បាត់ដំបង ៖ នៅថ្ងៃទី២២ ខែកញ្ញា ឆ្នាំ២០១៥វេលាម៉ោង៤និង០០នាទីល្ងាច នៅចំណុចផ្ទះលេខ១៤១ ក្រុមទី៨ ភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង សមត្ថកិច្ចបានបង្កើតគណៈកម្មការមួយក្រុម ដោយទទួលបានបទបញ្ជាពីលោកព្រះរាជអាជ្ញានួន សាន បញ្ជាឲ្យយកសោទៅចាក់លើទ្វារផ្ទះនៅចំណុចខាងលើដែលផ្ទះនេះជាកម្មសិទ្ធិរបស់ឈ្មោះ សូរ ដាម៉ន់ ភេទស្រីអាយុ៤១ឆ្នាំ ដែលបានបង្កគ្រោះថ្នាក់ចរាចរនៅភូមិបួរ ឃុំតាស្តារ ស្រុកសំពៅលូន ខេត្តបាត់ដំបង កាលពីថ្ងៃទី១៩ ខែកញ្ញា ឆ្នាំ២០១៥ វេលាម៉ោង៨និង៣០នាទីយប់។
សេចក្តីរាយការណ៍បានឲ្យដឹងថា ពេលដែលនាងបានបង្កគ្រោះថ្នាក់ចរាចរហើយ បានជេរប្រមាថសមត្ថកិច្ចយ៉ាងចាស់ដៃ ខណៈដែលស្ត្រីរូបនេះកំពុងតែស្ថិតក្នុងស្ថានភាពស្រវឹងលែងដឹងខ្លួនព្រមទាំងលេចនោមផងនោះ ដោយបើកឡានគេចយកមកលាក់នៅក្នុងផ្ទះនេះមិនព្រមចូលខ្លួនទៅដោះស្រាយក្រោយពីជេរប្រមាថសមត្ថកិច្ចរួចមក។
សេចក្តីរាយការណ៍បន្តថា នៅក្នុងគណៈកម្មការចម្រុះនោះដែរគឺមានសមាសភាពចំនួន៦នាក់ចូលរួម ដោយមានអធិការរង នាយផ្នែក នាយកប៉ុស្តិ៍ មេភូមិត្រពាំងព្រលិត ព្រមទាំងអ្នកជិតខាងចំនួន២រូប ហើយបានយកមេសោថ្មីទៅចាក់បន្ថែមមួយជាន់ទៀតពីលើមេសោរបស់ម្ចាស់ផ្ទះ របស់ស្ត្រីនោះ ដែលបានរត់គេចខ្លួនបាត់ស្រមោល ហើយទុករថយន្តនៅក្នុងផ្ទះនោះ។
សេចក្តីរាយការណ៍បន្ថែមទៀតថា ការចាក់សោបន្ថែមមួយជាន់ទៀតនេះគឺដើម្បីឲ្យស្ត្រីរូបនេះ ចូលខ្លួនមកដោះស្រាយនៅចំពោះមុខច្បាប់ ហើយជៀសវាងនាំយករថយន្តនេះគេចខ្លួនដើម្បីបំបាត់ដាន។
បន្ទាប់ពីមានសារព័ត៌មានក្នុងស្រុកបានចុះផ្សាយអំពីស្ត្រីដែលបានជេរប្រមាថសមត្ថកិច្ចរួចមកអគ្គស្នងការនគរបាលជាតិបានចេញបញ្ជាទៅលើស្នងការនគរបាលខេត្តចាត់វិធានការក្នុងរឿងនេះដើម្បីស្រាវជ្រាវនិងតាមរកស្ត្រីរូបនេះឲ្យឃើញនាំខ្លួនមកប្រឈមមុខតាមផ្លូវច្បាប់។
ដោយឡែកអធិការពេជ្រ សារ៉ែន បានបញ្ជាក់ថា ស្ត្រីរូបនេះបានទាក់ទងតាមទូរស័ព្ទដោយធានាថានឹងចូលខ្លួនដោះស្រាយតាមផ្លូវច្បាប់នៅអធិការដ្ឋានប៉ុន្តែរហូតមកទល់ពេលនេះគឺស្ត្រីរូបនេះបានបញ្ជាក់ថា គេកំពុងព្យាបាលរោគនៅក្នុងប្រទេសថៃ ដូច្នេះនេះគឺជាលេសមួយដើម្បីគេចវេសពីសំណាញ់ច្បាប់តែប៉ុណ្ណោះ៕
សមត្ថកិច្ចបង្កើតគណៈកម្មការមួយក្រុមនិងចាក់សោមួយជាន់ទៀតលើផ្ទះស្ត្រីដែលជេរប្រមាថសមត្ថកិច្ច
0 Comments