អគ្គលេខាធិការអង្គការសហប្រជាជាតិលោក បាន គីមូន បានប្រកាសកាលពីថ្ងៃពុធថា លោកបានបណ្ដេញប្រធានបេសកកម្មនៅក្នុងសាធារណរដ្ឋអាហ្វ្រិកកណ្ដាលដោយបានប្រកាសថា “វាល្មមគ្រប់គ្រាន់ហើយ” បន្ទាប់ពីមានការចោទប្រកាន់ជាបន្តបន្ទាប់អំពីការរំលោភបំពានផ្លូវភេទលើកុមារដោយកងរក្សាសន្តិភាព។
លោកបាន គីមូន បានប្រាប់ក្រុមអ្នកយកព័ត៌មាននៅឯទីស្នាក់ការកណ្តាលរបស់អង្គការពិភពលោកមួយនេះក្នុងទីក្រុង ញូវយ៉ក ថា លោកBabacar Gaye សញ្ជាតិសេណេហ្គាល់ បានលាលែងពីតំណែងតាមការស្នើសុំរបស់ខ្ញុំ។
ការធ្វើបែបនេះបន្ទាប់ពីមានការចោទប្រកាន់ថា កងថែរក្សាសន្តិភាពមួយមកពី កងកម្លាំង MINUSCA បានចាប់រំលោភក្មេងស្រីអាយុ ១២ ឆ្នាំម្នាក់ក្នុងរយៈពេលប៉ុន្មានខែបន្ទាប់ពីការអះអាងស្រដៀងគ្នានេះត្រូវបានធ្វើឡើងប្រឆាំងនឹងកងទ័ពម៉ារ៉ុកនិងប៊ូរ៉ង់ឌីនៅក្នុងអង្គភាពនេះ។
លោកGaye អាយុ៦៤ ឆ្នាំត្រូវបានតែងតាំងជាប្រមុខទីមួយនៃកម្លាំងរបស់MINUSCA ប្រមាណ ១២ ០០០ នាក់កាលពីខែកក្កដាឆ្នាំមុនហើយក៏ជាបេសកជនពិសេសរបស់លោកបានគីមូន ប្រចាំសាធារណរដ្ឋអាហ្វ្រិកកណ្ដាលផងដែរ។
អ្នកការទូតសញ្ជាតិសេណេហ្គាល់រូបនេះបានប្រាប់ វិទ្យុ បារាំង២៤ ថា លោកបានចែករំលែក កំហឹងរបស់លោក បាន គីមូន ហើយការលាលែងពីតំណែងរបស់គាត់គឺតំណាងឲ្យការឆ្លើយតបរបស់អង្គការនេះក្នុងការអាកប្បកិរិយាដែលមិនអាចទទួលយកបានពីទាហានដែលចូលមកដើម្បីការពារប្រជាជន។
អ្នកនាំពាក្យរបស់អង្គការសហប្រជាជាតិលោក Stephane Dujarric បានពិពណ៌នាការសម្រេចចិត្តបណ្តេញប្រធានបេសកកម្មនេះថា ជា “រឿងមិនធ្លាប់មានពីមុនមក” ហើយវាជាសញ្ញាយ៉ាងច្បាស់ថាអង្គការសហប្រជាជាតិកំពុងឆ្ពោះទៅរកការដោះស្រាយចំពោះការចោទប្រកាន់ពីការប្រព្រឹត្តមិនត្រឹមត្រូវ។
កងកម្លាំង MINUSCA ដែលបំពេញបេសកកម្មនៅសហភាពអាហ្វ្រិកជិតមួយឆ្នាំកន្លងមកហើយនោះត្រូវបានញាំញីដោយការចោទប្រកាន់ជាបន្តបន្ទាប់ពាក់ព័ន្ធនឹងទាហានរបស់ខ្លួន។
លោក Dujarric បានឲ្យដឹងថា រហូតមកដល់ពេលនេះមានការចោទប្រកាន់ពីកំហុសចំនួន ៥៧ ហើយដែល ១១ នៅក្នុងនោះគឺពាក់ព័ន្ធនឹងការរំលោភបំពានផ្លូវភេទលើកុមារ។ ពាក្យបណ្តឹងចុងក្រោយបំផុតត្រូវបានបង្ហាញដោយអង្គការលើកលែងទោសអន្តរជាតិកាលពីថ្ងៃអង្គារដោយពាក់ព័ន្ធនឹងក្មេងស្រីម្នាក់ ដែលបានប្រាប់សាក្សីថា នាងត្រូវបានរំលោភដោយទាហានអង្គការសហប្រជាជាតិក្នុងអំឡុងពេលការស្វែងរកពីផ្ទះមួយទៅផ្ទះមួយនៅក្នុងសង្កាត់មូស្លីម PK5 នៃរដ្ឋ Bangui កាលពីសប្តាហ៍មុន។
សាធារណរដ្ឋអាហ្វ្រិកកណ្តាលកំពុងព្យាយាមងើបចេញពីអំពើហិង្សាដែលបានផ្ទុះឡើងបន្ទាប់ពីមានរដ្ឋប្រហារមួយក្នុងឆ្នាំ ២០១៣ រវាងក្រុមឧទ្ទាមមូស្លីមប្រឆាំងនឹងពួកសកម្មប្រយុទ្ធសាសនាគ្រិស្ត។
កិច្ចប្រជុំក្រុមប្រឹក្សាសន្តិសុខពិសេសមួយបានធ្វើឡើងនៅថ្ងៃព្រហស្បតិ៍ដើម្បីពិភាក្សាអំពីការ រំលោភបំពាន ផ្លូវភេទដោយកងរក្សាសន្តិសុខ ហើយលោកបាន គីមូន ក៏នឹងប្រាប់មេបញ្ជាការកងកម្លាំង និងប្រេសិតមកពីបេសកកម្មទាំង ១៦ផងដែរថា ការចោទប្រកាន់ត្រូវតែយកចិត្តទុកដាក់ឲ្យបានខ្លាំង។
កាលពីខែមិថុនាលោក បាន គីមូន ជ្រើសតាំងក្រុមពិនិត្យឡើងវិញមួយ ដែលដឹកនាំដោយ អតីតតុលាការកំពូលរបស់ប្រទេសកាណាដាគឺលោកស្រី Marie Deschamps ដើម្បីដោះស្រាយចំពោះការចោទប្រកាន់ថា កងទ័ពបារាំងនិងអាហ្វ្រិកបានរំលោភបំពានផ្លូវភេទកុមារនៅក្នុងសាធារណរដ្ឋអាហ្វ្រិកកណ្ដាល។
ជាមួយគ្នានោះ ឯកអគ្គរដ្ឋទូតអាមេរិកSamantha Power បាននិយាយថា លោកស្រីមានការ “រន្ធត់” ចំពោះការចោទប្រកាន់នាពេលចុងក្រោយនេះហើយបាននិយាយថាជនល្មើសត្រូវតែទទួលទោស៕
AFP
លោក Babacar Gaye ដែលជាតំណាងរបស់អគ្គលេខាធិការអង្គការសហប្រជាជាតិប្រចាំសាធារណរដ្ឋអាហ្វ្រិកកណ្តាលនិយាយនៅឯទីស្នាក់ការកណ្តាលរបស់ CAR ក្នុងទីក្រុង Bangui កាលពីឆ្នាំមុន(រូប AFP)
ប្រធានUNបណ្ដេញមេដឹកនាំបេសកកម្មនៅអាហ្វ្រិកកណ្ដាលចំពោះការអះអាងរំលោភបំពានផ្លូវភេទ
0 Comments