ស្ទឹងត្រែង ៖ ជនជាតិឡាវចំនួន២នាក់ ម្នាក់មានដើមកំណើតជាខ្មែរពាក់ព័ន្ធក្នុងករណីជួញដូរគ្រឿងញៀនឆ្លងដែន ត្រូវបានកម្លាំងអាវុធហត្ថខេត្តដឹកនាំផ្ទាល់ដោយលោកដួង វិចិត្រ ប្រធានមន្ទីរព័ត៌មាន និងសន្តិសុខអាវុធហត្ថខេត្តស្ថិតក្រោមការបញ្ជាពីលោកឧត្តមសេនីយ៍ត្រីអៀង វ៉ានឌីបានបើកប្រតិបត្តិការឃាត់ខ្លួនជនសង្ស័យជនជាតិឡាវចំនួន២នាក់រួមជាមួយវត្ថុតាងថ្នាំញៀន(WY)១១កញ្ចប់បញ្ជូនមកទីបញ្ជាការកងរាជអាវុធហត្ថខេត្ត។
ជនសង្ស័យជនជាតិឡាវទាំង២នាក់ ត្រូវបានកម្លាំងអាវុធហត្ថខេត្តធ្វើការឃាត់ខ្លួនកាលពីវេលាម៉ោង១២និង៣០នាទីថ្ងៃទី១៧ ខែកញ្ញា ឆ្នាំ២០១៥ត្រង់ចំណុចភូមិកំពង់ស្រឡៅ ឃុំកំពង់ស្រឡៅ ស្រុកឆែប ខេត្តព្រះវិហារ និងបានបញ្ជូនមកដល់ទីបញ្ជាការខេត្តនៅម៉ោង៣និង៣០នាទីល្ងាច។
លោកវរសេនីយ៍ទោដួង វិចិត្រប្រធានមន្ទីរព័ត៌មាននិងសន្តិសុខអាវុធហត្ថខេត្តបានឲ្យដឹងថាជនសង្ស័យជនជាតិឡាវទាំង២នាក់មាន១ឈ្មោះខន ប៉ុល ភេទប្រុស អាយុ៣៧ឆ្នាំមានស្រុកកំណើតនៅភូមិតាសែ ឃុំរណសិរ្ស ស្រុកសង្គមថ្មី ខេត្តព្រះវិហារបច្ចុប្បន្នមានប្រពន្ធនៅប្រទេសឡាវ និង២ឈ្មោះសំ ប៊ូន ភេទប្រុស អាយុ៣៣ឆ្នាំ អ្នកទាំង២បច្ចុប្បន្នរស់នៅភូមិណាទា ស្រុកមឿងមុន ខេត្តចំប៉ាសាក់ ប្រទេសឡាវ។
លោកវរសេនីយ៍ទោបានបន្តទៀតថា ជនសង្ស័យជនជាតិឡាវទាំង២នាក់ ត្រូវបានកម្លាំងអាវុធហត្ថឃាត់ខ្លួន ខណៈរូបគេទាំង២នាក់បាននាំគ្រឿងញៀន តាមទូកចូលមកទឹកដីកម្ពុជា ត្រង់ចំណុចខាងលើក៏ត្រូវបានសមត្ថកិច្ចធ្វើការឃាត់ខ្លួនតែម្តង ព្រមទាំងបានធ្វើការដកហូតវត្ថុតាងគ្រឿងញៀនប្រភេទមេតំហ្វេតាមីន(WY)ចំនួន១១កញ្ចប់ស្មើនឹង២១៩០គ្រាប់ និងបាននាំខ្លួនមកកាន់ទីបញ្ជាការអាវុធហត្ថខេត្តធ្វើការសួរនាំ។
ជនសង្ស័យបានឆ្លើយសារភាពចំពោះមុខសមត្ថកិច្ចថា ខ្លួនទាំង២នាក់បានចាញ់បោកជនជាតិឡាវម្នាក់ដែលបាននាំយកកញ្ចប់នោះមកឲ្យគេ និងទទួលបានប្រាក់១កញ្ចប់ចំនួនប្រាំពាន់គិប ហើយពួកគេមិនដឹងថា ក្នុងកញ្ចប់នោះមានស្អីទេ គ្រាន់តែមកដល់ចំណុចខាងលើក៏ត្រូវបានសមត្ថកិច្ចឃាត់ខ្លួនតែម្តង។
បច្ចុប្បន្នជនសង្ស័យជាជនជាតិឡាវទាំង២នាក់រួមនឹងវត្ថុតាងថ្នាំញៀន កំពុងស្ថិតក្រោមការសាកសួរពីសមត្ថកិច្ចជំនាញ និងធ្វើការរៀបចំសំណុំរឿងបញ្ជូនទៅកាន់តុលាការព្រឹកថ្ងៃទី១៨ ខែកញ្ញានេះដើម្បីចាត់ការបន្តតាមនីតិវិធី៕
ឃាត់ខ្លួនជនជាតិឡាវ២នាក់ជាមួយគ្រឿងញៀនជាង២ពាន់គ្រាប់
0 Comments