ការហោះហើរដោយត្រង់ទៅត្រង់មក រវាងអ៊ុយក្រែន និងរុស្ស៊ី ត្រូវបានបញ្ឈប់លែងមានតទៅទៀតហើយនៅថ្ងៃសៅរ៍ម្សិលមិញនេះ ខណៈពេលដែលទណ្ឌកម្មថ្មី ដែលផ្ដួចផ្ដើមឡើងដោយក្រុង Kiev បានឈានចូលជាធរមាន។
ដំបូងឡើយក្រុងមូស្គូ បានហៅការហាមប្រាមរបស់ក្រុង Kiev ទៅលើអាកាសចរណ៍រុស្ស៊ី ថា ជា”ដំណើរឆ្កួត” ហើយក្រោយមកក៏បានប្រកាសថា ខ្លួននឹងឆ្លុះបញ្ចាំងតបនឹងការធ្វើយ៉ាងនេះវិញ។
ប្រទេសអ៊ុយក្រែន និយាយថា ជើងហោះហើរទាំងអស់នឹងបញ្ចប់ជាស្ថាពរនៅពាក់កណ្ដាលអធ្រាត្រថ្ងៃសៅរ៍ បន្ទាប់ពីកិច្ចចរចាជានាទីចុងក្រោយបង្អស់បរាជ័យ។ បម្រាមនេះបណ្ដាលឲ្យរងការប៉ះពាល់ដល់អ្នកដំណើរជាង៧០,០០០នាក់។ ទណ្ឌកម្មត្រូវផ្ដោតទៅលើការដាក់ទោសរុស្ស៊ី ព្រោះតែដាក់តំបន់ Crimea ឲ្យទៅជាឧបសម្ព័ន្ធរបស់ប្រទេសខ្លួន ព្រមទាំងការគាំទ្រដល់ក្រុមឧទ្ទាមប្រដាប់អាវុធនៅភាគខាងកើតប្រទេសអ៊ុយក្រែន។ គេបានចាប់ផ្ដើមអនុវត្ដទណ្ឌកម្មនេះនៅពេលឥឡូវទៅហើយ។
ដោយឡែករុស្ស៊ីវិញ បានថ្កោលទោសដោយចោទប្រកាន់អ៊ុយក្រែនថា ជាអ្នកបាញ់បំបាក់ជើងដោយខ្លួនឯង នៅក្នុងការសម្រេចទៅលើបម្រាមហោះហើរដោយត្រង់ទៅត្រង់មកនេះ ហើយបង្ហាញថា អ្នកដំណើរភាគច្រើនបំផុតនោះ គឺពលរដ្ឋអ៊ុយក្រែនរបស់ខ្លួន ដែលធ្វើដំណើរទៅធ្វើការនៅប្រទេសរុស្ស៊ី ទៅសួរសុខទុក្ខក្រុមសាច់ញាតិ ឬក៏ទៅសំចតនៅក្នុងប្រទេសរុស្ស៊ី មុនធ្វើការឆ្លងកាត់។
ស្ទើរតែ២ភាគ៣ នៃអ្នកធ្វើដំណើរសរុបនោះគឺជិះយន្ដហោះ Russian Airlines។
រដ្ឋមន្ដ្រីដឹកជញ្ជូនរបស់ប្រទេសរុស្ស៊ី ប៉ាន់ប្រមាណថា ការខាតបង់ការលក់សំបុត្រធ្វើដំណើរតាមយន្ដហោះទាំង២ប្រភេទនោះ មានប្រមាណដល់ទៅ១១០លានដុល្លារក្នុងមួយឆ្នាំ។
ដោយឡែកចំពោះបម្រាមបែបនេះ បែរជានាំឲ្យមានកំហឹងពីអ្នកធ្វើដំណើរពីប្រទេសទាំងពីរនេះទៅវិញទេ៕
BBC News
រុស្ស៊ី-អ៊ុយក្រែន ហាមការហោះហើរត្រង់ទៅត្រង់មក
0 Comments