កម្ពុជា ចូលរួម​វេទិកា​តុមូល​ថ្នាក់​រដ្ឋមន្ត្រី ស្ដីពី “​ការរៀបចំ​គោលនយោបាយ​វិនិយោគ​សកល​ក្នុង​សតវត្ស​ទី​២១” នៅ​ទីក្រុង​ហ្សឺ​ណែវ ប្រទេស​ស្វី​ស

ហ្សឺ​ណែវ ​៖ លោក ប៉ាន សូរ​ស័ក្ដិ រដ្ឋមន្ត្រីក្រសួង​ពាណិជ្ជកម្ម កាលពី​ថ្ងៃ​ព្រហស្បតិ៍ ១​រោច ខែអស្សុជ ឆ្នាំច សំរឹទ្ធិស័ក ព​.​ស ២៥៦២ ត្រូវ​នឹង​ថ្ងៃទី​២៥ ខែតុលា ឆ្នាំ​២០១៨​បាន​ចូលរួម​វេទិកា​តុមូល​ថ្នាក់​រដ្ឋមន្ត្រី​ស្ដីពី “​ការរៀបចំ​គោលនយោបាយ​វិនិយោគ​សកល​ក្នុង​សតវត្ស​ទី​២១” ដែល​រៀបចំឡើង​ក្នុងអំឡុងពេល​នៃ​វេទិកា​វិនិយោគ​ពិភពលោក ២០១៨ នៅ​ទីក្រុង​ហ្សឺ​ណែវ ប្រទេសស្វីស។

​នៅក្នុង​សេចក្ដី​ផ្ដើម​វេទិកា លោក មូ​គី​សា គី​ទូ​យី អគ្គលេខាធិការ​នៃ​សន្និសីទ​អង្គការសហប្រជាជាតិ ស្ដីពី​ពាណិជ្ជកម្ម និង​ការអភិវឌ្ឍ បាន​សង្ខេប​ជូន​អំពី​សាវតា និង​បញ្ហា​មួយចំនួន​ទាក់ទង​នឹង​គោលនយោបាយ​វិនិយោគ​សកលលោក ក្នុងពេល​បច្ចុប្បន្ន ជាពិសេស​ការផ្លាស់ប្ដូរ​និន្នាការ​វិនិយោគ និង​ពាណិជ្ជកម្ម និង​គោលនយោបាយ​គាំពារ​និយម ដែល​ប៉ះពាល់​យ៉ាងធ្ងន់ធ្ងរ​លើ​លំហូរ​វិនិយោគ​ដោយ​ផ្ទាល់​ពី​បរទេស​។ គោលបំណង​នៃ​វេទិកា​តុមូល​នេះ​គឺ (១) ពិភាក្សា​លើ​ដំណោះស្រាយ ដើម្បី​ទាញយក​ការវិនិយោគ​បន្ថែម ដែលជា​គន្លឹះ​ក្នុងការ​សម្រេចបាន​នូវ​គោលដៅ SDG (២) ទាញយក​ផលប្រយោជន៍​ពី​បដិវត្ត​ឧស្សាហកម្ម​ទី​៤ សម្រាប់​ការ​អភិវឌ្ឍ​ដោយ​ចីរភាព និង (៣) កាត់បន្ថយ​ផល​ប៉ះពាល់​អវិជ្ជមាន​ដែលជា​លទ្ធផល​នៃ​គោលនយោបាយ​គាំពារ​និយម​។



ឆ្លើយ​តប​ទៅ​នឹង​ប្រធានបទ​ដែល​លើកឡើង លោក​រដ្ឋមន្ត្រី បាន​ផ្ដល់​នូវ​បទ​អន្តរាគមន៍ ដែលមាន​សង្ខេប​ជូន​ដូចខាងក្រោម​ ៖- តាម​ការវិភាគ​របស់ UNCTAD ឃើញថា​លំហូរ FDI នៅ​លើ​ពិភពលោក​បាន​ធ្លាក់ចុះ​គួរ ឲ្យ​កត់សម្គាល់​ក្នុង​ឆ្នាំ​២០១៧ សម្រាប់​កម្ពុជា លំហូរ FDI បាន​កើនឡើង ១២% ពី ២,៤៧ ប៊ី​លាន ទៅ ២,៧៨ ប៊ី​លាន​ដុល្លារ​អាមេរិក នៅ​ឆ្នាំ​២០១៧ ដែល​ទទួល​បាន​តាម​រយៈ​ការ​វិនិយោគ​ក្នុង​វិស័យ​ហិរញ្ញវត្ថុ ទូរគមនាគមន៍ អចលនទ្រព្យ និង​កម្មន្តសាល​មិនមែន​វាយនភ័ណ្ឌ​។

