កណ្ដាល ៖ បុរស២នាក់ ត្រូវបានសមត្ថកិច្ចស្រុកស្អាងធ្វើការឃាត់ខ្លួន ក្រោយពីត្រួតពិនិត្យរកឃើញសារធាតុញៀនចំនួន១កញ្ចប់ នៅក្នុងកាតាបរបស់ពួកគេនោះ។
ហេតុការណ៍នេះបានកើតឡើងកាលពីវេលាម៉ោង០០និង១០នាទីឈានចូលថ្ងៃទី០៤ ខែកញ្ញា ឆ្នាំ២០១៥ នៅចំណុចផ្លូវជាតិលេខ១១០ ស្ថិតភូមិខ្ពបលើ ឃុំខ្ពប ស្រុកស្អាង ខេត្តកណ្ដាល។
ជនសង្ស័យទាំងពីរនាក់នោះមានទី១- ឈ្មោះ ថា ផល្លា ភេទប្រុស អាយុ ២៤ឆ្នាំជនជាតិខ្មែរ មុខរបរកម្មករសំណង់។ ទី២- ឈ្មោះ សុខ សំ ភេទប្រុស អាយុ ២៨ឆ្នាំជនជាតិខ្មែរ មុខរបរអ្នករត់តុនៅភ្នំពេញ ស្នាក់នៅភ្នំពេញ។ អ្នកទាំង២មានទីលំនៅភូមិក្បាលកោះ ឃុំឈើខ្មៅ ស្រុកកោះធំ ខេត្តកណ្ដាល។
ប្រភពព័ត៌មានពីសមត្ថកិច្ចស្រុកស្អាងបានឲ្យដឹងថា នៅក្នុងការឃាត់ខ្លួននោះ សមត្ថកិច្ចបានដកហូត សារធាតុញៀនចំនួន១កញ្ចប់ធំ, កាតាបចំនួន១ , ម៉ូតូចំនួន១គ្រឿង ម៉ាកស្មាស់ ពាក់ស្លាកលេខ កណ្ដាល1L.3312 ពណ៌ខ្មៅ។
ប្រភពដដែលបន្តថា នៅថ្ងៃកើតហេតុ កម្លាំងប៉ុស្តិ៍នគរបាលរដ្ឋបាលខ្ពបសហការជាមួយកម្លាំងអន្តរាគមន៍ស្រុកស្អាងបានធ្វើការល្បាត នៅចំណុចខាងលើ ហើយធ្វើការត្រួតពិនិត្យរកឃើញសារធាតុញៀនចំនួន១កញ្ចប់ នៅក្នុងកាតាប សមត្ថកិច្ចក៏ឃាត់ខ្លួនអ្នកទាំងពីរយកមកប៉ុស្តិ៍នគរបាលរដ្ឋបាលខ្ពប ដើម្បីធ្វើការសាកសួរ និងកសាងសំណុំរឿងតាមនីតិវិធី៕
ឃាត់ខ្លួនបុរស២នាក់ ករណីរក្សាទុកនូវសារធាតុញៀន
0 Comments