជំនាញរដ្ឋបាលជលផលចាត់ការបន្ត ខណៈជំនាញកំពុងសោយសុខ។
ហេតុការណ៍តាមប្រមាញ់នេះធ្វើឡើងនៅព្រឹកថ្ងៃទី០៥ ខែសីហា ឆ្នាំ២០១៥ស្ថិតនៅភូមិចុងឃ្នៀស សង្កាត់ ចុងឃ្នៀស ក្រុងសៀមរាប រួចបញ្ជូនមកកាន់បន្ទាយប៉េអិមខេត្ត ដើម្បីរៀបចំសំណុំរឿងចាត់ការបន្តទៅតាមផ្លូវច្បាប់។
មន្ត្រីអាវុធហត្ថខេត្តបានឲ្យដឹងថា ដោយមានការសង្ស័យទើបកម្លាំងប៉េអិមស្នាក់ការបេ៨ឈរជើងនៅតំបន់ចុងឃ្នៀសដេញចាប់បានរួចក៏ចាប់ទាំងជនសង្ស័យនិងវត្ថុតាងបញ្ជូនមកកាន់ទីបញ្ជាការដ្ឋានកងរាជអាវុធហត្ថខេត្តតែម្តង។ មន្ត្រីដដែលបន្តថា ប្រតិបត្តិការបង្ក្រាបនោះចាប់បាន ជនសង្ស័យចំនួន២នាក់ទី១ឈ្មោះរស់ គឹមស្រ៊ុន អាយុ៣២ឆ្នាំរស់នៅភូមិកំពង់ ឃុំព្រះបាតជាន់ជុំ ស្រុកគីរីវង់ ខេត្តតាកែវទី២ឈ្មោះអង់ ចំរើន អាយុ៣៥ឆ្នាំរស់នៅភូមិដងទង់ឃុំដំបូកខ្ពស់ ស្រុកអង្គរជ័យ ខេត្តកំពត និងរថយន្តម៉ាកហាឡែនដឺពណ៌ទឹកប្រាក់ ពាក់ស្លាកលេខ 2K-3338 ស៊េរី២០០៣។ មន្ត្រីដដែលបន្ថែមថា បច្ចុប្បន្ននេះជនសង្ស័យនិងវត្ថុតាងត្រូវបានប្រគល់ទៅឲ្យជំនាញរដ្ឋបាលជលផលចាត់ការទៅតាមផ្លូវច្បាប់ រីឯកូនត្រីរ៉សចំនួន១០ម៉ឺនក្បាលនោះត្រូវបាន
យកទៅប្រលែងនៅបឹងទន្លេសាប។
គួរកត់សម្គាល់ផងដែរថា ករណីចិញ្ចឹមត្រីរ៉ស និងត្រីឆ្តោ កំពុងកើតមានយ៉ាងផុសផុលក្នុងទឹកដីនៃខេត្តសៀមរាបទៀតហើយ ខណៈពេលដែលគេដាក់ការសង្ស័យយ៉ាងច្បាស់ថា មានសមត្ថកិច្ចជំនាញជាអ្នកបើកដៃទើបក្រុមឈ្មួញហ៊ានប្រព្រឹត្តបទល្មើសនៅក្នុងខេត្តសៀមរាបអស់រយៈពេលជាច្រើនឆ្នាំមកហើយ ដោយគ្មានសកម្មភាពថយចុះនោះទេ៕
ប៉េអិមចាប់កូនត្រីរ៉ស១០ម៉ឺនក្បាលដែលហោះឆ្លងដែនមកខេត្តសៀមរាបប្រគល់ឲ្យជលផល
0 Comments