សៀមរាប ៖ អាជ្ញាធរជាតិអប្សរា អាជ្ញាធរជាតិព្រះវិហារ ក្រសួងទេសចរណ៍ ក្រសួងវប្បធម៌ និងវិចិត្រសិល្បៈ ក្រសួងបរិស្ថាន នគរបាលការពារបេតិកភណ្ឌ នគរបាលទេសចរណ៍ សមាគមមគ្គុទ្ទេសក៍ទេសចរណ៍ និងសាកលវិទ្យាល័យធំៗចំនួន៣ក្នុងខេត្តសៀមរាបប្រមាណជាង១០០នាក់បានជួបជុំគ្នាទទួលការបណ្តុះបណ្តាល ស្តីពីទេសចរណ៍ក្នុងតំបន់បេតិកភណ្ឌពិភពលោក ក្រោមប្រធានបទ ទស្សនវិស័យនិងបញ្ហាប្រឈម។
ពិធីនេះត្រូវបានរៀបចំឡើងរយៈពេល៥ថ្ងៃ ចាប់ពីថ្ងៃទី២១ ដល់២៥ ខែកញ្ញា ឆ្នាំ២០១៥ នៅសាលសន្និសីទអង្គរ នៃអាជ្ញាធរជាតិអប្សរា។
វគ្គបណ្តុះបណ្តាលនេះធ្វើការបង្ហាញដោយលោកស្រីសាស្ត្រាចារ្យ Maria GRAVARI-BARBAS ប្រធានមជ្ឈមណ្ឌលស្រាវជ្រាវ និងសិក្សាជាន់ខ្ពស់ផ្នែកទេសចរណ៍ នៃសាកលវិទ្យាល័យ Sorbbone ប្រទេសបារាំង។
ប្រធានបទសំខាន់ៗក្នុងវគ្គបណ្តុះបណ្តាលនេះមានដូចជា ការលើកឡើងនូវទស្សនៈ បញ្ហាប្រឈម និងដំណោះស្រាយពាក់ព័ន្ធនឹងទេសចរណ៍វប្បធម៌ ការរៀបចំផែនការទេសចរណ៍ និងការគ្រប់គ្រងលំហូរទេសចរណ៍ក្នុងតំបន់រមណីយដ្ឋានបេតិកភណ្ឌពិភពលោក។
អគ្គនាយកអាជ្ញាធរជាតិអប្សរាលោក ស៊ុំ ម៉ាប់បានលើកឡើងថា បើការកត់សម្គាល់ របស់គណៈកម្មាធិការបេតិកភណ្ឌពិភពលោក ក្នុងកិច្ចប្រជុំលើកទី៣៤ បានបង្ហាញថា កំណើនទេសចរអាចចេញជាពីរផ្លូវ បើគ្រប់គ្រងបានល្អ នឹងនាំមកនូវផលប្រយោជន៍ដល់បេតិកភណ្ឌ តែបើយើងគ្រប់គ្រងមិនបានត្រឹមត្រូវទេ កំណើនទេសចរនេះនឹងនាំឲ្យមានផលប៉ះពាល់ខ្លាំងដល់សម្បត្តិបេតិកភណ្ឌពិភពលោក។
លោកគូសបញ្ជាក់ថា កត្តានេះហើយ ដែលអាជ្ញាធរជាតិអប្សរាយកចិត្តទុកដាក់ដល់ធនធានមនុស្សសំខាន់ ដោយរៀបចំវគ្គបណ្តុះបណ្តាល មន្ត្រី បុគ្គលិក គ្រប់លំដាប់ថ្នាក់។
បន្ទាប់ពីមន្ត្រីចម្រុះទាំងនោះបានទទួលវគ្គបណ្តុះបណ្តាលស្តីពីបញ្ហាប្រឈម និងទស្សនវិស័យ នៅក្នុងតំបន់បេតិកភណ្ឌពិភពលោក រួចរាល់ហើយ ពួកគាត់បានសម្តែងការកោតសរសើរ និងការទទួលបានចំណេះដឹងនេះ ដើម្បីទុកជាបទពិសោធន៍ក្នុងការងារ៕
មន្ត្រីចម្រុះទទួលបានវគ្គបណ្តុះបណ្តាលស្តីពីការអភិរក្សនៅតំបន់ទេសចរណ៍ពិភពលោក
0 Comments