ភ្នំពេញ ៖ ក្រោយពីបណ្ដែតខ្លួនចូលប្រឡូកក្នុងអាជីពសិល្បៈរហូតមានកេរ្តិ៍ឈ្មោះល្បីល្បាញតាមរយៈរូបសម្រស់ និងការគ្រងតំណែងសម្តែងជាតួឯកពូកកែខាងសម្រក់ទឹកភ្នែកមិនចេះរីងស្ងួតស្ទើរគ្រប់សាច់រឿងកាលពីអំឡុង២ឆ្នាំមុនមកនោះ តារាសម្តែងកញ្ញា នី មុន្នីនាថ ពេលនេះហាក់កំពុងតែបាត់មុខស្ងាត់ពីការសម្តែងមិនសូវលេចមុខច្រើនដូចគ្រាចូលសិល្បៈដំបូងឡើយ។
គេធ្លាប់ចាំបានថា តារាសម្ដែងកញ្ញា នី មុន្នីនាថ កាលពីប៉ុន្មានឆ្នាំមុននេះមិនថាឡើយយុវវ័យទេ សូម្បីតែចាស់ៗក៏ស្គាល់គាំទ្រនាងយ៉ាងច្រើនលើសលប់ផងដែរ តាមរយៈទេពកោសល្យ និងសមត្ថភាពតួសម្តែងខ្សែភាពយន្ត ព្រមទាំងឈុតកាយវិការខារ៉ាអូខេជាដើម…។ មិនតែប៉ុណ្ណោះ មុន្នីនាថ តែងទទួលបានការកោតសរសើរពីទស្សនិកជនអ្នកគាំទ្រចំពោះអត្តចរិតថាជាតារាគំរូល្អសម្រាប់អ្នកដទៃ ព្រោះរាល់ពេលជួបនៅត្រង់ណាម្តងៗ នាងតែងបញ្ចេញភាពរួសរាយរាក់ទាក់មានទឹកមុខគួរឲ្យស្រលាញ់ជានិច្ច។
ដោយឡែកថ្មីៗនេះ ត្រូវបានមជ្ឈដ្ឋានពីមហាជនអ្នកគាំទ្របានលើកឡើងស្រដៀងគ្នាថា មួយរយៈពេលចុងក្រោយនេះ ពោលគឺចាប់តាំងពីដើមឆ្នាំ២០១៥ មកម្ល៉េះឃើញថាតារាសម្តែងកញ្ញា នី មុន្នីនាថ ហាក់ដូចជាពុំសូវលេចមុខបង្ហាញវត្តមានតួសម្ដែងនៅខ្សែរឿងច្រើនដូចពេលមុនៗឡើយ។ បើនិយាយឲ្យចំ ចាប់តាំងពីនាងព្យាយាមបិទបាំងការបែកធ្លាយរឿងបែកបាក់ស្នេហ៍ជាមួយគូសង្សាររស់នៅក្រៅស្រុកមកនោះ។
ប្រភពខាងលើបានបន្តថា អ្វីដែលសំខាន់ជាងនេះទៅទៀតនោះគឺផ្ដោតលើការប្រកួតប្រជែងព្រោះបច្ចុប្បន្ននេះកំពុងតែមានតារាស្រីវ័យក្មេងស្រស់ស្អាត និងមានសមត្ថភាពជាច្រើនបានដណ្ដើមប្រណាំងទាញយកចំណែកទីផ្សារសម្តែងស្ទើរអស់មួយភាពធំទៅហើយ។ បើនៅតែបែបនេះទៀតច្បាស់ជាធ្វើឲ្យអាជីពសិល្បៈរបស់តារាស្រី នី មុន្នីនាថ ត្រូវបាត់បង់ទាំងស្រុងក្នុងពេលដ៏ខ្លីខាងមុខនេះជាមិនខាន បើសិននាងនៅតែបន្តធ្វើព្រងើយបែបនេះ។
តារាសម្ដែងកញ្ញា នី មុន្នីនាថ នៅរសៀលថ្ងៃទី០៣ ខែកញ្ញា ឆ្នាំ២០១៥នេះ កម្ពុជាថ្មីនៅមិនទាន់អាចសុំការបកស្រាយជុំវិញរឿងរ៉ាវនេះបានទេ។ កម្ពុជាថ្មី នឹងព្យាយាមភ្ជាប់ទំនាក់ទំនងតាមទូរស័ព្ទទៅកាន់កញ្ញា នី មុន្នីនាថ នៅពេលក្រោយដើម្បីសួរនាំបន្ថែមរឿងនេះ៕
នី មុន្នីនាថ បង្ហាញសញ្ញាធ្លាក់កូដពីទីផ្សារសិល្បៈ
0 Comments