U-16 កម្ពុជា ចាញ់ម្ចាស់ផ្ទះម៉ាឡេស៊ី ២ ទល់ ០ ក្នុងជំនួបមិត្តភាព

ក្រុមបាល់ទាត់​ជម្រើសជាតិ​កម្ពុជា​ក្រោម​អាយុ១៦ឆ្នាំ (U-16) បាន​ប្រកួត​ចាញ់​ក្រុម​ម្ចាស់ផ្ទះ​ម៉ាឡេស៊ី ដោយ​លទ្ធផល ២ ទល់ ០ ក្នុងជំនួប​មិត្តភាព​អន្តរជាតិ កាលពី​ល្ងាច​ថ្ងៃ​សៅ​រិ៍ ទី ២៩ ខែ សីហា ឆ្នាំ ២០១៥ ម្សិលមិញ​នៅ​ទីលាន Arena Stadium ក្នុង​ទីក្រុង​កូ​ឡា​ឡំ​ពួរ មុន​ចេញដំណើរ​ទៅ​ប្រកួត​ជម្រុះ​ពានរង្វាន់​ទ្វីបអាស៊ី AFC U-16 Championship 2016 នៅ​ប្រទេស​សិង្ហ​បុរី។

ក្រុម U-16កម្ពុជា ដែលមាន​សមាជិក ២៣ នាក់​និង​ថ្នាក់ដឹកនាំ ៧ នាក់​បានចេញ​ដំណើរ​ទៅកាន់​ប្រទេស​ម៉ាឡេស៊ី តាំងពីព្រឹក​ថ្ងៃ​ព្រហស្បតិ៍​ទី ២៧ ខែ សីហា ឆ្នាំ ២០១៥ ម្ល៉េះ។ លោក Yusuke Iki គ្រូបង្វឹក​ប្រចាំ​សាលា​បាល់ទាត់​ជាតិ ត្រូវបាន​សហព័ន្ធ​កីឡាបាល់ទាត់​កម្ពុជា តែងតាំង​ឱ្យធ្វើជា​គ្រូ​បង្គោល​សម្រាប់​ដឹកនាំ​ក្រុម​កម្ពុជា ចូលរួម​ក្នុង​ពានរង្វាន់ ហើយ​លោក គឹម ភក្ដី និង លោក ជឿន សុ​ភី ជា​គ្រូ​ជំនួយ ហើយ​លោក ប្រាក់ វណ្ណ​នី ជា​គ្រូ​អ្នកចាំទី និង លោក ស្រ៊ុន សីហា ជា​អ្នកបកប្រែ។

កីឡាករ​ចំនួន ២៣ នាក់​បានបង្ហាញ​ខ្លួន​ក្នុងការ​ប្រកួត​នេះ​មានដូចជា អាត អូន​តូច, ហេង ទីណា, គង់ រ៉ា​ផាត, ហុ​ល គឹម​ហ៊ុយ, ទេស សម្បត្តិ, យ៉េត ចិ​ត្រា, គង់ ច័ន្ទ​សិរសា, យឺ សា​ហ្វី, រ័ត្ន ប៊ុន​នូ, សឿត ណា​វ៉ា, ឈឿង វិស្ណុ, ទៀត គឹម​ហេង, សៀន សុភ​ត្រា, ឡា​ត វ​ណ្ណី, សេត ម៉ា​ស៊ូ​ត, ឡូ​ន ទេ​ន, សួន សុភ​ត្រា, ឡុង ម៉េង​ហាវ, ទុន សំ​ឈី, សឹង្ហ កក្កដា, ត្រៃ វិចិត្រ, សាន្ត គឹម​ហេង, សៀង ចាន់​ធា។

ប្រកួត​បន្ទាប់​ក្រុម​កម្ពុជា ត្រូវ​ទៅ​ចូលរួម​ក្នុង​វគ្គ​ជម្រុះ ពូ​ល H នៃ​ពានរង្វាន់ AFC U-16 Championship 2016 នេះ ដោយមាន​ក្រុម កូរ៉េខាងជើង, ថៃ, កម្ពុជា និង ម្ចាស់ផ្ទះ​សិង្ហ​បុរី ដោយ​ចាប់​ប្រកួត​ពីថ្ងៃ​ទី២ ដល់ ទី ៦ ខែ កញ្ញា ឆ្នាំ ២០១។ ក្រុម​ខ្លាំង​ក្នុង​ពូ​ល​ចំនួន ២ មានឱកាស​ឡើងទៅ​លេង​ជុំ​បន្ទាប់។

កម្មវិធី​ប្រកួត​ជម្រុះ​ក្នុង​ពានរង្វាន់​ប្រចាំ​ទ្វីប​នេះ​ក្រុម U-16កម្ពុជា ត្រូវ​ប្រកួត​ជាមួយ​ក្រុម​កូរ៉េខាងជើង នៅ​ថ្ងៃ​បើកឆាក ពោលគឺ​នៅ​ថ្ងៃទី ២ ខែ កញ្ញា ឆ្នាំ ២០១៥ នៅ​កីឡដ្ឋាន Jalan Besar Stadium ក្នុង​តំបន់ Kallang ប្រកួត​ទី២ ក្រុម U-16 កម្ពុជា ត្រូវ​ជួប​ក្រុម U-16 របស់​ថៃ នៅ​ថ្ងៃទី ៤ កញ្ញា នៅ​កីឡដ្ឋាន​ដដែល និង​ប្រកួត​ចុងក្រោយ U-16កម្ពុជា ជួប​ក្រុម U-16សិង្ហ​បុរី នៅ​ថ្ងៃទី ៦ ខែ កញ្ញា ខណៈ​ថ្ងៃទី ៧ ខែ កញ្ញា ក្រុម​ទាំងមូល​នឹង​ត្រឡប់មក​ប្រទេស​កំណើត​វិញ។

ចំណែក​ក្រុម U-16ម៉ាឡេស៊ី ត្រៀមខ្លួន​ទៅ​ប្រកួត​ជម្រុះ​ក្នុង​ពូ​ល G នៃ​ពាន​ទ្វីបអាស៊ី AFC U-16 Championship 2016 ជាមួយ​ក្រុម​ម្ចាស់ផ្ទះ​ឡាវ ហ្វីលីពីន កោះ​Northern Mariana និង ក្រុមទី​ម័​រ​ខាងកើត៕

U-16 កម្ពុជា ចាញ់ម្ចាស់ផ្ទះម៉ាឡេស៊ី ២ ទល់ ០ ក្នុងជំនួបមិត្តភាព