កណ្ដាល ៖ បុរសអ្នកឃ្វាលទាម្នាក់បានស្លាប់នៅកណ្តាលវាលស្រែ ខណៈមានផ្គររន្ទះខ្លាំងៗ និងភ្លៀងធ្លាក់ហើយត្រូវបានសមត្ថកិច្ចអះអាងថាគាត់ស្លាប់ដោយត្រូវរន្ទះបាញ់។
ហេតុការណ៍នេះកើតឡើងនៅថ្ងៃទី១២ ខែកញ្ញា ឆ្នាំ២០១៥ ម៉ោង១៦និង៣០នាទីត្រង់ចំណុច ភូមិតាគាត់កើត ឃុំជ័យធំ ស្រុកខ្សាច់កណ្តាល ខេត្តកណ្ដាល(ចម្ងាយពីភូមិ២៥០០ម៉ែត្រ)។
នគរបាលស្រុកខ្សាច់កណ្តាលបានឲ្យដឹងថា ជនរងគ្រោះឈ្មោះសៅ សឺន ភេទប្រុសអាយុ៣៧ឆ្នាំមុខរបរ ចិញ្ចឹមទា នៅភូមិតាគាត់លិច ឃុំជ័យធំ ស្រុកខ្សាច់កណ្តាល ខេត្តកណ្តាល (ស្លាប់)ប្រពន្ធឈ្មោះចាន់ ជា អាយុ៣៥ឆ្នាំ មុខរបរ កសិករ មានកូន ស្រី១នាក់ អាយុ២ឆ្នាំ។
មុនពេលកើតហេតុបើតាមការប្រាប់ឲ្យដឹងពីប្រពន្ធរបស់ជនរងគ្រោះថា នៅពេលវេលាខាងលើមានភ្លៀងធ្លាក់យ៉ាងខ្លាំង ហើយប្តីរបស់គាត់បានដើរកៀងទា ដែលកំពុងដើររកស៊ីនៅវាលស្រែដើម្បីបញ្ចូលទ្រុង។ ពេលនោះស្រាប់តែមានផ្គររន្ទះខ្លាំងៗ បន្ទាប់មកឃើញប្តីគាត់ដួលទៅដីស្រែភ្លាមៗគាត់ក៏រត់ទៅមើល ប្តីរបស់គាត់ដាច់ខ្យល់ស្លាប់បាត់ទៅហើយ ទើបគាត់បានស្រែកហៅអ្នកភូមិឲ្យជួយ។ នគរបាលបានប្រាប់ឲ្យដឹងថា ភ្លាមៗពេលទទួលបានព័ត៌មានខាងលើជំនាញបានចុះទៅពិនិត្យឃើញថា ជនរងគ្រោះបានស្លាប់ដោយត្រូវរន្ទះបាញ់ ហើយក៏បានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី។
សមត្ថកិច្ចក៏បានអំពាវនាវផងដែរដល់ប្រជាពលរដ្ឋគួរមានការប្រុងប្រយ័ត្ន នេះជាគ្រោះធម្មជាតិមែន តែនៅពេលមានភ្លៀង និងផ្គររន្ទះខ្លាំងៗគួរកុំចេញពីផ្ទះជាពិសេសកុំនៅកណ្ដាលវាល ឬជ្រកក្រោមដើមឈើ បង្គោលដែកព្រោះវាអាចកើតហេតុការណ៍ដូចខាងលើ៕
កំពុងដើរកៀងទាត្រូវរន្ទះបាញ់ស្លាប់
0 Comments