ភ្នំពេញ ៖ បក្ខពួកក្រុមក្មេងពាលទុច្ចរិតរកស៊ីឆក់ប្លន់យកទ្រព្យសម្បត្តិគេនៅតាមដងផ្លូវសាធារណៈ ត្រូវបានសមត្ថកិច្ចចាប់ខ្លួនបាន៣នាក់និងម៉ូតូ២គ្រឿងបន្ទាប់ពីពួកគេបានធ្វើសកម្មភាពឆក់យកទូរស័ព្ទដៃពីស្ត្រីម្នាក់បានសម្រេច កាលពីមួយសប្តាហ៍មុន តែទើបចាប់ខ្លួននៅរសៀលថ្ងៃទី០២ ខែឧសភា ឆ្នាំ២០១៩ នៅខណ្ឌសែនសុខ។
សមត្ថកិច្ចបាននាំខ្លួនក្រុមជនសង្ស័យទាំងនោះ រួមទាំងភិនភាគម៉ូតូផងមកឲ្យជនរងគ្រោះមើលមុខតើស្គាល់ជនសង្ស័យទាំងនេះដែរឬទេ ជាលទ្ធផលនាងជនរងគ្រោះបានស្គាល់មុខច្បាស់ទាំងអស់ ហើយក្រុមជនសង្ស័យក៏បានសារភាពផងដែរ ទើបសមត្ថកិច្ចចាប់ឃុំខ្លួនបញ្ជូនទៅតុលាការដើម្បីដាក់គុកពួកគេតែម្តង។
សមាសភាពក្រុមជនសង្ស័យទាំងនោះ ១.ឈ្មោះ សេដ្ឋា មិនារិទ្ឋ ហៅនាង អាយុ២៣ឆ្នាំ នៅភូមិក្រាំងអង្ក្រង សង្កាត់ក្រាំងធ្នង់។ ២.ឈ្មោះ ជា ករុណា ហៅភ័ស្ត អាយុ២៧ឆ្នាំ នៅភូមិតិងចក្រ សង្កាត់គោកឃ្លាង។ ៣.ឈ្មោះ សុខ ច័ន្ទរង្សី ហៅសី អាយុ២៥ឆ្នាំ មានទីលំនៅភូមិគោកឃ្លាង សង្កាត់គោកឃ្លាង ខណ្ឌសែនសុខ។ ៤.ឈ្មោះ ស សំណាងវិច្ឆិកា អាយុ១៨ឆ្នាំ (រត់គេចខ្លួន)។
ប៉ូលិសបានឲ្យដឹងថា ក្រុមជនសង្ស័យខាងលើ ត្រូវបានចាប់ខ្លួនតាមបណ្តឹងចោទប្រកាន់ដោយជនរងគ្រោះម្នាក់ ឈ្មោះ ម៉ៅ ស្រីណាវ អាយុ២៩ឆ្នាំ មុខរបរបុគ្គលិកក្រុមហ៊ុន ហាងសំរិទ្ឋពេជ្រ។
តាមបណ្តឹងរបស់ជនរងគ្រោះបានបញ្ជាក់ថា កាលពីថ្ងៃទី២៤ ខែមេសា ឆ្នាំ២០១៩ នាងបានជិះម៉ូតូនៅតាមផ្លូវលេខ៥៩៨ ក្នុងទិសដៅពីជើងទៅត្បូង នៅពេលធ្វើដំណើរមកដល់ម្តុំមុខហាង ខារ៉ាអូខេបេស្តារ ស្ថិតក្នុងភូមិទំនប់ សង្កាត់ភ្នំពេញថ្មី ខណ្ឌសែនសុខ ពួកគេជិះម៉ូតូ២គ្រឿងមានគ្នា៤នាក់បានមកធ្វើសកម្មភាពឆក់យកទូរស័ព្ទដៃរបស់ដែលកំពុងកាន់នៅដៃពេលកំពុងជិះម៉ូតូតាមផ្លូវ។ នាងបន្តថានៅពេលនោះ ចោរឆក់នោះបានទាក់ដៃចង្កូតជាមួយម៉ូតូរបស់នាងបានដួលទាំងអស់គ្នាតែម្តង តែដោយសារគ្មានសមត្ថកិច្ចនៅក្បែរដើម្បីជួយអន្តរាគមន៍ក្រុមចោរក៏បាននាំគ្នាលើកម៉ូតូជិះបន្តដំណើរទៅមុខទៀតនិងយកទូរស័ព្ទរបស់នាងទៅជាមួយបានដោយសុវត្ថិភាព។ រហូតដល់ថ្ងៃទី២ ខែឧសភា រយៈពេលមួយសប្តាហ៍ក្រោយ ក៏ត្រូវបានប៉ូលិសទូរស័ព្ទឲ្យមកមើលមុខក្រុមចោរទាំងនោះ ទើបនាងស្គាល់ក៏ចង្អុលមុខប្រាប់ប៉ូលិសឲ្យចាប់ឃុំខ្លួនតែម្តង។
ប៉ូលិសនិយាយថា បក្ខពួកជនសង្ស័យម្នាក់ បានរត់គេចខ្លួនឈ្មោះ សុខ ច័ន្ទរង្សី ហៅសី ហៅបក្ខពួកគេចំនួន៣ដែលបានកំពុងតែចាប់ឃុំខ្លួននេះ សុទ្ធតែមានផ្ទុកនូវសារជាតិថ្នាំញៀនក្នុងល្បាយទឹកនោមទាំងអស់គ្នា។ ពួកគេបានសារភាពនូវសកម្មភាពល្មើស ច្បាប់របស់គេនៅពេលធ្វើសកម្មភាពឆក់នោះ ហើយពេលឆក់បានយកទៅលក់ដើម្បីយកលុយទៅទិញថ្នាំញៀនជក់ទាំងអស់គ្នា៕
Source: Kampuchea Thmey Daily
0 Comments