ភ្នំពេញ ៖ ឆ្លើយតប ចំពោះការព្យាយាមក្នុងការប្រែក្លាយប្រទេសកម្ពុជា ពីប្រទេសមួយដែលមានសង្គ្រាមរ៉ាំរ៉ៃ មកកាន់សន្តិភាព និងឈានឆ្ពោះមកកាន់ការអភិវឌ្ឍន៍នោះ សាកលវិទ្យាល័យ លីមកុកវីង ( Lim Kokwing )នៃប្រទេសម៉ាឡេស៊ី បានធ្វើការផ្ដល់ នូវសញ្ញាបត្របណ្ឌិតកិត្តិយស «ភាពជាអ្នកដឹកនាំឆ្នើម» ជូនសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ពិធីប្រគល់សញ្ញាបត្រនេះត្រូវបានធ្វើឡើង នាព្រឹកថ្ងៃទី ៩ ខែកញ្ញាឆ្នាំ ២០១៥ នៅវិមានសន្តិភាព ដោយមានការអញ្ជើញចូលរួមពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងឯកឧត្ដមលោកជំទាវ ជាឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី សមាជិកសមាជិការាជរដ្ឋាភិបាល មន្ត្រីអ្នកមុខអ្នកការនិងក្រុមគ្រួសាររបស់សម្ដេចផងដែរ។
ឯកឧត្ដម Raymond Krill សាស្ត្រាចារ្យ នៃសាកលវិទ្យាល័យលីមកុកវីងបានថ្លែងអំពីស្នាដៃរបស់សម្ដេចថា សម្ដេចអគ្គមហាសេនាបតីតេជោ បានធ្វើជារដ្ឋមន្ត្រីក្រសួងការបរទេស នៅពេលដែលសម្ដេចមានអាយុ ២៧ ឆ្នាំ ហើយអាយុ ៣៣ឆ្នាំ សម្ដេចបានក្លាយជានាយករដ្ឋមន្ត្រីវ័យក្មេងជាងគេលោកដាប់ពិភពលោក នៅឆ្នាំ១៩៨៥។ បច្ចុប្បន្ននេះ សម្ដេចអគ្គមហាសេនាបតី មានអាយុ ៦៣ឆ្នាំដែលជានាយករដ្ឋមន្ត្រីមានស្នាដៃឆ្នើម ហើយការគ្រប់គ្រងរបស់សម្ដេចតេជោត្រូវបានទទួលស្គាល់ជាអ្នកដឹកនាំដែលមានគោលនយោបាយយូរអង្វែងនៅលើពិភពលោក។ ក្នុងរយៈពេល៣០ឆ្នាំ ក្រោមការដឹកនាំរបស់សម្ដេចអគ្គមហាសេនាបតីតេជោ បានកសាងសន្តិភាពនិង ស្ថេរភាពពេញលេញជូនប្រទេសជាតិ។ លើសពីនេះទៅទៀត សម្ដេចតេជោ សម្រេចបានស្នាដៃដ៏សំខាន់បំផុត ក្នុងសកម្មភាពកាត់បន្ថយភាពក្រីក្រ អភិវឌ្ឍន៍វិស័យសុខាភិបាលនិង ពង្រីកវិសាលភាពនៃវិស័យអប់រំ សម្រាប់ប្រជាជនកម្ពុជាទូទាំងប្រទេសនិង ជានាយករដ្ឋមន្ត្រីសម្រេចបាននូវការផ្លាស់ប្ដូរ និងភាពជោគជ័យក្នុងការអភិវឌ្ឍន៍សម្រាប់ប្រទេសកម្ពុជា។ ប្រទេសជាតិទាំងមូលដែលជាកន្លែងពោរពេញដោយឧបសគ្គ ក្លាយជាទីកន្លែងដែលពោរពេញដោយក្ដីសង្ឃឹម និង ការអភិវឌ្ឍន៍ ក្រោមការដឹកនាំដ៏ឈ្លាសវៃរបស់សម្ដេចអគ្គមហាសេនាបតីតេជោ ក្នុងនោះបានផ្សះផ្សាប្រជាជនកម្ពុជាពីផ្នត់គំនិតដ៏តូចចង្អៀតនៃជាតិនិយម ឲ្យក្លាយទៅជាការសាមគ្គីរួបរួមជាតិជាធ្លុងមួយ និង បានធ្វើឲ្យកម្ពុជាប្រែក្លាយជាប្រទេសមួយដែលមានសក្ដានុពល និងភាពរស់រវើកក្នុងតំបន់អាស៊ី។
លោកបន្តថា ភាពជាអ្នកដឹកនាំល្អប្រសើរ និង ពោរពេញដោយចក្ខុវិស័យរបស់សម្ដេចអគ្គមហាសេនាបតីតេជោ គឺជានិមិត្តរូបតំណាងឲ្យសុខសន្តិភាពស្ថិរភាព និង ទំនើបកម្មនៃប្រទេសកម្ពុជា ដែលបច្ចុប្បន្ននេះប្រៀបបាននឹងមេដែកមួយដែលទាក់ទាញនូវការវិនិយោគទុន និង ភ្ញៀវទេសចរណ៍មកពីទូទាំងពិភពលោក។ កវី ទាហាន និង រដ្ឋបុរស សម្ដេចអគ្គមហាសេនាបតីតេជោគឺជាកវី ដែលងាយប្រតិកម្មទៅនឹង ភាពលាយឡំគ្នានៃជីវិត។ ប៉ុន្តែគាត់ក៏ជាទាហានម្នាក់ផងដែរ ហេតុដូចនេះវាបែរជាធ្វើឲ្យសម្ដេចអគ្គមហាសេនាបតីតេជោប្រែទៅជាមានភាពរឹងប៉ឹងនិងមានវិន័យល្អ ពិតជាមេដឹកនាំនៃជនគ្រប់រូបមែន។
ជាមួយនិងការថ្លែងអំណរគុណចំពោះសាកលវិទ្យាល័យលីមកុកវីង ដែលបានផ្ដល់សញ្ញាបត្រ «ភាពជាអ្នកដឹកនាំឆ្នើម» សម្ដេចតេជោនាយករដ្ឋមន្ត្រីមានប្រសាសន៍ថា កិត្តិយសដែលពោរពេញទៅដោយមោទនភាពនេះ បានឆ្លុះបញ្ចាំងពីដំណើរវិវត្តន៍នៅលើមាគ៌ាដ៏ត្រឹមត្រូវ និងប្រាកដនិយម នៃទស្សនវិស័យនយោបាយកម្ពុជា ក្នុងភាពជាអ្នកដឹកនាំដែលបានទម្លុះភាពឯកោ ភាពទាល់ច្រក និងបានដោះស្រាយវិបត្តិជាច្រើនក្នុងអតីតកាល ប្រកបដោយភាពសាកសិទ្ធព្រមទាំងបានរៀបចំខ្លួនយ៉ាងសមស្របទៅនឹងស្ថានការណ៍បច្ចុប្បន្ន និងបានបន្តរៀបចំយុទ្ធសាស្ត្រអភិវឌ្ឍជាតិ ប្រកបដោយចក្ខុវិស័យមុតស្រួចសម្រាប់ពេលអនាគតរបស់កម្ពុជា។ កិត្តិយសនេះក៏បានរំលេចកាន់តែប្រត្យក្សថែមទៀតនូវកាតព្វកិច្ចចម្បងៗនូវចំពោះមុខ ដែលខ្ញុំចាំបាច់ត្រូវធ្វើដោយមិនអាចបន្ធូរដៃ ឬសម្រាក ឬធ្វេសប្រហែស