ខ្សែប្រយុទ្ធរបស់ក្លិបយក្សអេស្ប៉ាញ Barcelonaកីឡាករ Neymarបានអះអាងថា គាត់ធ្លាប់ចរចាជាមួយក្លិបបិសាចក្រហម Man Utdជុំវិញការផ្ទេរដ៏មានសក្តានុពលមួយទៅកាន់ទឹកដី Old Traffordប៉ុន្តែក្លិបនៅក្របខណ្ឌកំពូលអង់គ្លេសមួយនេះ មិនបានធ្វើការផ្តល់ជូនដ៏ជាក់លាក់ណាមួយនោះទេ។
គួរឲ្យដឹងថា ការផ្ទេរដែលអាចទៅរួចមួយ ទៅកាន់ទឹកដី Old Traffordត្រូវបានគេរាយការណ៍ឲ្យដឹងកាលពីខែសីហាកន្លងទៅ មុនពេលដែលទីផ្សារកីឡាករបិទទ្វារ ក្នុងនោះអ្នកចាត់ការរបស់ក្លិប Barcelonaគឺលោក Luis Enrique បដិសេធមិនព្រមច្រានចោលការព្យាករទុក នៅក្នុងសន្និសីទកាសែត បន្ទាប់ពីទាត់ឈ្នះក្រុម Athletic Bilbao។
ឥឡូវ ខ្សែប្រយុទ្ធស្ថិតនៅក្នុងក្រុមជម្រើសជាតិប្រេស៊ីលម្នាក់នេះ បានចង្អុលបង្ហាញថា កិច្ចពិភាក្សាររវាងក្រុមតំណាងរបស់គាត់ និងក្លិប Man Utdពិតជាកើតមានឡើងមែន ប៉ុន្តែការផ្តល់ជូនរបស់ពួកគេគ្មានមូលដ្ឋានទាល់តែសោះ។
កីឡាករ Neymarបាននិយាយប្រាប់កាសែត ESPN ថាពេលដែលមានការសួរនាំពីការផ្ទេរទៅកាន់ក្លិប Man Utd យើងក៏បានចូលរួមចរចាភ្លាម ប៉ុន្តែគ្មានជាក់លាក់ទាល់តែសោះ។ លោកបានដឹងឮពីចំណាប់អារម្មណ៍ តែមិនមានការផ្តល់ជូនច្បាស់លាស់តែសោះ។
សូមបញ្ជាក់ថា ក្លិបរបស់អ្នកចាត់ការ Louis van Gaal បានប្រឡូកចូលក្នុងទីផ្សារកីឡាករ ដើម្បីស្វែងរកខ្សែប្រយុទ្ធម្នាក់ ពេលដែលទីផ្សារជិតបិទទ្វារទៅវិញ ហើយនៅទីបញ្ចប់ពួកគេក៏សម្រេចចិត្តទិញយកខ្សែប្រយុទ្ធសញ្ជាតិបារាំង Anthony Martial ក្នុងតម្លៃឯតទគ្គកម្មរបស់ក្លិប ៥៨លានផោនពីក្លិប Monaco៕
កីឡាករNeymar ៖ ខ្ញុំធ្លាប់ចរចារឿងផ្ទេរទៅកាន់ក្លិបMan Utd
0 Comments