កម្ពុជា​បាន​កំណត់​រួចជាស្រេច​នូវ​គោលនយោបាយ​ទាក់ទាញ​ការ​វិនិយោគ ដើម្បី​គាំទ្រ​ការអភិវឌ្ឍ​ដោយ​ចីរភាព​រួមមាន (១) គោលនយោបាយ​អភិវឌ្ឍ​ន៍​ឧស្សាហកម្ម ២០១៥-២០២៥ (២) ក្របខ័ណ្ឌ​ច្បាប់ និង​បទបញ្ញត្តិ​សម្រាប់​សម្របសម្រួល ដែល​គាំទ្រ និង​ការពារ​ការ​វិនិយោគ​បរទេស (៣) ប្រែក្លាយ​ពលកម្ម​ពី​ពលកម្ម​មិនមាន​ជំនាញ មកជា​ពលកម្ម​មាន​ជំនាញ​។

កម្ពុជា​បាន​ចូលរួម​យ៉ាងសកម្ម​ក្នុងការ​រៀបចំ​គោលនយោបាយ​វិនិយោគ​ក្របខ័ណ្ឌ​សកលលោក និង​តំបន់​ដូចជា ASEAN Comprehensive Investment Agreement (ACIA), ជំពូក​ស្ដីពី​វិនិយោគ​នៅក្នុង ASEAN Free Trade Agreement និង RCEP​។

តាមរយៈ​បទពិសោធន៍ និង​មេរៀន​ថ្មីៗ​ដែល​ទទួលបាន កម្ពុជា​បានរៀបចំ​គោលនយោបាយ​លើកទឹកចិត្ត ដែលមាន​ភាព​ប្រទាក់ក្រឡា និង​បើកទូលាយ ជាពិសេស​តាមរយៈ​ការរៀបចំ​តំបន់​សេដ្ឋកិច្ច​ពិសេស ដើម្បី​ទាក់ទាញ​វិនិយោគិន​។



ធ្វើ​សមាហរណកម្ម​ក្នុង​ខ្សែសង្វាក់​ផលិតកម្ម​ក្នុង​តំបន់ ដោយ​ផ្ដោតលើ​ការបង្កើត​រោងចក្រ និង​ទទួលបាន​ផលប្រយោជន៍​ពី​មូលដ្ឋាន​ផលិតកម្ម​ធំៗ​ក្នុង​តំបន់ សំដៅ​ការអភិវឌ្ឍ​សមត្ថភាព​តាមរយៈ​ការផ្ទេរ​ចំណេះដឹង និង​បច្ចេកវិទ្យា​។

កម្ពុជា​បានរៀបចំ​ផែនការ​ជាក់លាក់​ក្នុងការ​សម្រេចបាន​នូវ​គោលដៅ SDGs របស់ខ្លួន ដោយ​ផ្ដោតលើ​ការបណ្ដុះបណ្ដាល​ធនធាន​មនុស្ស ពិពិធ​កម្ម​សេដ្ឋកិច្ច ជំរុញ​ការអភិវឌ្ឍ​វិស័យ​ឯកជន និង​ទីផ្សារការងារ និង​ការអភិវឌ្ឍ​ប្រកបដោយ​បរិ​យា​ប័ន្ន និង​ចីរភាព​។​ វេទិកា​តុមូល​ថ្នាក់​រដ្ឋមន្ត្រី​នេះ បាន​អញ្ជើញ​ចូលរួម​ដោយ​រដ្ឋមន្ត្រី​-​អនុរដ្ឋមន្ត្រី​មកពី​ប្រទេស​ចំនួន​១៦៕

Source: Kampuchea Thmey Daily