កំពង់ឆ្នាំង ៖ ដើម្បីរឹតបន្តឹងការអនុវត្តន៍ច្បាប់ចរាចរណ៍ផ្លូវគោក កាត់បន្ថយហានិភ័យក្រោមកម្រិតអប្បបរមា ដែលបង្កឡើងដោយអ្នកបើកបរមិនគោរពច្បាប់ចរាចរណ៍ នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការនគរបាលជាតិ បានចុះមករឹតបន្តឹងការអនុវត្តន៍ច្បាប់ចរាចរណ៍នៅតាមផ្លូវជាតិនៅក្នុងភូមិសាស្ត្រខេត្តកំពង់ឆ្នាំងរយៈពេល៦ខែ ដែលចាប់ពីខែកញ្ញា ឆ្នាំ២០១៥នេះតទៅ ដោយសហការជាមួយកងកម្លាំងនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង។
លោកឧត្ដមសេនីយ៍ទោ ទី ឡុង អនុប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិកំពុងដឹកនាំកម្លាំងនគរបាលចរាចរណ៍ក្រសួងប្រតិបត្តិការរឹតបន្តឹងការអនុវត្តន៍ច្បាប់ចរាចរណ៍នៅលើផ្លូវជាតិលេខ៥ ចំណុចប៉ុស្តិ៍រដ្ឋបាលទឹកហូត ក្នុងឃុំទឹកហូតស្រុករលាប្អៀរ នៅព្រឹកថ្ងៃទី១៨ ខែកញ្ញា ឆ្នាំ២០១៥ បាននិយាយឲ្យដឹងថា ក្រោមការដឹកនាំដោយគតិបណ្ឌិតរបស់ប្រមុខរាជរដ្ឋាភិបាល ក៏ដូចជាក្រសួងមហាផ្ទៃ នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈអគ្គស្នងការនគរបាលជាតិបានចាត់តាំងកម្លាំងនគរបាលក្រសួងចំនួន២០នាក់ សហការជាមួយនគរបាលចរាចរណ៍ខេត្ត១០នាក់ ចុះធ្វើការចល័តក្នុងភូមិសាស្ត្រខេត្តកំពង់ឆ្នាំង ដើម្បីរឹតបន្តឹងការអនុវត្តន៍ច្បាប់ចរាចរណ៍ផ្លូវគោកឲ្យមានប្រសិទ្ធភាព សំដៅកាត់បន្ថយហានិភ័យគ្រោះថ្នាក់ដែលកើតឡើងដោយអ្នកមិនគោរពច្បាប់ចរាចរណ៍ បើកបរលើសល្បឿនកំណត់ បើកបរក្នុងស្ថានភាពស្រវឹង និងបើកបរមិនគោរពសិទ្ធអាទិភាពជាដើម។
សមត្ថកិច្ចសូមអំពាវនាវផងដែរដល់មន្ត្រីរាជការ កងកម្លាំងប្រដាប់អាវុធទាំងអស់ និងប្រជាពលរដ្ឋយើង សូមចូលរួមគោរពច្បាប់ឲ្យបានទាំងអស់គ្នា ដើម្បីឲ្យការបើកបរ និងការធ្វើដំណើរប្រកបដោយសុវត្ថិភាព និងបានទៅដល់គោលដៅកំណត់ដោយសុខសន្តិភាពជៀសផុតពីគ្រោះថ្នាក់ទាំងឡាយ។
នៅក្នុងកិច្ចប្រតិបត្តិការរបស់នគរបាលចរាចរណ៍ក្រសួង និងនគរបាលចរាចរណ៍ខេត្ត គេសង្កេតឃើញសមត្ថកិច្ចធ្វើការផាកពិន័យរថយន្តទួរីសដែលបាន ត.កន្ទុយមកក្រោយខុសលក្ខណៈបច្ចេកទេស បានដោះដកកន្ទុយចេញ ,បកប្លាស្ទិកខ្មៅដែលបិទនៅលើកញ្ចក់រថយន្ត ,ពិន័យអ្នកគ្មានប័ណ្ណបើកបរ , រថយន្តគ្មានប័ណ្ណសម្គាល់យានយន្ត ,រថយន្តគ្មានវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត , រថយន្តគ្មានលិខិតធ្វើអាជីវកម្ម,អ្នកជិះរថយន្តមិនពាក់ខ្សែក្រវាត់,អ្នកបើកល្បឿនហួសកំណត់,។ល។
ទន្ទឹមនឹងការរឹតបន្តឹងច្បាប់ចរាចរណ៍ខាងលើនេះ សមត្ថកិច្ចបានចែកខិត្តប័ណ្ណផ្សព្វផ្សាយច្បាប់ចរាចរណ៍ដល់អ្នកបើកបរ និងអ្នកធ្វើដំណើរទាំងអស់ ដែលយោងតាមអនុក្រឹត្យលេខ៨៥ អ ន ក្រ បក ចុះថ្ងៃទី០៨ ខែកក្កដា ឆ្នាំ២០១៥ ចាប់ពីថ្ងៃទី០១ ខែមករា ឆ្នាំ២០១៦តទៅ សមត្ថកិច្ចនឹងត្រូវធ្វើការពិន័យអន្តរការណ៍តាមច្បាប់ចរាចរណ៍ផ្លូវគោកថ្មី ដោយត្រូវពិន័យចំពោះអំពើល្មើស និងច្បាប់ស្ដីពីចរាចរណ៍ផ្លូវគោក ដោយកម្រិតធ្វើការផាកពិន័យត្រូវគុណនឹង៥ដង ដែលករណីនេះប្រជាពលរដ្ឋទាំងអស់ត្រូវតែយល់ដឹង និងត្រូវគោរពច្បាប់ចរាចរណ៍ផ្លូវគោកឲ្យបានទាំងអស់គ្នា៕
ការអនុវត្តន៍ច្បាប់ចរាចរណ៍ផ្លូវគោកនៅលើផ្លូវជាតិក្នុងខេត្តកំពង់ឆ្នាំងរយៈពេល៦ខែ
0 Comments