បាត់ដំបង ៖ កុមារីរងគ្រោះម្នាក់ត្រូវបានគេប្រទះឃើញដេកស្លាប់ នៅក្នុងកូនប្រឡាយតូចមួយជាប់មាត់ស្ទឹងគ្រញូង ស្ថិតក្នុងភូមិអូរជាំកណ្ដាល ឃុំកំពង់ល្ពៅ ស្រុកសំឡូត ខេត្តបាត់ដំបងកាលពីវេលាម៉ោង៨និង៥០នាទី ព្រឹកថ្ងៃទី១១ ខែកញ្ញា ឆ្នាំ២០១៥ នៅកណ្ដាលព្រៃឫស្សី។
តាមការរៀបរាប់ពីសាច់ញាតិ និងក្រុមគ្រួសាររបស់កុមារីរងគ្រោះ ដែលរស់នៅភូមិតាសាញជើង ឃុំតាសាញ បាននិយាយថា កាលពីវេលាម៉ោង៤ល្ងាច ថ្ងៃទី១០ ខែកញ្ញា កូនប្រុសរបស់គាត់បាននាំគ្នាចេញទៅដឹកគោយកមកផ្ទះវិញ ប៉ុន្តែនៅពេលនោះដែរកូនស្រីរបស់គាត់ឈ្មោះ ឃឹម នីស្សា អាយុ៧ឆ្នាំ ក៏បានសុំទៅជាមួយដែរ តែលោកមិនបានអនុញ្ញាតឲ្យទៅឡើយ ប៉ុន្តែត្រូវបានកូនស្រីនោះលួចទៅតាមបងៗវាដោយមិនដឹងខ្លួន លុះនៅពេលត្រឡប់មកដល់ផ្ទះវិញ ក៏បានបាត់កូនស្រីទើបមានការភ្ញាក់ផ្អើល ដោយបងៗវាបាននិយាយថា ពេលទៅដឹកគោនោះឃើញប្អូនស្រីទៅដល់ដែរ ហើយពេលត្រឡប់មកវិញគឺប្អូនស្រីដើរតាមក្រោយរហូត ដោយវាបានចូលទៅក្នុងវត្តគ្រញូង ដើម្បីសុំផ្កាពីព្រះសង្ឃយកមកដាំ ប៉ុន្តែពេលមកដល់ផ្ទះ ក៏ស្រាប់តែបាត់ប្អូនទាំងមិនដឹងខ្លួន។
នៅពេលនោះដែរបង ប្អូនទាំងអស់បាននាំគ្នាដើររកពេញព្រៃ តែរកមិនឃើញក៏បានរាយការណ៍ទៅសមត្ថកិច្ចប៉ុស្តិ៍ ដើម្បីជួយអន្តរាគមន៍ ប៉ុន្តែដោយសារតែមេឃងងឹតពេកក៏សម្រេចចិត្តរង់ចាំដល់ថ្ងៃស្អែកទើបរកបន្តទៀត។
លុះព្រឹកឡើងការរុករកបានចាប់ផ្តើមបន្ត ដោយអ្នកខ្លះបានឆ្លងស្ទឹងគ្រញូងចូលទៅក្នុងទឹកដីភូមិអូរជាំកណ្ដាល ក៏បានប្រទះឃើញក្មេងស្រីដេកស្លាប់នៅក្នុងកូនប្រឡាយ ស្ថិតក្នុងព្រៃឫស្សី ក្បែរមាត់ស្ទឹងគ្រញូង ដោយជនមិនស្គាល់មុខបានដោះអាវក្មេងស្រីបោះទៅលើមែកឈើ និងស្បែកជើងស្ថិតនៅរាយប៉ាយក្បែរមាត់ប្រឡាយ ដោយឡែកសពក្មេងស្រីមានសភាពបាក់ក ផង។
ភ្លាមៗនោះដែរ ក្រុមគ្រួសារបានលើកយកសពមកកាន់លំនៅដ្ឋានដោយសមត្ថកិច្ចមិនទាន់បានពិនិត្យ និងធ្វើកោសល្យវិច័យនៅឡើយ ដោយម្នាក់ៗបានធ្វើការសន្និដ្ឋានជំហានដំបូងថា អាចជាករណីចាប់រំលោភហើយសម្លាប់បំបាត់ដានតែម្តង ដោយសារតែទំនងជាមានការស្គាល់គ្នារវាងកុមារីរងគ្រោះនិងជនមិនស្គាល់មុខ។
ដោយឡែកក្រោយពេលដែលក្រុមគ្រូពេទ្យឃុំពិនិត្យមើលក៏បានបញ្ជាក់ថា កុមារីមិនមានការប៉ះពាល់ត្រង់ផ្នែកប្រដាប់ភេទនោះទេ មានន័យថាមិនមានពាក់ព័ន្ធក្នុងករណីរំលោភសេពសន្ថវៈឡើយ ប៉ុន្តែក្មេងស្រីរងគ្រោះត្រូវជនមិនស្គាល់មុខមួលក បំបាក់កដើម្បីសម្លាប់ដូច្នេះអាចជាករណីគំនុំទៅវិញ ដោយបច្ចុប្បន្នសមត្ថកិច្ចកំពុងធ្វើការស្រាវជ្រាវហើយក្នុងការតាមរកមុខសញ្ញាយកមកផ្ដន្ទាទោសតាមច្បាប់៕
សង្ស័យរំលោភសម្លាប់ដោយមួលបំបាក់ក លើកុមារីអាយុ៧ឆ្នាំ
0 Comments