ខ្សែប្រយុទ្ធ Edin Dzeko របស់ក្លិប Man Cityបានបង្ហាញខ្លួនជាកីឡាករថ្មីរបស់ក្លិប AS Romaក្រោយពីបញ្ចប់ការផ្ទេរជាកីឡាករខ្ចីជើង១រដូវកាលរបស់លោកជាមួយនឹងជម្រើសមួយទៀតជាកីឡាករអចិន្ត្រៃយ៍របស់ក្លិបថ្មីរបស់លោក។
សូមបញ្ជាក់ថា កីឡាករស្ថិតនៅក្នុងក្រុមជម្រើសជាតិបូស្នីម្នាក់នេះ រកបាន៧២គ្រាប់ពី១៨៩ប្រកួតរបស់លោកជាមួយក្លិប Man Cityចាប់តាំងពីបានផ្ទេរចេញពីក្លិប Wolfsburg កាលពីឆ្នាំ២០១១ ប៉ុន្តែសមត្ថភាពលេងរបស់លោក បានធ្លាក់ចុះជាខ្លាំងអំឡុងរដូវកាល២០១៤-២០១៥ ជាពេលដែលលោកអាចរកបានតែ៦គ្រាប់ប៉ុណ្ណោះ។
យោងតាមសេចក្តីរាយការណ៍ដែលចុះផ្សាយដោយក្លិបទាំងពីរ បានឲ្យដឹងថា ការផ្ទេររបស់កីឡាករ Dzekoទៅកាន់ទឹកដី Eternal City អាចនឹងក្លាយកីឡាករអចិន្ត្រៃយ៍ ប្រសិនបើកីឡាករវ័យ២៩ឆ្នាំម្នាក់នេះ បានលេងដល់ចំណុចដែលគេចង់បានហើយនោះ នៅក្នុងរដូវកាលខាងមុខនេះ។
ដោយឡែក កីឡាករ Dzeko ខ្លួនលោកផ្ទាល់បាននិយាយប្រាប់វេបសាយរបស់ក្លិប Romaថា លោកមកកាន់ទីនេះ គឺដើម្បីឈ្នះជើងឯកជាមួយក្លិបថ្មីរបស់គាត់។
លោកបានបន្តទៀតថា លោកសង្ឃឹមជឿជាក់ណាស់ថា នឹងអាចឈ្នះជើងឯកបាល់តាត់កំពូលៗជាច្រើន ប៉ុន្តែដំបូងលោកត្រូវតែលុតដុំខ្លួនឯងជាដំបូងសិន។
ខណៈនោះដែរ ក្លិបអ៊ីតាលីមួយនេះ បានសេចក្តីថ្លែងការណ៍មួយថា ពួកគេបានចំណាយលុយ២.៨៦លានផោន សម្រាប់តម្លៃខ្ចីជើងនេះ ខណៈដែលការរកបានកិច្ចព្រមព្រៀងអចិន្ត្រៃយ៍ ស្មើនឹង៧.៨៧៥លានផោន៕
កីឡាករ Edin Dzeko បង្ហាញខ្លួនជាកីឡាករថ្មីរបស់ក្លិប AS Roma
0 Comments