កំពត ៖ ក្រុមហ៊ុនវារីអគ្គិសនីកំចាយ បើកទ្វារទឹកយ៉ាងគំហុក រួមទាំងទឹកភ្លៀងផង បណ្តាលឲ្យលិចផ្ទះប្រជាពលរដ្ឋ ស្រែចម្ការ បន្លែបង្កា នៅឃុំចំនួនបី ក្នុងស្រុកទឹកឈូ ខេត្តកំពត កាលពីព្រឹកថ្ងៃទី១៦ ខែកញ្ញា ឆ្នាំ២០១៥។
ប្រភពពីប្រជាពលរដ្ឋបានឲ្យដឹងថា នៅយប់ថ្ងៃទី១៥ នីង ១៦ភ្លៀងបានធ្លាក់យ៉ាងជង្ហុក ពេញមួយយប់ បណ្តាលអោយទឹកភ្លៀងជាច្រើនហូរធ្លាក់ខ្លាំងពីលើភ្នំកំចាយ មកក្នុងអាងស្តុកទឹកវារីអគ្គិសនីកំចាយ រហូតមានកំពស់ដល់១៥៥ម៉ែត្រ ទៅ ១៥៦ ម៉ែត្រ ហួសពីបរិមាណក្នុងស្តុបទឹក ទើបក្រុមហ៊ុនបានបើកទ្វារទឹក វារីអគ្គិសនីកំចាយ ទាំងអស់មានចំនួនប្រាំ នៅពាក់កណ្តាលអធ្រាត្រឈានចូលថ្ងៃទី១៦ គួបផ្សំនឹងទឹកជ្រោះតាដាច័ន្ទ នៅជ្រលងភ្នំបូកគោ ហូរធ្លាក់មកក្នុងទឹកឈូយ៉ាងខ្លាំងផងនោះ ទើបបណ្តាលឲ្យលិចផ្ទះ ស្រែចម្ការ បន្លែបង្ការ នៅឃុំចំនួនបី ក្នុងស្រុកទឹកឈូនេះ។
បើតាមមន្ត្រីជំនាញបានឲ្យដឹងថា ទឹកភ្លៀងបានហូរចាក់ចូលអាងស្ដុកប្រមាណ៦០០ទៅ៧០០លានម៉ែត្រគូប ទើបក្រុមមន្ត្រីជំនាញបានបើកទ្វារទឹកចំនួន៣ដើម្បីរំដោះទឹកចេញពីអាង។ ប៉ុន្តែនៅមិនអាចទប់នឹងកម្លាំងទឹកបានក៏ត្រូវបើកទ្វារទឹកទាំងអស់៥ដើម្បីបង្ហូរទឹកទម្លាក់ចុះមកខាងក្រោម រហូតដល់ម៉ោង១២,៣០ថ្ងៃត្រង់ ទើបមន្ត្រីជំនាញបិទទ្វារទឹក២ ទុកតែទ្វារទឹក៣នៅបើកចំហដដែល។
លោកខូយ ឃុនហ៊ួរ អភិបាលខេត្តកំពតបានឲ្យដឹងនៅរសៀលថ្ងៃទី១៦ កញ្ញាថា ការបើកទ្វារទឹកយ៉ាងគំហុក របស់ក្រុមហ៊ុនវារីអគ្គិសនីកំចាយ រួមទាំងទឹកភ្លៀងផង ធ្វើឲ្យប៉ះពាល់ ឃុំចំនួន៣ គឺឃុំម៉ាក់ប្រាង ឃុំកំពង់គ្រែង និងឃុំព្រៃឃ្មុំ ស្មើនឹង៩ភូមិ និងមានប្រជាពលរដ្ឋចំនួន១៥១៧គ្រួសារ មានមនុស្ស៧.៦៨៦ នាក់ ដោយមិនអោយប៉ះពាល់ដល់អាយុជីវិតរបស់ប្រជាពលរដ្ឋទេ ពីព្រោះចរន្តទឹកហូរយឺត។
លោកបានបញ្ជាក់ទៀតថា នៅពេលនេះទឹកមានការស្រកចុះជាបណ្តើរៗហើយ តែទោះជាយ៉ាងណាលោកក៏បានបញ្ជាអោយ កម្លាំងសមត្ថកិច្ច សហការជាមួយអាជ្ញាធរពាក់ព័ទ្ធ អោយធ្វើសកម្មភាព ជួយសង្គ្រោះដល់ប្រជាពលរដ្ឋ អោយទាន់ពេលវេលាបើសិនជាមានបញ្ហាកើតទ្បើង។
ប្រជាពលរដ្ឋខាងលើ បានសំណូមពរឲ្យមន្ត្រីជំនាញ អាជ្ញាធរ ខេត្ត និងមន្ត្រីពាក់ព័ន្ធពិនិត្យមើលឲ្យបានដិតដល់ ចំពោះការបើកទ្វារទឹក វារីអគ្គិសនីកំចាយ ធ្វើយ៉ាងការបើកទឹក ត្រូវមានបរិមាណសមស្រប ដើម្បីជៀសវាង កុំឲ្យមានការលិចលង់ដល់ផ្ទះប្រជាពលរដ្ឋ និងខូចខាតទ្រព្យសម្បតិ្ត ជាពិសេស ប៉ះពាល់ដល់ជីវិតមនុស្ស សត្វព្វាហនៈ។
គួរបញ្ជាក់ផងដែរថា ខេត្តកំពតនៅពេលមិនទាន់មានទំនប់វារីអគ្គិសនីកំចាយខេត្តកំពតតែងតែជួបនៅគ្រោះទឹកជំនន់ជារៀងរាល់ឆ្នាំ។ លុះមកដល់ឆ្នាំ២០០៩ វារីអគ្គិសនីកំចាយចាប់ផ្ដើមដំណើរការដោយមានទំនប់ស្តុបទឹកទើបជៀសផុតពីគ្រោះទឹកជំនន់រយៈពេល៦ឆ្នាំទើបតែថ្ងៃទី១៦ ខែកញ្ញា ឆ្នាំ២០១៥ បង្កទ្បើងដោយឥទ្ធិពលព្យុះភ្លៀងខ្លាំងបណ្តាលឲ្យឃុំចំនួន៣នៅក្នុងស្រុកទឹកឈូត្រូវជន់លិចតែប៉ុណ្ណោះ៕
ក្រុមហ៊ុនវារីអគ្គិសនីកំចាយ បើកទ្វារទឹកយ៉ាងគំហុក រួមទាំងទឹកភ្លៀងផង បណ្តាលឲ្យឃុំ៣នៅក្នុងស្រុកទឹកឈូត្រូវជន់លិច
0 Comments