ភ្នំពេញ ៖ ក្រុមជនសង្ស័យជួញដូរប្រើប្រាស់ និងចាក់ថ្នាំញៀនមួយសំបុក មានប្រុស និងស្រីត្រូវបានកម្លាំងកងរាជអាវុធហត្ថខណ្ឌដូនពេញ ដែលចុះដឹកនាំ និងបង្ក្រាបជាក់ស្ដែងដោយលោកលី គឹមឡេង មេបញ្ជាការរងអាវុធហត្ថខណ្ឌដូនពេញ ធ្វើការឃាត់ខ្លួនកាលពីវេលាម៉ោង២៣និង៣០នាទីថ្ងៃទី១៨ ខែកញ្ញា ឆ្នាំ២០១៥ ត្រង់ចំណុចផ្លូវលេខ១៥៤កែង៤៩ ម្លុកតាន់ប៉ាក្នុងសង្កាត់ផ្សារថ្មី៣ ខណ្ឌដូនពេញ។
លោកលី គឹមឡេង មេបញ្ជាការរងកងរាជអាវុធហត្ថខណ្ឌដូនពេញបានឲ្យដឹងថា ជនសង្ស័យពាក់ព័ន្ធនឹងគ្រឿងញៀនមួយសំបុក ដែលត្រូវឃាត់ខ្លួននោះ ទី១.ឈ្មោះ ទុន សុវណ្ណ ភេទប្រុស អាយុ៣៥ ឆ្នាំ ទី២.ឈ្មោះ អ៊ូ សុផាន ភេទប្រុស អាយុ២៨ឆ្នាំ ទី៣.ឈ្មោះ ប៉ុន សុខា ភេទប្រុស អាយុ៣៤ឆ្នាំ ទី៤.ឈ្មោះ សុខ ភក្តី ភេទប្រុស អាយុ៣៣ឆ្នាំ ទី៥.ឈ្មោះ ដង់ ធីយ៉ា ភេទស្រី អាយុ២៧ឆ្នាំ ទី៦.ឈ្មោះ មឿន សុខុន ភេទស្រី អាយុ២៥ឆ្នាំ។ ពួកគេពុំមានមុខរបរ និងទីលំនៅពិតប្រាកដឡើយ ហើយក្នុងការឃាត់ខ្លួននេះសមត្ថកិច្ចបានដកហូតវត្ថុតាងមួយចំនួន រួមមានម្សៅក្រាមសថ្លា៤កញ្ចប់តូច ម្សៅពណ៌ស៤កញ្ចប់តូច ម្សៅពណ៌ផ្កាឈូក៥កញ្ចប់តូច ជញ្ជីងថ្លឹង១គ្រឿង ទូរស័ព្ទ៨គ្រឿង ដែកកេះ២៩សឺរ៉ាំង មានម្ជុលសម្រាប់ចាក់ថ្នាំញៀនចំនួន១៦ដើម ម៉ូតូ១គ្រឿងម៉ាកហុងដាធូដេ ពណ៌ប្រផេះ គ្មានស្លាកលេខ១គ្រឿងកូនកាំបិត៣ កន្ត្រៃ៤ ដែកឆាប១ សម្ភារៈសម្រាប់សេពគ្រឿងញៀនមួយចំនួន។
លោកមេបញ្ជាការរងអាវុធហត្ថខណ្ឌដូនពេញបានបន្តទៀតថា នៅមុនពេលឃាត់ខ្លួនក្រុមជនសង្ស័យជួញដូរ និងប្រើប្រាស់មួយសំបុកនោះគឺកម្លាំងជំនាញបានស្រាវជ្រាវពីមុខសញ្ញានោះជាយូរមកហើយ លុះដល់ថ្ងៃនេះដឹងយ៉ាងច្បាស់ថាជនសង្ស័យទាំងនោះកំពុងជួញដូរ និងប្រើប្រាស់នៅក្នុងម្លុកតាន់ប៉ានោះ។ ដូច្នេះហើយកម្លាំងអាវុធហត្ថខណ្ឌដូនពេញក្រោមការបញ្ជាផ្ទាល់ពីលោកថោង ពិសិដ្ឋ មេបញ្ជាការខណ្ឌដូនពេញក្នុងការចេញល្បាតទប់ស្កាត់រាល់បទល្មើសផ្សេងៗនៅក្នុងមូលដ្ឋានរបស់ខ្លួននោះ បានចុះទៅបង្ក្រាបជាក់ស្តែងដោយឃាត់ខ្លួនជនសង្ស័យទាំងនោះបានចំនួន៦នាក់ក្នុងនោះស្រី២នាក់ព្រមទាំងដកហូតវត្ថុតាងថ្នាំញៀនមួយចំនួន និងឧបករណ៍ជក់ និងចាក់មួយចំនួនទៀតដើម្បីបញ្ជូនទៅទីបញ្ជាការអាវុធរាជធានីភ្នំពេញចាត់ការទៅតាមនីតិវិធីច្បាប់៕
អ.ហខណ្ឌដូនពេញឃាត់ខ្លួនជនសង្ស័យជួញដូរ ប្រើប្រាស់ និងចាក់ថ្នាំបានមួយសំបុក៦នាក់
0 Comments