មណ្ឌលគិរី ៖ មានលិខិតអនាមិកចំនួនពីរសន្លឹក ដែលលោកអេង ប៊ុនហ៊ាង អភិបាលខេត្តស្នើឲ្យថ្នាក់លើដកលោកញ៉ែម វ៉ាន់នី ស្នងការខេត្តមណ្ឌលគិរីចេញ ហើយរៀបចំដាក់ជំនួសដោយលោកទៀង សៅរតន៍ ស្នងការរង ជាថ្នូរនឹងប្រាក់ចំនួន៨ម៉ឺន សហរដ្ឋអាមេរិក។
តាមសំបុត្រអនាមិកនោះសរសេរថា ប្រាក់ត្រូវបានលោកទៀង សៅរតន៍ រៀបចំឲ្យត្រឹមតែចំនួនពាក់កណ្ដាលសិន ចាំសម្រេចទើបឲ្យគ្រប់ចំនួន។ តែផ្ទុយទៅវិញអ្នកដែលត្រូវបានឡើងកាន់តំណែងជាស្នងការពិតប្រាកដ ពេលនេះគឺលោក តូច យ៉ុន។ មហាជននានាទូទាំងខេត្តនេះ មានចម្ងល់យ៉ាងខ្លាំងនឹកស្មានតែ លោកទៀង សៅរតន៍ស្នងការរងជាឡើងកាន់តំណែងជាស្នងការព្រោះពួកគាត់បានឃើញតាមសំបុត្រអនាមិកមានការសូកប៉ាន់គ្នាលុយយ៉ាងច្រើនសន្ធឹកសន្ធាប់បែបនេះ ប៉ុន្តែនៅពេល ដែលដល់ថ្ងៃថ្នាក់លើតែងតាំង គឺតែងតាំងលោកតូច យ៉ុនឯណេះទេជាស្នងការខេត្ត។ ស្របពេលនេះដែរមហាជនជាច្រើនបានលើកឡើងថា បើសិនជារឿងសូកប៉ាន់នេះបានកើតមានមែន គ្មាននរណាម្នាក់ស្រាវជ្រាវរកឃើញឡើយពីព្រោះគេមិនអាចមានជាលាយលក្ខណ៍អក្សរ ឬមានស្នាមមេដៃនោះឡើយ មានតែអង្គភាពប្រឆាំងអំពើពុករលួយតែមួយប៉ុណ្ណោះ ដែលមានលោកឱម យ៉ិនទៀងជាប្រធាន ទើបអាចស្រាវជ្រាវរកឃើញ។
ទាក់ទិនបញ្ហានេះអ្នកយកព័ត៌មានកម្ពុជា នៅព្រឹកថ្ងៃទី១១ ខែកញ្ញា នេះ បានធ្វើដំណើរទៅកាន់ការិយាល័យរបស់លោកស្នងការរងលោកទៀង សៅរតន៍ នៅស្នងការខេត្តលោកបានបញ្ជាក់ប្រាប់ថា រូបលោកគឺពុំមានការសូកប៉ាន់ប្រាក់ជាច្រើនម៉ឺនដុល្លារដើម្បីតំណែងហ្នឹងទេ បើមានប្រាក់ប៉ុណ្ណឹងមែន លោកទុកទិញ570ជិះវិញល្អជាង។
លោកអេង ប៊ុនហ៊ាង អភិបាលខេត្តមណ្ឌលគិរី បានឲ្យដឹងនៅរសៀលថ្ងៃទី១១ ខែកញ្ញា ឆ្នាំ២០១៥ វេលាម៉ោង១៣និង១៣នាទីថ្ងៃនេះថា លោកបានប្រាប់ថា លោកកំពុងរកមុខអ្នកកាសែតណាដែលបានចុះផ្សាយរឿងនេះខុសពីការពិត ហើយរឿងនេះវាបាននិងកំពុងធ្វើឲ្យប៉ះពាល់កិត្តិយស និងសេចក្ដីថ្លៃថ្នូររបស់គាត់យ៉ាងធ្ងន់ធ្ងរទៀតផង៕
បែកធ្លាយលិខិតអនាមិក, ចៅហ្វាយខេត្តទារប្រាក់៨ម៉ឺនដុល្លារពីស្នងការរងម្នាក់
0 Comments