ភ្នំពេញ ៖ ជាលទ្ធផលការវះកាត់ជំងឺបូសអន្ទង់ និងឫសដូងបាតរបស់តារាកំប្លែងជើងចាស់លោក ម៉ៅ សាមឿន ហៅនាយវីតាមីនសេ ទទួលបានលទ្ធផលជោគជ័យ ក៏ប៉ុន្តែក្រុមគ្រួសារសាច់ញាតិកំពុងតែបារម្ភខ្លាំងទៅលើបញ្ហាកម្រិតជាតិស្ករឡើងកាន់តែខ្ពស់។
ក្រោយវះកាត់កាលពីរសៀលថ្ងៃទី៨ ខែកញ្ញា ឆ្នាំ២០១៥កន្លងទៅ នៅមន្ទីរពេទ្យកាល់ម៉ែតស្ថានភាពជំងឺរបស់នាយវីតាមីនសេ នៅស្ថិតក្នុងការតាមដានរបស់គ្រូពេទ្យនៅឡើយ។ នេះបើតាមការបញ្ជាក់របស់តារាកំប្លែងអ្នកនាង មឿន និមល ហៅប៉េងប៉ោង ជាកូន។
ប៉េងប៉ោងបញ្ជាក់ទៀតថា ឪពុកនាងត្រូវចូលវះកាត់ផ្នែកជំងឺបូសអន្ទង់ និងឫសដូងបាតដែលបូសនោះមានខ្ទុះហូរខ្លាំងមិនអាចទុកយូរបាន ក៏សម្រេចវះតាមការបញ្ជាពីក្រុមគ្រូពេទ្យ។
អ្នកនាងនិយាយទៀតថា ឪពុកនាងបានចំណាយពេលចាប់ពីម៉ោង១០ព្រឹក ដល់ម៉ោង១២និង៣០នាទីថ្ងៃត្រង់ ទើបចេញពីបន្ទប់វះកាត់ ដោយនេះជារយៈពេលយូរគួរសមរហូតកូនៗមានអារម្មណ៍ថា ភ័យខ្លួនមិនស្ទើរឡើយ។ ប៉ុន្តែក្រោយពីវះកាត់រួច អត់មានអ្វីប្រែប្រួលក្រៅពីលោកគ្រូពេទ្យបារម្ភតែម្យ៉ាង គឺកម្រិតជាតិស្ករខ្ពស់ឲ្យយើងមើលថែឲ្យល្អជាបន្តទៀត។
នាងបន្តថា ក្រោយពីវះកាត់រួច យើងនៅបន្តទុកគាត់សម្រាកនៅមន្ទីរពេទ្យមួយរយៈទៀត ដើម្បីតាមដានស្ថានការណ៍ បើទោះបីជាឪពុកនាងមិនចង់សម្រាកនៅពេទ្យក្តី។
តារាកំប្លែងរូបនេះបញ្ជាក់ថា កន្លងមក ដោយសារវ័យគាត់កាន់តែជរា អ្នកនាង និងក្រុមគ្រួសារបានស្នើឲ្យឪពុកបន្ថយការងារសិល្បៈខ្លះ ប៉ុន្តែឪពុកនាងនៅតែចង់ឡើងឆាកសម្ដែង ព្រោះតែស្តាយការងារសិល្បៈដែលពេលខ្លះឡើងសម្តែងទាំងខ្លួនឈឺក៏មាន។
អ្នកនាង ប៉េងប៉ោង បានលើកឡើងទៀតថា នេះមិនមែនជាលើកទី១នោះទេ ដែលលោកឪពុកមកសម្រាកពេទ្យនេះ ហើយតែងតែជួយខ្នះខ្នែងរហូតពីក្រុមគ្រូពេទ្យជំនាញ និងសប្បុរសជននានាតែងតែសួរនាំជូនពរ និងខ្លះទៀតមកសួរសុខទុក្ខដល់មន្ទីរពេទ្យ ដែលធ្វើឲ្យក្រុមគ្រួសារមានទឹកចិត្តរំភើប និងកក់ក្ដៅពេលមានអ្នកដទៃអាណិតស្រឡាញ់ក្នុងសភាពកំពុងជួបទុក្ខលំបាក។
គួរបញ្ជាក់ឲ្យដឹងដែរថា កាលពីព្រឹកថ្ងៃទី១១ ខែកញ្ញា ឆ្នាំ២០១៥នេះ សមាគមសិល្បករខ្មែរដែលមានលោក សុះ ម៉ាច ជាប្រធាននោះបានដឹកនាំតារាសិល្បៈប្រុស/ស្រីចុះទៅសួរសុខទុក្ខ និងនាំយកអំណោយជាថវិកាមួយចំនួនទៅជូនលោក ម៉ៅ សាមឿន ហៅនាយវីតាមីនសេ ដោយផ្ទាល់ផងដែរនៅឯមន្ទីរពេទ្យកាល់ម៉ែត៕
ក្រោយវះកាត់ ស្ថានភាពជំងឺនាយវីតាមីនសេឡើងជាតិស្ករខ្ពស់គួរឲ្យព្រួយបារម្ភ
0 Comments