បន្ទាយមានជ័យ ៖ នៅល្ងាចថ្ងៃទី១៨ ខៃកញ្ញា ឆ្នាំ២០១៥ នៅសាលាសង្កាត់ប៉ោយប៉ែតស្ថិតនៅក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានការរៀបចំធ្វើពិធីប្រកាសលោកអាំង គីហេងចូលកាន់មុខតំណែងជាចៅសង្កាត់ប៉ោយប៉ែតជំនួសលោកនុតលី ចៅសង្កាត់ចាស់ ដែលលាលែងចេញពីមុខតំណែង។ ចំណែកលោកវ៉ា ជឹមណារ៉េត ជំនួសលោកអាំងគីហេងទៅជាជំទប់ទី១ លោកយឹមនៅ ជំនួសលោកវ៉ាជឹមណារ៉េត ទៅជាក្រុមប្រឹក្សាសង្កាត់ប៉ោយប៉ែត។
ពិធីនេះមានការចូលរួមលោកគោស៊ុំសារឿត អភិបាលខេត្តបន្ទាយមានជ័យ លោកង៉ោម៉េងជ្រួញ អភិបាលក្រុងប៉ោយប៉ែត និងមន្ត្រីពាក់ព័ន្ធជាច្រើននាក់បានចូលក្នុងពិធីប្រកាសនេះផងដែរ។ លោកណងវុទ្ធីនាយកទីចាត់ការគ្រប់គ្រងធនធានមនុស្សបានឡើងអានប្រកាសលេខ៨ ១ ៧ ៨ ប្រក ប្រកាសការប្តូរនិងទទួលស្គាល់លោកអាំងគីហេងជាចៅសង្កាត់បោយប៉ែតជំនួសលោកនុតលីចៅសង្កាត់ចាស់ដែលបានដាក់ពាក្យលាលែងចេញពីតំណែងចាប់ពីថ្ងៃប្រកាសនេះតទៅ។ ក្រោយពីប្រកាសតែងតាំងរួចលោកអាំងគីហេងបានធ្វើការប្តេជ្ញាចិត្តថានឹងគោរពឲ្យបានល្អនូវការងារចាត់តាំងរបស់អង្គភាព និងរឹតចំណងសាមគ្គីភាពផ្ទៃក្នុងឲ្យបានល្អដោយជួយរែកពុនការងារគ្នាទៅវិញទៅមកខិតខំបំពេញការងារតាមតួនាទីដែលបានដាក់ចុះពីថ្នាក់លើឲ្យបានទទួលជោគជ័យ។
លោកគោស៊ុំ សារឿត បានមានប្រសាសន៍ក្នុងពិធីចូលកាន់មុខតំណែងជាចៅសង្កាត់ប៉ោយប៉ែតថា លោកបានបង្ហាញឲ្យឃើញនូវកាយវិការយកចិត្តទុកដាក់របស់លោកចៅសង្កាត់គ្រប់ជំនាន់ ដែលបានខិតខំប្រឹងប្រែងអនុវត្តការងារប្រកបដោយស្មារតីទទួលខុសត្រូវខ្ពស់ និងមានឆន្ទៈមោះមុតអនុវត្តន៍តាមការចង្អុលបង្ហាញទិសដៅ និងបទបញ្ជារបស់ថ្នាក់លើដាក់ចុះមក។ លោកគោស៊ុំសារឿត បាននិយាយបន្តថា ពិធីប្រកាសតែងតាំងដ៏មានអត្ថន័យនេះជាសារមួយសម្រាប់ដាស់តឿន និងរំលឹកស្មារតីចំពោះមន្ត្រីរាជការផ្សេងៗដែមិនទាន់ទទួលបាននូវការតែងតាំងដើម្បីឲ្យខិតខំពង្រឹងសមត្ថភាព និងកែប្រែចំណុចអវិជ្ជមានកន្លងមកដើម្បីងាយមករកផ្លូវវិជ្ជមានឡើងវិញ៕
លោកអាំង គីហេង ត្រូវបានប្រកាសចូលកាន់មុខតំណែងជាចៅសង្កាត់ប៉ោយប៉ែត
0 Comments