ក្រុមរញ្ជួយដីវិទូសហរដ្ឋអាមេរិក (USGS) បាននិយាយថា ការរញ្ជួយដីដ៏មានឥទ្ធិពលកម្រិត ៦.៦ រ៉ិចទ័បានវាយប្រហារតំបន់ប៉ាពួភាគខាងកើតប្រទេសឥណ្ឌូណេស៊ីនៅថ្ងៃសុក្រដែលបណ្ដាលឲ្យមនុស្សភ័យស្លន់ស្លោរត់ចេញពីផ្ទះរបស់ពួកគេ។
ទោះបីជាយ៉ាងណាក៏ដោយគ្មានការព្រមានពីរលកយក្សស៊ូណាមិត្រូវបានចេញឡើយហើយគ្មានរបាយការណ៍នៃមនុស្សស្លាប់ ឬរបួស និងការខូចខាតនោះទេបន្ទាប់ពីការរញ្ជួយដីបាតសមុទ្រនេះបានកើតឡើងនៅប្រហែលម៉ោង១រំលងអធ្រាត្រដែលមានចម្ងាយប្រហែល៣០គីឡូម៉ែត្រពីទីក្រុងឆ្នេរសមុទ្រ Sorong ក្នុងខេត្តប៉ាពួខាងលិច។
ការរញ្ជួយដីនេះបានបណ្ដាលឲ្យមានការកាត់ផ្ដាច់អគ្គិសនីហើយប្រជាពលរដ្ឋបាននាំគ្នាមកស្នាក់នៅខាងក្រៅដោយភ័យខ្លាចចំពោះការវិលត្រឡប់ទៅផ្ទះ។ អ្នកកាសែតរបស់ AFP ម្នាក់បាននិយាយថា មិនមានសញ្ញាណាមួយនៃអគារខូចខាត ឬអ្នករងរបួសឡើយ។
លោក Mochammad Riyadi ដែលជាមន្ត្រីជាន់ខ្ពស់មកពីទីភ្នាក់ងារឧតុនិយម អាកាសធាតុវិទ្យា និងរូបសាស្ត្រផែនដីរបស់ឥណ្ឌូណេស៊ីបាននិយាយថា មកទល់ពេលនេះមិនមានរបាយការណ៍ណាមួយនៃការខូចខាត ឬអ្នករងរបួស និងស្លាប់ត្រូវបានគេរាយកាណ៍នោះទេ។
ជាដំបូងឡើយ USGS បានដាក់កម្រិតនៃការរញ្ជួយដីនេះមានកម្រិត៦.៩រ៉ិចទ័រ ប៉ុន្តែបន្ទាប់មកបានកែសម្រួលវាចុះមកវិញ។ មជ្ឈមណ្ឌលព្រមានស៊ូណាមិប៉ាស៊ីហ្វិកបាននិយាយថា មិនមានការគម្រាមកំហែងណាមួយនៃរលកយក្សស៊ូណាមិនោះទេ។
គួរបញ្ជាក់ថា ប្រទេសឥណ្ឌូណេស៊ីគឺស្ថិតនៅលើខ្សែបន្ទាត់តំបន់ប៉ាស៊ីហ្វិក “Ring of Fire” ដែលជាកន្លែងសម្បូរសកម្មភាពរញ្ជួយដីនិងភ្នំភ្លើងផ្ទុះជាញឹកញាប់។
គួររំលឹកថា ការរញ្ជួយដីនៅបាតសមុទ្រដ៏ធំសម្បើមមួយដែលបង្កឲ្យមានរលកយក្សស៊ូណាមិកាលពីឆ្នាំ២០០៤បានវាយប្រហារខេត្តAcehនៅភាគខាងលិចកោះស៊ូម៉ាត្រាដោយបានសម្លាប់មនុស្សជាង ១៧០ ០០០ នាក់នៅក្នុងប្រទេសឥណ្ឌូណេស៊ី និងមនុស្សរាប់ម៉ឺននាក់ទៀតនៅក្នុងបណ្ដាប្រទេសផ្សេងទៀតដែលជាប់នឹងឆ្នេរសមុទ្រនៅលើមហាសមុទ្រឥណ្ឌា៕
AFP
រញ្ជួយដីកម្រិត៦.៦រ៉ិចទ័បង្កការភ័យស្លន់ស្លោក្នុងតំបន់ប៉ាពួប្រទេសឥណ្ឌូណេស៊ី
0 Comments