ព្រះសីហនុ ៖ តាមរបាយការណ៍ខណ្ឌរដ្ឋបាលជលផលកំពង់សោមផ្ញើជូនរដ្ឋបាលខេត្តព្រះសីហនុ បានឲ្យដឹងថា ក្នុងខែសីហាឆ្នាំ២០១៥ ផលនេសាទមានការកើនឡើងគួរឲ្យគាត់សំគាល់ ក្នុងនោះផលនេសាទទឹកសាបបានចំនួន ៣២តោន បូកយោង៦៩៦តោន ការនេសាទត្រីសមុទ្រ បានចំនួន ៤.០៤០តោន បូកយោង ៣១.១៤០តោន ផលនេសាទកែច្នៃបានចំនួន ២៦០តោន បូកយោង ២.១០០តោន ផលិតទឹកត្រីបានចំនួន ៤៥.៥០០លីត្រ បូកយោង ៤៥៥.៥០០លីត្រ ផលនេសាទនាំចេញ ២៥០តោន បូកយោង ១.៨៨០តោន ផលចាប់ពីការចិញ្ចឹម ៨៩តោន បូកយោង ៦៤៦តោន ដាក់ក្តាមមានពងក្នុងបែរ ចំនួន ១៩០គីឡូក្រាម ស្មើនឹង ១.២១០ក្បាល បូកយោង ១.៦១០គីឡូក្រាម ស្មើនឹង១០.០៥២ក្បាល។
ក្រៅពីផលនេសាទ ខណ្ឌរដ្ឋបាលជលផលបានរៀបចំទិវាមច្ឆាជាតិប្រលែងកូនត្រីឆ្ពិនចំនួន៣០.០០០កូនចូលក្នុងស្រះជម្រកត្រីបឹងក្រៅ ស្ថិតនៅស្រុកព្រៃនប់ ខេត្តព្រះសីហនុ។
ក្នុងខែសីហាឆ្នាំ២០១៥ មន្ត្រីខណ្ឌរដ្ឋបាលជលផលកំពង់សោម បានធ្វើការទប់ស្កាត់បង្ក្រាបបទល្មើសជលផលបានចំនួន១២ករណី។ ក្នុងនោះបានធ្វើការផាកពិន័យបទល្មើសជលផលចំនួន៤ករណី បានពិន័យជាប្រាក់បណ្តោះអាសន្នជាប្រាក់ ៣.៩០០.០០០រៀល ពីបទល្មើស(ទូកយន្តអូសគ្រែងឈាម ចំនួន ២ករណី ស្មើនឹងទឹកប្រាក់ចំនួន ៦០០.០០០រៀល និងរថយន្តដឹកកូនគ្រែងឈាមចំនួន០២ករណី ស្មើនឹងទឹកប្រាក់ចំនួន ៣.៣០០.០០០រៀល)។
ធ្វើការរឹបអូស និងបំផ្លាញចោលបទល្មើសជលផលចំនួន ៨ករណី ក្នុងនោះលបពោះវៀនជ្រូកប្រវែង ២៤០ម៉ែត្រ ស្មើនឹងមួយករណី បូកយោង ១.៤៥២ម៉ែត្រស្មើ ៧ករណី។ មន្ត្រីជលផលបានធ្វើការប្រលែងកូនគ្រែងឈាម ២.២០០គីឡូក្រាម ស្មើនឹង ៣ករណី បូកយោង ២.៤៥០គីឡូក្រាម ស្មើនឹង ៤ករណី។ ឧបករណ៍រនាស់អូសគ្រែងឈាម (ទូកយន្ត)ចំនួន៨រនាស់ ស្មើនឹងពីរករណី បូកយោងចំនួន ១២រនាស់ ស្មើនឹង៤ករណី ឧបករណ៍រនាស់ អូសកូនគ្រែងឈាម(ដោយដៃ)ចំនួន៣១រនាស់ ស្មើនឹងពីរករណី។
មន្ត្រីខណ្ឌរដ្ឋបាលជលផលកំពង់សោមសហការ និងមន្ត្រីជំនាញសង្កាត់ខណ្ឌរដ្ឋបាលជលផល និងអាជ្ញាធរមូលដ្ឋានបានចុះដកហូត និងដុតបំផ្លាញចោលឧបករណ៍លបពោះវៀនជ្រូកប្រវែង២៤០ម៉ែត្រ (ម្ចាស់បានគេចខ្លួន) ដកហូតកូនគ្រែងឈាមចំនួន ៧៥០គីឡូក្រាម (អញ្ញតជន) ដឹកទម្លាក់ទុកចោលនៅចំណុច ភូមិអូរឧកញ៉ាហេង និងបានធ្វើការប្រលែងចូលក្នុងដែនសមុទ្រវិញ ខាងកើតព្រែកកោះខ្យង ឃុំអូរជ្រៅ ព្រមទាំងដកហូតកូនគ្រែងឈាមចំនួន ១.៤៥០គីឡូក្រាមដឹកតាមរថយន្តចំនួន០២លើក នៅតំបន់កោះខ្យង ត្រង់ចំណុចភូមិអូរឧកញាហេង ស្រុកព្រៃនប់ និងពិន័យប្រាក់ចំនួន ៣.៣០០.០០០រៀល រឺឯកូនគ្រែងឈាមទាំងនោះ ត្រូវបានមន្ត្រីជំនាញយកទៅប្រលែងចូលក្នុងដែនអភិរក្សគ្រែងឈាមសហគមន៍នេសាទព្រៃនប់២ និងដកហូតរនាស់អូសកូនគ្រែងឈាមដោយដៃចំនួន០២លើក ស្មើនឹង ៣១រនាស់ នៅភូមិកោះខ្យង ឃុំអូរជ្រៅ ស្រុកព្រៃនប់ ខេត្តព្រះសីហនុ (ឧបករណ៍នេះបានរក្សាទុកនៅសង្កាត់រដ្ឋបាលជលផលកំពង់ស្មាច់)។
ហើយការទប់ស្កាត់នូវរាល់បទល្មើសនេសាទក្នុងដែនសមុទ្រ ជាពិសេសបទល្មើសនេសាទកូនគ្រែងឈាម មិនអាចធ្វើតែខណ្ឌរដ្ឋបាលជលផលម្នាក់ឯងបានទេ គឺត្រូវមានការចូលរួមពីអាជ្ញាធរមូលដ្ឋាន សមត្ថកិច្ចពាក់ព័ន្ធ ដើម្បីរក្សាបាននូវកូនគ្រែងឈាមនៅស្រុកព្រៃនប់ឲ្យសម្បូរ ជាពិសេសការការពារ និងអភិរក្សព្រៃកោងកាង ផ្កាថ្ម ស្មៅសមុទ្រ ទើបយើងធានានិរន្តរភាពមច្ឆាជាតិក្នុងដែនសមុទ្ររបស់យើងទទួលបានជោគជ័យ និងសម្បូរបែបថែមទៀត៕
ក្នុងខែសីហា ទិន្នផលនេសាទទឹកសាប ៣២តោននិងនេសាទសមុទ្រ៤.០៤០តោន
0 Comments