កណ្ដាល ៖ សិស្សប្រឡងជាប់សញ្ញាប័ត្រមធ្យមសិក្សាទុតិយភូមិនៅមណ្ឌលក្នុងខេត្តកណ្ដាល ដែលមាននិទ្ទេសA ចំនួន៣នាក់ទទួលបានម៉ូតូScoopy មួយគ្រឿង និងប្រាក់១០០ដុល្លារ ក្នុងម្នាក់ៗ។ ចំណែកឯសិស្សដែលប្រឡងជាប់បាននិទ្ទេស B ,C ,D ,E ចំនួន៤៩០នាក់ទទួលបានទឹកប្រាក់ចំនួន១០០ដុល្លារ ក្នុងម្នាក់ៗ។
ពិធីផ្តល់រង្វាន់ជាការលើកទឹកចិត្តនេះបានធ្វើឡើងនៅសាលាខេត្តកណ្ដាលកាលពីព្រឹកថ្ងៃទី២០ ខែកញ្ញា ឆ្នាំ២០១៥ ក្រោមអធិបតីភាពលោក បណ្ឌិត ម៉ៅ ភិរុណ អភិបាល នៃខណៈអភិបាលខេត្តកណ្ដាល និងអភិបាលរងខេត្តមន្ត្រីរាជការតាមមន្ត្រីជុំវិញខេត្តលោកគ្រូ អ្នកគ្រូ និងសិស្សដែលប្រឡងជាប់មធ្យមសិក្សាទុតិយភូមិចំនួន៤៩៣នាក់។
ថ្លែងឲ្យដឹងនៅក្នុងពិធីនេះមន្ត្រីអ្នកកាន់កម្មវិធីបានឲ្យដឹងថា នៅទូទាំងខេត្តកណ្ដាលមានសិស្សដែលប្រឡងជាប់សញ្ញាប័ត្រទុតិយភូមិចំនួន៤៩៣នាក់ ក្នុងនោះមានសិស្សជា បើនិទ្ទេសA ចំនួន៣នាក់ គឺមកពីវិទ្យាល័យ ហ៊ុន សែន សេរីភាព២នាក់ (ស្រីម្នាក់) និងមកពីសាលាសុវណ្ណភូមិម្នាក់ ត្រូវបានលោកអភិបាលខេត្តកណ្ដាលឧបត្ថម្ភម៉ូតូScoopy ស៊េរីឆ្នាំ2015 ម្នាក់១គ្រឿង និងថវិកា១០០ដុល្លារ។ ចំណែកសិស្សដែលបានប្រឡងជាប់សញ្ញាប័ត្រទុតិយភូមិនិទ្ទេសB ,C ,D ,E ទទួលបានទឹកប្រាក់ក្នុងម្នាក់ៗចំនួន១០០ដុល្លារ។ ដោយឡែកលោកគ្រូ អ្នកគ្រូ លោកអភិបាលឧបត្ថម្ភ ក្នុងម្នាក់ៗ៥០ដុល្លារ។ សរុបថវិកាជាង៦ម៉ឺនដុល្លារ។
លោកបណ្ឌិត ម៉ៅ ភិរុណ បានធ្វើការសំណេះសំណាល និងថ្លែងកោតសរសើរដល់សិស្សដែលបានខិតខំរៀនសូត្រ ហើយប្រឡងជាប់មានចំនួនច្រើននៅឆ្នាំនេះ (២០១៤-២០១៥) ព្រោះថា រាជរដ្ឋាភិបាលបានធ្វើការកំណែទម្រង់យកគុណភាពចំណេះដឹង គឺអ្នកចេះជាប់ អ្នកមិនចេះធ្លាក់។
លោកក៏បានផ្ដាំផ្ញើផងដែរដល់សិស្សដែលប្រឡងជាប់នោះ ត្រូវខិតខំ និងយកចិត្តទុកដាក់រៀនសូត្រឲ្យបានខ្លាំងក្លាថែមទៀតនៅតាមមហាវិទ្យាល័យនានាដើម្បីទទួលបានចំណេះដឹងខ្ពង់ខ្ពស់សម្រាប់ជាអ្នកបន្តវេនក្នុងការដឹកនាំ និងកសាងប្រទេសជាតិ៕
ផ្ដល់រង្វាន់សិស្សជយលាភីប្រឡងសញ្ញាប័ត្រទុតិយភូមិជាប់និទ្ទេសA
0 Comments