អង្គការតាមឃ្លាំមើលការគោរពសិទ្ធិមនុស្ស Human Right Watch (HRW) កាលពីថ្ងៃអង្គារកន្លងទៅនេះ បានថ្កោលទោសទៅលើកងទ័ពនៃប្រទេសអេហ្ស៊ីបថា បានរំលោភបំពានទៅលើច្បាប់អន្ដរជាតិ តាមរយៈការកម្ទេចយ៉ាងរង្គាលនូវលំនៅដ្ឋាន និងបណ្ដេញប្រជាជនអស់រយៈពេល២ឆ្នាំកន្លងទៅហើយ នៅតាមបណ្ដោយព្រំដែនជាប់ជាមួយនឹងហ្កាហ្សា។
កងទ័ពនៃប្រទេសអេហ្ស៊ីប នៅក្នុងខែតុលាកន្លងទៅនេះ បានបង្កើតឲ្យក្លាយទៅជាតំបន់វាលល្វឹងល្វើយមួយនៅតាមបន្ទាត់ព្រំដែនជាប់ជាមួយនឹងក្រុង Rafah ដែលស្ថិតនៅភាគខាងជើងនៃជ្រោយស៊ីណៃ ដែលនៅទីនោះប្រទេសអេហ្សុីប បាននិយាថា គឺរូងក្រោមដីទាំងឡាយបានផ្ដល់លទ្ធភាព និងអំណោយផលដល់ក្រុមសកម្មជនប្រយុទ្ធ ព្រមទាំងអាវុធយុទ្ធភណ្ឌដល់ជនប៉ាឡេស្ទីន។
អង្គការសិទ្ធិមនុស្សដដែលបាននិយាយថា ការកម្ទេចក្នុងមាត្រដ្ឋានដ៏ធំនោះ យ៉ាងហោចណាស់ក៏មានអគារ៣,២៥៥កន្លែង នោះក៏ជាការគំរាមកំហែងទៅនឹងអ្វីដែលអេហ្ស៊ីបនិយាយថា ជាកន្លែងឆ្លងកាត់ក្រុមសកម្មប្រយុទ្ធ និងព្រមទាំងសព្វាវុធរបស់ប៉ាឡេស្ទីនផងដែរ។ នេះបើតាមការឲ្យដឹងពីអង្គការតាមឃ្លាំមើលសិទ្ធិមនុស្សថា កាតព្វកិច្ចរបស់ប្រទេសអេហ្ស៊ីប ស្ថិតនៅក្រោមសិទ្ធិមនុស្សអន្ដរជាតិ និងច្បាប់អន្ដរជាតិ ព្រមទាំងច្បាប់នៃសង្គ្រាមនោះ គឺប្រទេសនេះ មិនបានអនុវត្ដបានសោះឡើយ។
គួររំលឹកថា ប្រទេសអេហ្ស៊ីប បានឈានឡើងក្នុងការបើកសមរភូមិប្រយុទ្ធប្រឆាំងទៅនឹងក្រុមអ្នកធ្វើសង្គ្រាមពិសិដ្ឋជីហាដ ដែលក្នុងនោះគឺក្រុមរដ្ឋឥស្លាមដែលមានសាខានៅក្នុងប្រទេសអេហ្សុីប ពិសេសគឺនៅក្នុងខេត្ដស៊ីណៃ ចាប់តាំងពីពេលដែលនាយអគ្គសេនាធិការ លោក Abdel Fattah al-Sisi នៃកងទ័ពអេហ្ស៊ីប បានបណ្ដេញប្រធានាធិបតីឥស្លាមដែលជាប់ឆ្នោតលោក Mohamed Morsi ឲ្យចុះចេញពីតំណែងទៅវិញនៅក្នុងខែកក្កដា ឆ្នាំ២០១៣នោះ។ ម្យ៉ាងទៀត ក្រុមសកម្មជនប្រយុទ្ធឥស្លាមដែលនៅក្នុងខេត្ដស៊ីណៃ បានទាំងសម្លាប់ប៉ូលិស ព្រមទាំងទាហានរបស់រដ្ឋាភិបាល ចាប់តាំងពីមានការទម្លាក់លោកប្រធានាធិបតី Morsi មកនោះ។ ក្រុមសកម្មប្រយុទ្ធបានទាំងប្ដេជ្ញាថា នឹងធ្វើការសងសឹកចំពោះការបង្ក្រាបអ្នកដែលគាំទ្រខ្លួន ហើយដែលបានបាត់បង់ជីវិតអស់ដល់ទៅជាង១,៤០០នាក់ ព្រមទាំងមនុស្សរាប់ពាន់នាក់ទៀតត្រូវជាប់ឃុំឃាំង។
ដោយឡែករដ្ឋាភិបាលអេហ្ស៊ីប ខកខានមិនបានផ្ដល់ឲ្យបានគ្រប់គ្រាន់នូវជម្រកសម្រាប់ប្រជាជនប្រមាណ៣,២០០គ្រួសារនោះទេ ទាំងនៅក្នុងពេល និងនៅក្រោយពេលត្រូវបណ្ដេញចេញពីផ្ទះសម្បែងរបស់ពួកគេនោះ នេះជាការលើកឡើងដោយអង្គការតាមឃ្លាំមើលការគោរពសិទ្ធិមនុស្សនៅក្នុងប្រទេសអេហ្ស៊ីប៕
AFP
អង្គការតាមឃ្លាំមើលការគោរពសិទ្ធិមនុស្ស HRW ថ្កោលទោសប្រទេសអេហ្ស៊ីប ក្នុងការកម្ទេចរង្គាលលំនៅដ្ឋាន នៅខេត្ដស៊ីណៃ
0 Comments