សៀមរាប ៖ រថយន្តបាឡែន ដែលម្ចាស់របស់វាស្រវឹងជោកជាំ បានបើកក្នុងល្បឿនលឿនរេចង្កូតបុក រះម៉ូតូ២គ្រឿង ដែលជិះបញ្ច្រាសទិសគ្នាបណ្ដាលឲ្យម្ចាស់ម៉ូតូនាក់២ ម្នាក់ស្លាប់នៅកន្លែង និងម្នាក់ទៀតស្លាប់ពេលដែលបញ្ជូនដល់មន្ទីរពេទ្យឯកជន និងរបួសធ្ងន់ម្នាក់កំពុងព្យាបាលនៅមន្ទីរពេទ្យឯកជនមេគង្គ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៤និង៥០នាទីព្រឹកឈានចូលថ្ងៃទី១២ ខែកញ្ញា ឆ្នាំ២០១៥ស្ថិតនៅលើចំណុចផ្លូវជាតិហ្សាឌឺហ្គោល(ផ្លូវទៅកាន់អង្គរ)ពីខាងត្បូងប៉ុស្តិ៍លក់សំបុត្រចូលទស្សនាអង្គរវត្តចម្ងាយ៥០ម៉ែត្រ ក្នុងភូមិមណ្ឌល៣ សង្កាត់ស្លក្រាម ក្រុងសៀមរាប។
លោកវរសេនីយ៍ទោ ជា វុទ្ទី នាយ រងការិយាល័យនគរបាលចរាចរណ៍ផ្លូវគោកនៃស្នងការនគរបាលខេត្តបានប្រាប់នៅរសៀលថ្ងៃទី១២ ខែកញ្ញានេះថា ក្រោយពី មានសមត្ថកិច្ចប្រចាំការនៅកន្លែងលក់សំបុត្ររាយការណ៍មកថា មានរថយន្តបុករះម៉ូតូស្លាប់ និងរបួសធ្ងន់ ពេលនោះលោកបានឲ្យកម្លាំងជំនាញចុះទៅដល់កន្លែងកើតហេតុ រួចយករថយន្តនិងម៉ូតូជនរងគ្រោះដាក់ទៅម្ខាង ចំណែកជនបង្កឃាត់ខ្លួនបានភ្លាមៗផងដែរ។ លោកបន្តថា សពជនរងគ្រោះទាំង២នាក់មាន ទី១/ឈ្មោះ ហែម ស៊ាងលី ភេទប្រុសអាយុ២៩ឆ្នាំមុខរបរមន្ត្រីកងរាជអាវុធហត្ថ ខេត្តមានទីលំនៅ ភូមិដូនប៉ា សង្កាត់ស្លក្រាម ក្រុង សៀមរាប ជិះម៉ូតូម៉ាកឃ្លីក ពណ៌ស ពាក់ស្លាកលេខ សៀមរាប ១.C.៨៨៣៤ បើកបរពីត្បូងមកជើង ត្រូវបាន រថយន្តបាឡែនបុកស្លាប់នៅកន្លែងនិងទី២/ឈ្មោះ នឿន ជា ភេទស្រីអាយុ៣៧ឆ្នាំមុខរបរលក់ត្រី ដែលជិះពី ក្រោយប្តី ស្លាប់ពេលបញ្ជូនដល់មន្ទីរពេទ្យ។ ចំណែកប្តី ត្រូវរបួស ធ្ងន់មានឈ្មោះ រស់ ធំ អាយុ៣៩ឆ្នាំមុខរបរ លក់ត្រី។ ពីរនាក់ប្តីប្រពន្ធរស់នៅភូមិអារញ្ញ សង្កាត់សៀមរាប ក្រុងសៀមរាប ជិះម៉ូតូម៉ាកវ៉េវ ពណ៌ខ្មៅពាក់ស្លាកលេខសៀមរាប១.E.៣៧៣៤ បើកបរឌុបគ្នាមកលក់ត្រី ពីត្បូងមកជើង កំពុង ព្យាបាលនៅមន្ទីរពេទ្យឯកជនយីហោ(មេគង្គ)។ ចំណែកអ្នកបើកបររថយន្តបាឡែនមានឈ្មោះ ម៉ូវ មករាវុទ្ធ ភេទប្រុសអាយុ៤៤ឆ្នាំមុខរបរលក់ដូរ មានទីលំនៅភូមិវិហារចិន សង្កាត់ស្វាយដង្គំ ក្រុងសៀមរាប បើកបររថយន្តម៉ាកកាមរីបាឡែន ពណ៌សពាក់ស្លាកលេខសៀមរាប២.B ៤៣៨៨ត្រូវបានសមត្ថកិច្ចនគរបាលចរាចរណ៍ឃាត់ខ្លួនបញ្ជូនទៅកាន់ការិយាល័យនគរបាលចរាចរផ្លូវគោកនៃស្នងការខេត្តដើម្បីសួរនាំរួចកសាងសំណុំរឿងបញ្ជូនទៅតុលាការ។ លោកបន្ថែមថា សាកសពជនរងគ្រោះទាំង២នាក់ត្រូវបានសមត្ថ កិច្ចជំនាញ ប្រគល់ទៅឲ្យគ្រួសារដើម្បីយកទៅធ្វើបុណ្យ តាមប្រពៃណី។ រីឯរថយន្តនិងម៉ូតូទាំង២ដែលខូចខាត ទាំងស្រុង ត្រូវបានកម្លាំងជំនាញនាំយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការខេត្តដើម្បី រង់ចាំការដោះស្រាយទៅតាមផ្លូវច្បាប់៕
ស្រវឹងស្រាបើកឡានបុករះម៉ូតូ២គ្រឿងបណ្ដាលឲ្យស្លាប់២ របួសធ្ងន់ម្នាក់(Update)
0 Comments