ភ្នំពេញ ៖ តារាកំប្លែងស្រីមានភាពលេចធ្លោខ្លាំងជាងគេរបស់ក្រុមនាយ ពាក់មី គឺនាង ខ្ញុងថ្មីៗនេះបានរងនូវការរិះគន់ និងជេរប្រមាថ ដោយប្រើពាក្យសម្ដីមិនសមរម្យមួយចំនួន ខណៈដែលត្រូវបានបណ្ដាសារព័ត៌មានក្នុងស្រុកជាច្រើនបានធ្វើការសរសេរចុះផ្សាយព័ត៌មានពីជីវិតស្នេហាឯកជនខាងក្រៅរបស់នាងដោយលើកឡើងថា «ខ្ញុងប្រកាសរកប្តីអ្នកមានមិនយកភ្នែកមើលទេប្តីអ្នកក្រ»។ ព័ត៌មាននេះធ្វើឲ្យមានការរិះគន់រហូតប៉ះពាល់ដល់អារម្មណ៍ ដែលនាងគិតថាមិនអាចទទួលយកបានឡើយ។
ឆ្លើយតបនឹងការចុះផ្សាយរបស់បណ្តាសារព័ត៌មានក្នុងស្រុកខាងលើមុននេះបន្តិចគេឃើញតារាកំប្លែងនាង ខ្ញុង បានចេញមុខប្រតិកម្មខឹងខ្លាំងៗ ដែលធ្វើឡើងតាមរយៈឃ្លីបវីដេអូខ្លីមួយមានរយៈពេល១២នាទី ដោយនាងបាននិយាយថា នាងមានការមិនសប្បាយចិត្តសោះបន្ទាប់ពីមានការចុះផ្សាយព័ត៌មានបំផ្លើសហួសពីការពិតរហូតធ្វើឲ្យមហាជនមានការយល់ច្រឡំរិះគន់ដោយប្រើពាក្យសម្តីជេរប្រមាថធ្ងន់ៗទៅលើរូបនាងស្ទើរពេញផ្ទៃប្រទេស។
តាមរយៈឃ្លីបវីដេអូរបស់តារាកំប្លែងស្រីអ្នកនាង ខ្ញុង ដែលបានបង្ហោះជាសាធារណៈនៅលើបណ្ដាញសង្គមហ្វេសប៊ុកកាលពីយប់មិញ ក្រោយពីការចុះផ្សាយព័ត៌មាននោះ នាងបាននិយាយថា ដំបូងឡើយខ្ញុំគិតថាមិនចង់ធ្វើការតបតចំពោះការចុះផ្សាយនេះទេ តែនៅពេលដែលខ្ញុំបានមើលនៅលើការសរសេរសារបញ្ចេញមតិក្នុងហ្វេសប៊ុកគឺ ឃើញមានពាក្យជេរបញ្ចោរដៀលត្មះ និងមើលងាយលើសអ្វីដែលជាការពិត ទើបនាំឲ្យមានអារម្មណ៍មិនសប្បាយចិត្តរហូតទ្រាំអត់ធ្មត់ពុំបានក៏ចេញមុខស្រាយបំភ្លឺបញ្ជាក់ពីការពិត។
តារាកំប្លែងចូលចិត្តលេង និងនិយាយមិនសូវមានភាពខ្មាសអៀននាង ខ្ញុង បានបញ្ជាក់ថា មនុស្សយើងបើខុសគឺត្រូវទទួលស្គាល់ថាខ្លួនខុស ប៉ុន្តែនៅពេលដែលមិនខុសហើយមានគេចោទប្រកាន់តែងមានអារម្មណ៍ផ្សេង ដូច្នេះទើបខ្ញុំចង់បកស្រាយម្តងមួយចំណុចដើម្បីឲ្យមហាជនបានយល់ និងដឹងទាំងអស់គ្នា។ ខ្ញុំចង់និយាយប្រាប់ទៅបងៗអ្នកសារព័ត៌មានថា បើសិនបងបានទទួលព័ត៌មានពីនាងខ្ញុំប៉ុណ្ណា សូមចុះផ្សាយតាមហ្នឹងទៅសូមកុំបន្ថែមពាក្យ ឬបំផ្លើសលើសការពិតនិងបំប៉ោងចំណងជើងនេះជាចំណុចទី១។ ខ្ញុំចង់សួរទៅបងៗថា សប្បាយចិត្តណាមែនទេពេលដែលចុះផ្សាយមួយទំព័រធ្វើឲ្យគេជេរបញ្ចោរ១ប្រទេស…។ បងសប្បាយចិត្តទេ ?ត្រង់ចំណុចហ្នឹងធ្វើឲ្យខ្ញុំទទួលយកមិនបានទេព្រោះវាមិនមែនជារឿងពិត។
អ្នកនាង ខ្ញុង បានបន្ថែមថា ចំពោះមួយរឿងទៀតខ្ញុំក៏ចង់លើកមកនិយាយដែរគឺខាងបងប្អូនអ្នកលេងហ្វេសប៊ុកនៅពេលឃើញព័ត៌មាននេះហើយគឺពួកគាត់បានព្រួតគ្នាសរសេរសារជេរបញ្ចោរនិងមើលងាយច្រើនមកលើរូបខ្ញុំ ដូច្នេះខ្ញុំចង់ប្រាប់ទៅវិញថា បើស្រឡាញ់ឬស្អប់ក៏ដោយមុននឹងសម្រេចចិត្តជេរមនុស្សម្នាក់ត្រូវស៊ើបឲ្យបានដឹង រឿងហេតុច្បាស់លាស់សិនកុំគ្រាន់តែឮតាមគេរួចនាំគ្នាជេរបញ្ចោរកប់ៗមាត់ប្រើពាក្យមិនគួរគប្បី ព្រោះស្តាប់ទៅវាមិនពីរោះទាល់តែសោះ។ ដូច្នេះហើយខ្ញុំសុំសំណូមពរឲ្យបញ្ឈប់ទៅព្រោះវាជាព័ត៌មានមួយដែលលើកឡើងខុសផ្ទុយស្រឡះពីការពិត៕
ខ្ញុងប្រតិកម្មនឹងការរិះគន់ជុំវិញរឿងប្រកាសរកតែប្ដីអ្នកមានទ្រព្យ
0 Comments