បាត់ដំបង ៖ នៅល្ងាចថ្ងៃទី២០ ខែសីហា ឆ្នាំ២០១៥ មានគ្រោះថ្នាក់ចរាចរណ៍ចំនួន២ករណី បានកើតឡើងនៅក្នុងស្រុកបាណន់ និងក្នុងស្រុកសំពៅលូន ព្រមទាំងបានបង្កឲ្យមានមនុស្សចំនួន៣នាក់ផងដែរដែលបានរងរបួសធ្ងន់ ដោយមាន១ករណី គឺបានបង្កដោយរថយន្តក្រុង ព្រោះកន្លងមកមានច្រើនករណីណាស់ពាក់ព័ន្ធនឹងរថយន្តក្រុង ព្រោះសូម្បីតែទីប្រជុំជនក៏ពួកគេគ្មានបន្ថយល្បឿនដែរ។ ករណីទី១-បានកើតឡើងកាលពីវេលាម៉ោង៣និង៣០នាទីល្ងាច ថ្ងៃទី២០ ខែសីហា ឆ្នាំ២០១៥ ត្រង់ចំណុចភូមិកំប៉ង់កើត ឃុំកន្ទី២ ស្រុកបាណន់ ខេត្តបាត់ដំបង ដោយដំបូងគឺមានម៉ូតូមួយគ្រឿងម៉ាកឌ្រីម ពណ៌ខ្មៅ ពាក់ស្លាកលេខបាត់ដំបង 1H-0256 ដែលបើកបរដោយនារីម្នាក់ឈ្មោះ សែន សាវ៉ាត់ អាយុ២៦ឆ្នាំ រស់នៅភូមិគាស់ក្រឡ ឃុំគាស់ក្រឡ ស្រុកគាស់ក្រឡ ក្នុងទិសដៅពីលិចហើយបត់ទៅខាងត្បូង។
សមត្ថកិច្ចមូលដ្ឋានបានបញ្ជាក់ថា នៅពេលដែលម៉ូតូកំពុងតែបើកលឿន ហើយបានបត់ទៅឆ្វេងនោះ ក៏បានជ្រុលចង្កូតហួសទៅខាងឆ្វេង ហើយបានបុកទៅលើម៉ូតូមួយគ្រឿងទៀតដែលកំពុងបើកបរក្នុងទិសដៅពីត្បូងទៅជើង ដែលម៉ូតូនោះម៉ាកឌ្រីម បិទតែមពណ៌ខ្មៅ ពាក់ស្លាកលេខបាត់ដំបង1H-9226 យ៉ាងពេញទំហឹង បណ្ដាលឲ្យភាគីខាងនារីរងគ្រោះរបួសយ៉ាងធ្ងន់ធ្ងរ ចំណែកម៉ូតូម្ខាងទៀត គឺបើកបរដោយឈ្មោះ ខន ស្រស់ ភេទប្រុស អាយុ១៦ឆ្នាំ រស់នៅភូមិឆាយរំពាត់ ឃុំកន្ទឺ២ គឺមិនបានដួលនោះឡើយ។
ភ្លាមៗនោះដែរ ប្រជាពលរដ្ឋដែករស់នៅទីនោះបាននាំគ្នាដឹកបញ្ជូននារីរងគ្រោះទៅកាន់មន្ទីរពេទ្យដើម្បីសង្គ្រោះ ព្រោះនាងមានឈាមហូរច្រើនផង ដែលទំនងជាបែកក្បាល ហើយបច្ចុប្បន្នសមត្ថកិច្ចបាននាំយកមធ្យោបាយធ្វើដំណើរទាំងពីរគ្រឿងមករក្សាទុកនៅអធិការដ្ឋានជាបណ្ដោះអាសន្ន រង់ចាំដោះស្រាយជាក្រោយ។
ដោយឡែកគ្រោះថ្នាក់ចរាចរណ៍មួយករណីទៀតបានកើតឡើងនៅវេលាម៉ោង៦និង៣០នាទីល្ងាច ថ្ងៃទី២០ ខែសីហា ដូចគ្នា នៅតាមបណ្ដោយផ្លូវជាតិលេខ57B ដែលស្ថិតនៅចំណុចបេងទ្រេត ក្នុងភូមិវាលវង់ ឃុំតាស្តា ស្រុកសំពៅលូន ដែលមានរថយន្តក្រុងមួយគ្រឿងរបស់ក្រុមហ៊ុនពន្លឺខ្មែរអង្គរ ពាក់ស្លាកលេខភ្នំពេញ 3A-5857 បានបើកបរក្នុងទិសដៅពីបាត់ដំបងទៅព្រំដែនថៃ។
សមត្ថកិច្ចនៅទីនោះបានឲ្យដឹងថា រថយន្តក្រុងនេះអាចបើកបរក្នុងល្បឿនលឿន ហើយម្យ៉ាងទៀត ដោយសារតែគោយន្តកន្ត្រៃដែលបើកបរស្របទិសនៅពីមុខគ្មានភ្លើង ឬចំណាំងផ្លាតផង ទើបត្រូវរថយន្តក្រុងនោះបុកពីក្រោយតែម្ដង ដែលបណ្ដាលឲ្យមនុស្សនៅលើគោយន្តចំនួនពីរនាក់រងរបួសធ្ងន់ និងត្រូវបញ្ជូនទៅកាន់មន្ទីរពេទ្យភ្លាមៗផងដែរដើម្បីសង្គ្រោះបន្ទាន់។ ក្រោយពេលកើតហេតុ សមត្ថកិច្ចបាននាំយករថយន្តនោះទៅរក្សាទុកនៅក្នុងអធិការដ្ឋាន៕
គ្រោះថ្នាក់ចរាចរណ៍២ករណីក្នុងថ្ងៃតែមួយ ដែល១ករណីបង្កដោយរថយន្តក្រុង
0 Comments