ភ្នំពេញ ៖ លោក កែវ ពិសិដ្ឋ តំណាងរាស្ត្រមណ្ឌលខេត្តកំពង់ចាម និងជានាយកខុទ្ទកាល័យសម្តេចប្រធានរដ្ឋសភា ក្នុងនាមប្រធានក្រុមការងារចុះជួយឃុំពពេល ស្រុកពញាក្រែក ខេត្តត្បូងឃ្មុំ អមដំណើរដោយសហការីមួយចំនួន ព្រឹកថ្ងៃទី២១ ខែសីហា ឆ្នាំ២០១៥នេះ បាននាំយកថវិកាចំនួន ១លាន ៥០ម៉ឺនរៀលទៅឧបត្ថម្ភលោក សាត ម៉ូត មេឃុំពពេល ស្រុកពញាក្រែក ខេត្តត្បូងឃ្មុំ ដែលកំពុងសម្រាកព្យាបាលជម្ងឺនៅមន្ទីរពេទ្យកាលម៉ែត្រ។
ក្នុងឱកាសសាកសួរសុខទុក្ខ និងនាំយកថវិកាឧបត្ថម្ភនេះដែរ លោក កែវ ពិសិដ្ឋ ក៏បានពាំនាំប្រសាសន៍ផ្តាំផ្ញើសាកសួរសុខទុក្ខពីលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារថ្នាក់ជាតិ ចុះជួយស្រុកពញាក្រែក ខេត្តត្បូងឃ្មុំ និងបានផ្តាំផ្ញើឱ្យលោកមេឃុំ ខិតខំថែទាំសុខភាពឱ្យបានល្អ។
លោក សាត ម៉ូត មេឃុំពពេល ក៏បានថ្លែងអំណរគុណយ៉ាងជ្រាលជ្រៅដល់លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារថ្នាក់ជាតិចុះជួយស្រុកពញាក្រែក ខេត្តត្បូងឃ្មុំ និងលោក កែវ ពិសិដ្ឋ ប្រធានក្រុមការងារចុះជួយឃុំពពេល ស្រុកពញាក្រែក ខេត្តត្បូងឃ្មុំ បាននាំយកថវិកាមកឧបត្ថម្ភដល់លោកដោយផ្ទាល់ដៃនៅក្នុងមន្ទីរពេទ្យ ដែលនេះជាកាយវិការមួយបង្ហាញឱ្យឃើញពីការយកចិត្តទុកដាក់ខ្ពស់ដល់ក្រុមការងារក្នុងឃុំ។ លោក មេឃុំក៏បានជូនពរចំពោះលោក វង សូត និងលោក កែវ ពិសិដ្ឋ ព្រមទាំងបុត្រា បុត្រី ចៅប្រុស ចៅស្រីជួបតែសេចក្ដីសុខគ្រប់ប្រការ និងទទួលបានជ័យជំនះគ្រប់ភារកិច្ច ជូនបក្ស រដ្ឋ និងប្រជាជនជារៀងរហូត៕
ថវិកា១លាន ៥០ម៉ឺនរៀល ត្រូវបានផ្តល់ជូនលោកមេឃុំពពេល ដែលកំពុងសម្រាកព្យាបាលនៅមន្ទីរពេទ្យកាលម៉ែត្រ
0 Comments