ភ្នំពេញ ៖ តារាសម្ដែងប្រុសចូលចិត្តតុបតែងខ្លួនស្ទីលខុសប្លែកពីអ្នកសិល្បៈដទៃ លោក គន់ រៀមរតនៈ ហៅ សាន់ វិសាល ក្រោយពីលេចឈ្មោះល្បីតាមរយៈការសម្ដែងរឿង និងការលេចមុខក្នុងស្ប៉តផ្សាយពាណិជ្ជកម្ម ពិសេសតាមរយៈការសម្ដែងធ្វើខ្ទើយ(មនុស្សភេទទី៣)ប្រាប់ថា ចូលដល់រដូវនេះ សិល្បៈហាក់ដូចជាស្ងប់ស្ងាត់ទៅវិញបន្តិច ខណៈការងារផ្ទាល់ខ្លួនកំពុងមមាញឹកខ្លាំង។
ប្រាប់កម្ពុជាថ្មីតាមសារអេឡិចត្រូនិកនៅរសៀលថ្ងៃទី២៨ ខែកក្កដា ឆ្នាំ២០១៥នេះ លោក គន់ រៀមរតនៈ បាននិយាយថា ចាប់តាំងពីដើមខែរហូតមកដល់ចុងខែកក្កដានេះ ទីផ្សារសិល្បៈរបស់លោកហាក់មានការស្បើយខ្លះ ទាំងការសម្តែង និងចេញតាមកម្មវិធីផ្សេងៗ។ ប៉ុន្តែមិនស្ងប់ស្ងាត់ខ្លាំងពេកទេ គឺនៅមានមួយៗ ព្រោះវាជារដូវធ្លាក់ភ្លៀង(រដូវវស្សា) ដូចនេះ ទើបមិនសូវរវល់ខ្លាំងដូចរដូវប្រាំង។
តារាសម្ដែងលោក គន់ រៀមរតនៈ បាននិយាយបែបលេងសើចទៀតថា សម្រាស់ទីផ្សារសិល្បៈរបស់ខ្ញុំ ឥឡូវនេះ គឺមិនសូវមានភាពមមាញឹកពេកទេ…..! បើនិយាយឲ្យចំទៅ គឺតាំងពីដើមខែរហូតមកដល់ពេលនេះគ្មាន ដូចពុំសូវមានគេទាក់ទងមកសោះ ដាច់ម៉ូយអស់ហើយ ចូលដល់ខែភ្លៀង។
លោក គន់ រៀមរតនៈ បានបញ្ជាក់ថា មួយរយៈនេះ សុខភាពរបស់លោកក៏មិនសូវស្រួលដែរដូច្នេះចង់យកពេលវេលាទំនេរពីការងារសិល្បៈខ្លះ ដើម្បីសម្រាកថែរក្សាសុខភាពផងដែរ។ ខ្ញុំឈឺក្រពះណាស់បងអើយ ប៉ុន្មានថ្ងៃនេះ សប្ដាហ៍ក្រោយប្រហែលត្រូវទៅពេទ្យសុងក្រពះមើលហើយទើបបាន បើមិនអីចឹងទេ អាចខកខានទាំងការងារសិល្បៈ និងការងារខាងក្រៅផ្ទាល់ខ្លួន។
ក្រោយល្បីឈ្មោះគួរសមលើអាជីពសិល្បៈ លោក គន់ រៀមរតនៈ ហៅ សាន់ វិសាល មួយរយៈចុងក្រោយនេះត្រូវបានគេមើលឃើញថា ក៏ជាតារាប្រុសមួយដួងរបស់ខ្មែរដែលឧស្សាហ៍បង្ហោះរូបថតរាល់សកម្មភាពរបស់លោកនៅលើបណ្ដាញសង្គមទំនាក់ទំនងហ្វេសប៊ុក ដើម្បីទាមទារការគាំទ្រ និងប្រជាប្រិយភាពផងដែរ។ ក្នុងនោះភាគច្រើនជារូបដែលបង្ហាញពីការលេងស្ទីលថ្មីៗ និង ប្លែកខុសគេ មានទាំងការតុបតែងខ្លួនបែបសិចស៊ី និងការលេងស្ទីលលក្ខណៈមនុស្សភេទទី៣ជាដើម៕
គន់ រៀមរតនៈ ត្អូញត្អែរថា ចូលដល់រដូវភ្លៀងរកស៊ីលែងបាន
0 Comments