ក្នុងមួយវិនាទីណាបានឡើយ ពិសេសក្នុងស្ថានភាពដែលកម្ពុជាកំពុងខិតជិតទៅក្នុងកិច្ចការធ្វើសមាហរណកម្ម ក្នុងសហគមន៍សេដ្ឋកិច្ចអាស៊ាននៅចុងឆ្នាំនេះ និងក្នុងពេលដែលពិភពលោកទាំងមូលកំពុងតែខិតខំប្រឹងប្រែងដោះស្រាយបញ្ហាប្រឈមនានារួមទាំងការថយចុះ នៃកំណើនសេដ្ឋកិច្ចជាដើម។ ប្រការនេះពិតជាទាមទារនូវសមត្ថភាព ទេពកោសល្យ ទស្សនវិស័យប្រកបដោយគតិបណ្ឌិត ភាពប្រាកដនិយម នៃមេដឹកនាំសម្រាប់ជាគំរូដ៏ប្រពៃ នៃការបណ្ដុះនូវស្មារតី និងឆន្ទៈខ្ពស់ក្នុងកិច្ចអភិវឌ្ឍជាតិមាតុភូមិ ឲ្យមានភាពចម្រុងចម្រើន ប្រកបដោយចីរភាព រក្សាបាននូវសុខសន្តិភាព និងសុភមង្គលជូនប្រជាជន និងសង្គមជាតិកម្ពុជា។
សម្ដេចតេជោនាយករដ្ឋមន្ត្រីមានប្រសាសន៍ថា សញ្ញាបត្រនេះ ក៏បានលើកទឹកចិត្តបន្ថែមដល់រូបខ្ញុំ ក្នុងការបន្តនូវបុព្វហេតុបម្រើប្រជាជន បម្រើជាតិមាតុភូមិ បន្តអភិវឌ្ឍសង្គមសេដ្ឋកិច្ចកម្ពុជា ការលើកតម្កើងមរតកវប្បធម៌ ការថែរក្សានូវប្រពៃណី អរិយធម៌ជាតិ ឲ្យបានគង់វង្ស និងការអភិវឌ្ឍន៍វិស័យសិក្សាស្រាវជ្រាវវិទ្យាសាស្ត្រ ឲ្យស្របទៅនឹងនិន្នាការនៃចរន្តសកលភាវូបនីយកម្ម។ កិត្តិយសដែលខ្ញុំទទួលបាននាថ្ងៃនេះ គឺជាកិត្តិយសរបស់យើងទាំងអស់គ្នា ពីព្រោះកិច្ចខិតខំប្រឹងប្រែងនិងពលិកម្មទាំងអស់របស់ខ្ញុំគឺនូវក្នុងបុព្វហេតុជាតិមាតុភូមិ និងប្រជាជនជាទីស្រឡាញ់។ ចំពោះមុខនេះខ្ញុំក៏សូមចែករំលែកកិត្តិយសដ៏ឧត្ដុងឧត្ដមនេះដល់ក្រុមគ្រួសារ ឧត្ដមភរិយា កូន និង ចៅៗ ជាទីស្រឡាញ់របស់ខ្ញុំ ដែលតែងតែផ្ដល់កម្លាំងចិត្តដល់ខ្ញុំ ស្ថិតនៅជាមួយខ្ញុំ និងគាំទ្រខ្ញុំគ្រប់កាលៈទេសៈទាំងអស់ ទាំងក្នុងជីវិតរស់នៅសាមញ្ញ ទាំងក្នុងជីវិតបម្រើការងារជាតិមាតុភូមិ ក្នុងពេលលំបាក ខ្ញុំមានឧត្ដមភរិយា ព្រមទាំងកូនៗ និងចៅៗ ជាទីស្រឡាញ់នៅក្បែរខ្ញុំជានិច្ចជាកាល៕
សម្ដេចតេជោនាយករដ្ឋមន្ត្រីទទួលសញ្ញាបត្របណ្ឌិតកិត្តិយស « ភាពជាអ្នកដឹកនាំឆ្នើម »
0 Comments