កំពង់ឆ្នាំង ៖ ចោរលួចមាន់ទាដៃឆើតដ៏សកម្មម្នាក់ ត្រូវសមត្ថកិច្ចនគរបាលក្រុងកំពង់ឆ្នាំង និងប្រជាពលរដ្ឋ បានសហការគ្នាស្ទាក់ចាប់ខ្លួនបាន នៅពេលគេកំពុងធ្វើសកម្មភាពលួចទាយកទៅលក់។ ការបង្ក្រាបចោរកម្មនេះបានធ្វើឡើងនៅម៉ោង៣និង៣០នាទីទាបភ្លឺ ថ្ងៃទី១៧ ខែកញ្ញា ឆ្នាំ២០១៥ ក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចបង្ក្រាបចោររូបនេះបានឲ្យដឹងថា ជនសង្ស័យនេះមានឈ្មោះហ៊ុល ហ៊េត ភេទប្រុស អាយុ៣៥ឆ្នាំ រស់នៅភូមិកើតហេតុខាងលើ គេជាមុខសញ្ញាដ៏សកម្មក្នុងការលួចមាន់ទារបស់អ្នកស្រុកនៅក្នុងភូមិ។ មុនពេលចាប់ខ្លួនចោររូបនេះ ប្រជាពលរដ្ឋក្នុងភូមិបានបាត់មាន់ទាជាច្រើនក្បាល ជារៀងរាល់ថ្ងៃ ហើយក៏បាននាំគ្នាធ្វើការតាមដាន នៅពេលដែលអ្នកស្រុកនាំគ្នាតាមដានក៏បានឃើញជនសង្ស័យយកសត្វទានេះទៅលក់ឲ្យគេនៅភូមិទួលក្រឡាញ់ សង្កាត់កំពង់ឆ្នាំង។ ក្រោយពីបានឃើញជាក់ស្តែងនឹងភ្នែកហើយប្រជាពលរដ្ឋ ដែលជាម្ចាស់ទាបានទូរស័ព្ទប្តឹងទៅនគរបាលក្រុងកំពង់ឆ្នាំងធ្វើការព័ទ្ធចាប់ខ្លួនគេបានតែម្តងជាមួយនឹងទាកាប៉ាចំនួន៣ក្បាលជាភ័ស្តុតាងផង។
ជនសង្ស័យជាចោរដ៏សកម្មនេះត្រូវបានសមត្ថកិច្ចនគរបាលក្រុងកំពង់ឆ្នាំង កសាងសំណុំរឿងតាមនីតិវិធីបញ្ជូនខ្លួននិងភ័ស្តុតាងទៅស្នងការដ្ឋាននគរបាលខេត្តកំពង់ឆ្នាំង ដើម្បីចាត់ការបន្តនិងបញ្ជូនខ្លួនទៅកាន់តុលាការខត្ត ផ្ដន្ទាទោសតាមបញ្ញត្តិច្បាប់៕
ចោរលួចមាន់ទាដ៏សកម្មម្នាក់ ត្រូវពេលប្រជាពលរដ្ឋនិងសមត្ថកិច្ចចាប់ខ្លួន
0 Comments