កំពង់ឆ្នាំង ៖ របាំងសាច់អួនចំនួន៨កន្លែង មានប្រវែង១.៤០០ម៉ែត្រ និងលបលូសាច់អួនចំនួន១៨មាត់ នៅក្នុងភូមិសាស្ត្រភូមិថ្នល់ឈើទាល ឃុំផ្លូវទូក ស្រុកកំពង់លែង ត្រូវបានសមត្ថកិច្ចចម្រុះ ដឹកនាំដោយលោកនាយរងខណ្ឌរដ្ឋបាលជលផលកំពង់ឆ្នាំងសហការជាមួយសមត្ថកិច្ចចម្រុះក្នុងស្រុក ធ្វើការចុះបង្ក្រាបកាប់បំផ្លាញចោលនៅនឹងកន្លែង កាលពីថ្ងៃទី១៩ ខែកញ្ញា ឆ្នាំ២០១៥។
លោក ម៉ប់ សាម៉ុន នាយរងខណ្ឌរដ្ឋបាលជលផលកំពង់ឆ្នាំងបាននិយាយឲ្យដឹងថា ប្រតិបត្តិការបង្ក្រាបបទល្មើសនេសាទខុសច្បាប់ខាងលើនេះគឺមានការបញ្ជាពីលោក សោម ភិរុណ នាយខណ្ឌរដ្ឋបាលជលផលកំពង់ឆ្នាំង ដោយសហការជាមួយលោក ផៅ ស្រៀង អភិបាលរងស្រុកកំពង់លែង និងសមត្ថកិច្ចចម្រុះរួមមាន យោធាស្រុក នគរបាលស្រុក សរុបចំនួន១៨នាក់ ប្រើប្រាស់កាណូតបាឡាស្មាច់ចំនួន៦គ្រឿង បានបើកកាណូតបង្ក្រាបបទល្មើសនេសាទពេញមួយថ្ងៃនៅក្នុងភូមិសាស្ត្រភូមិថ្នល់ឈើទាល ឃុំផ្លូវទូក ស្រុកកំពង់លែង។ លទ្ធផលបង្ក្រាបបានធ្វើការកាប់បំផ្លាញចោលរបាំងសាច់អួន ចំនួន៨របាំង ស្មើនឹងប្រវែង១.៤០០ម៉ែត្រ បង្គោល៧៥០ដើម លបលូសាច់អួន១៦មាត់ និងចាក់លែងត្រីចម្រុះចំនួន៣០គីឡូក្រាម។
លោក ម៉ប់ សាម៉ុន បានឲ្យដឹងទៀតថា បទល្មើសនេសាទក្នុងរដូវបិទនេសាទឆ្នាំ២០១៥នេះមានការថយចុះ ព្រោះកត្តាទឹកទន្លេឡើងទាបជាងឆ្នាំចាស់ជាង២ម៉ែត្រ ទើបការបង្ក្រាបបទល្មើសនេ សាទខាងលើនេះបានលទ្ធផលតិច។
ទោះបីបែបនេះក្តីតាមផែនការរបស់គណៈបញ្ជាការឯកភាពខេត្ត លោកនាយខណ្ឌរដ្ឋបាលជលផលកំពង់ឆ្នាំងបានដាក់បញ្ជាឲ្យធ្វើការបង្ក្រាបជារៀងរាល់ថ្ងៃ ដូចភ្លៀងរលឹម មិនត្រូវបណ្ដែតបណ្ដោយឲ្យមានបទល្មើសយ៉ាងអានាធិបតេយ្យនោះឡើយ។
គួរបញ្ជាក់ថា រដូវបិទការនេសាទ នឹងបញ្ចប់នៅថ្ងៃទី៣១ ខែកញ្ញា ឆ្នាំ២០១៥ ហើយរដូវបើកនេសាទ និងចាប់ផ្ដើមពីថ្ងៃទី០១ ខែតុលា ឆ្នាំ២០១៥តទៅហើយ សមត្ថកិច្ចរដ្ឋបាលជលផលក៏សូមអំពាវនាវផងដែរដល់ប្រជានេសាទទាំងអស់ កុំប្រើឧបករណ៍នេសាទខុសច្បាប់ ដូចជាដាក់របាំងសាច់អួនវែងលើសការកំណត់ ប្រើសាច់អួនក្រឡាតូច ប្រើឧបករណ៍នេសាទកែច្នៃទំនើប និងការឆក់ត្រីដែលច្បាប់ហាមឃាត់ ដែលប្រឈមនឹងការបង្ក្រាបពីសមត្ថកិច្ច និងដែលនាំឲ្យមានទោសទណ្ឌដល់ខ្លួន និងខាតបង់ថវិកានៅក្នុងគ្រួសារ៕
បង្ក្រាបបទល្មើសរបាំងសាច់អួន៨កន្លែង និងកាប់បំផ្លាញប្រវែង១.៤០០ម៉ែត្រនៅឃុំផ្លូវទូក
0 Comments