ភ្នំពេញ ៖ ក្មេងស្រីអាយុ៥ឆ្នាំ ត្រូវបានជនល្មើសចាប់រំលោភសេពសន្ថវៈរួចចងផ្អោបនឹងដើមឈើស្លាប់យ៉ាងអាណោចអាធ័ម។ ទោះបីយ៉ាងណា ជនល្មើសត្រូវបានសមត្ថកិច្ចចាប់ខ្លួនដើម្បីផ្ដន្ទាទោសតាមច្បាប់។
សមត្ថកិច្ចថ្លែងថា ជនល្មើសឈ្មោះ ជុំ ធីម អាយុ៥២ឆ្នាំ ត្រូវបានសាលាដំបូងខេត្តកោះកុង និងសាលាឧទ្ធរណ៍ផ្ដន្ទាទោសដាក់ពន្ធនាគារអស់មួយជីវិត ពីបទឃាតកម្មគិតទុកជាមុន តាមមាត្រា២០០ នៃក្រមព្រហ្មទណ្ឌ ប្រព្រឹត្តកាលពីថ្ងៃទី៤ ខែវិច្ឆិកា ឆ្នាំ២០១០ នៅចំណុចភូមិជំនាប់ ឃុំជំនាប់ ស្រុកថ្មបាំង ខេត្តកោះកុង។ ប៉ុន្តែការសម្រេចនេះជនជាប់ចោទបានប្តឹងសាទុក្ខមកតុលាការកំពូល។
មន្ត្រីតុលាការកំពូលថ្លែងនៅវេលាម៉ោង១២និង២០នាទី ថ្ងៃទី១៥ ខែកញ្ញា ឆ្នាំ២០១៥ថា សំណុំរឿងនេះ នៅថ្ងៃទី២៣ ខែកញ្ញា ឆ្នាំ២០១៥ខាងមុខនេះ តុលាការកំពូល នឹងបើកសវនាការជំនុំជម្រះសាជាថ្មី។
ម្តាយក្មេងស្រីរងគ្រោះប្រាប់ឲ្យដឹងថា នៅថ្ងៃកើតហេតុរូបគាត់បានចេញទៅច្រូតស្រូវនៅចម្ការជាមួយកូនស្រី។ ប៉ុន្តែខណៈពេលដែលគាត់កំពុងច្រូតស្រូវនោះ កូនស្រីក៏បានបីកូនឆ្កែដើរលេងចេញទៅចម្ការបាត់ លុះដល់វេលាថ្ងៃត្រង់ត្រូវត្រឡប់ទៅផ្ទះ ស្រាប់តែបាត់កូនស្រី រួចក៏ដើររករហូតដល់ល្ងាចក៏នៅតែរកមិនឃើញ។ មិនតែប៉ុណ្ណោះគាត់ក៏បានប្រាប់អ្នកភូមិឱ្យជួយដើររក រហូតដល់ម៉ោង១២យប់ទើបប្រទះឃើញសពកូនស្រីត្រូវគេសម្លាប់ទាំងប្រាណននលគកចងផ្អោបនឹងដើមឈើ ដែលតាមការសន្និដ្ឋានរបស់សមត្ថកិច្ចថា ជាករណីរំលោភរួចសម្លាប់នៅក្នុងព្រៃក្បែរចម្ការរបស់ខ្លួនដើម្បីបំបិទភស្តុតាង។ ទោះបីយ៉ាងណា ក្រោយមកសមត្ថកិច្ចបានចាប់ខ្លួនជនល្មើស យកមកផ្ដន្ទាទោសតាមច្បាប់៕
ចាប់រំលោភរួចសម្លាប់ក្មេងស្រីអាយុ៥ឆ្នាំចងផ្អោបនឹងដើមឈើ
0 Comments