សៀមរាប ៖ ស្ត្រីជាកម្មករសំណង់ម្នាក់ជិះកង់ទៅធ្វើការត្រូវបានរថយន្តទួរីសបុកពេញទំហឹងបណ្ដាលឲ្យរហរបួសធ្ងន់ តែពេលបញ្ជូនដល់មន្ទីរពេទ្យឯកជនដើម្បីសង្គ្រោះ ជនរងគ្រោះក៏ស្លាប់តែម្តង រីឯអ្នកបើកបរបានរត់គេចខ្លួនបាត់។
ហេតុការណ៍គ្រោះថ្នាក់ចរាចរណ៍នេះកើតឡើងនៅវេលាម៉ោង១៥រសៀលថ្ងៃទី២០ ខែកញ្ញាស្ថិតនៅភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប។
លោកអនុសេនីយ៍ឯក សុខ ប៊ុនរ៉ុង នាយផ្នែកនគរបាលចរាចរណ៍ស្រុកប្រាសាទបាគង បានឲ្យដឹងថា រថយន្តទួរីសនោះបើកក្នុងល្បឿនលឿន ក៏ជ្រុលទៅបុកស្ត្រីជាកម្មករកំពុងជិះកង់តាមផ្លូវអាទិភាព ក្នុងទិសដៅស្របទិសគ្នាបណ្ដាលឲ្យជនរងគ្រោះរងរបួសធ្ងន់ ហើយពេលបញ្ជូនទៅដល់មន្ទីរពេទ្យក៏ស្លាប់តែម្តង។
លោកបន្តថា ស្ត្រីជាជនរងគ្រោះមានឈ្មោះ ឆៃ វៀតអាយុ៣៥ឆ្នាំ រស់នៅភូមិត្រពាំងធំ ឃុំមានជ័យ ស្រុកប្រាសាទបាគង។ លោកបន្តថា បន្ទាប់ពីកើតហេតុ ភ្លាមៗអ្នកបើកបរបានរត់គេចខ្លួនបាត់។
បច្ចុប្បន្ននេះវត្ថុតាងត្រូវបានបញ្ជូនទៅកាន់អធិការដ្ឋាននគរបាលស្រុកប្រាសាទបាគង ដើម្បីរង់ចាំដោះស្រាយទៅតាមផ្លូវច្បាប់៕
រថយន្តទួរីសបើកបុកស្ត្រីជិះកង់ពេញទំហឹងបណ្ដាលឲ្យស្លាប់ពេលបញ្ជូនដល់មន្ទីរពេទ្យ
0 Comments