កោះតៃវ៉ាន់ កំពុងតែទទួលរងក្ដីឈឺចាប់ ដោយសារតែករណីគ្រុនឈាមបណ្ដាលឲ្យបាត់បង់ជីវិតជាច្រើនរហូតដល់មាន៤២នាក់ស្លាប់ នេះជាការលើកឡើងដោយអាជ្ញាធរកាលពីថ្ងៃព្រហស្បតិ៍ គឺទ្វេដងនៃមរណៈនៅក្នុងឆ្នាំ២០១៤។
កាលពីឆ្នាំទៅចំនួនអ្នកកើតគ្រុនឈាមមាន១៥,៧៣២ករណី ដែលនេះជាតួលេខយ៉ាងខ្ពស់ក្នុងរយៈពេលជិត៣ទសវត្សរ៍ ហើយនៅឆ្នាំនេះតួលេខធ្លាក់ចុះទាបបន្ដិច។
ចំនួនសរុបនាឆ្នាំ២០១៥នេះ មានការកើតជំងឺគ្រុនឈាម១៥,២៨២ករណី នេះបើតាមការឲ្យដឹងពីមជ្ឈមណ្ឌលគ្រប់គ្រង និងបង្ការជំងឺឆ្លង CDC។ ភាគច្រើននៃករណីនេះនៅភាគខាងត្បូងក្រុង Tainan។ បើតាមការឲ្យដឹងពីមូលហេតុ ដោយមជ្ឈមណ្ឌល CDC នោះថា អាកាសធាតុក្ដៅខុសពីធម្មតានោះហើយដែលបណ្ដាលឲ្យមានការកើនឡើងនៃករណីគ្រុនឈាម។
សីតុណ្ហភាពឡើងខ្ពស់ គួបផ្សំជាមួយនឹងសំណើម (មានភ្លៀង) ជាអំណោយផលនៃការកើតមូស ដែលនោះហើយជាបញ្ហាដែលថា ហេតុអ្វីទើបបានជាប្រទេសស្ថិតនៅក្នុងបរិយាកាសត្រូពិករួមទាំងកោះតៃវ៉ាន់ផងដែរ កើតមានជំងឺគ្រុនឈាមកាន់តែច្រើនឡើងរៀងរាល់ឆ្នាំនោះ។
លោក Chuang Jen-hsiang នាយករងនៃ CDC បានប្រាប់ AFP ថា នៅឆ្នាំនេះសីតុណ្ហភាពនៅក្រុង Tainan និងតំបន់ភាគខាងត្បូង Kaohsing ឡើងខ្ពស់ក្នុងរយៈពេល៣០ឆ្នាំ។ មានករណីស្លាប់៣៦នាក់ផ្សេងទៀត បច្ចុប្បន្នកំពុងតែពិនិត្យមើលថា តើមានជាប់ពាក់ព័ន្ធជាមួយនឹងជំងឺគ្រុនឈាមដែរឬទេ?
ជំងឺគ្រុនឈាម ដែលដំបូងឡើយបណ្ដាលឲ្យគ្រុនក្ដៅខ្លួនខ្លាំង ឈឺក្បាល អន្ទះអន្ទែង ព្រមទាំងឈឺសព្វសាច់ បានរាលដាលដល់មនុស្ស២លាននាក់ទូទាំងពិភពលោកជារៀងរាល់ឆ្នាំ ដែលចំនួននៃករណីកើតមានកើនឡើងលើសពី៣០ដង នៅក្នុងរយៈពេល៥០ឆ្នាំចុងក្រោយនេះ យោងតាមការឲ្យដឹងពីអង្គការ WHO។
វីរុសដែលមិនមានវ៉ាក់សាំងសម្រាប់បង្ការនេះអាចនាំឲ្យកើតមានអាការៈក្អួតចង្អោរ ធ្លាក់ឈាម និងពិបាកដកដង្ហើម រួមជាមួយនឹងករណីធ្ងន់ផ្សេងៗទៀតផង៕
AFP
កោះតៃវ៉ាន់រងករណីជំងឺគ្រុនឈាម ដែលបណ្ដាលឲ្យបាត់បង់ជីវិតជាច្រើន
0 Comments