កំពង់ធំ ៖ កំណាត់ផ្លូវលំ១ខ្សែ ត្រូវបានប្រជាពលរដ្ឋស្រុកកំពង់ស្វាយ សំណូមពរ ឲ្យមន្ទីរ អភិវឌ្ឍន៍ជនបទនិងអាជ្ញាធរខេត្តកំពង់ធំ ជួយជួសជុលឡើងវិញ ដើម្បីជួយសម្រួលដល់ការធ្វើ ដំណើរ របស់ប្រជាពលរដ្ឋ,ការដឹកជញ្ជូនកសិផល,សិស្សានុសិស្សទៅសាលារៀន និងបញ្ជូនអ្នកជំងឺ ទៅកាន់មណ្ឌលសុខភាពឬមន្ទីរពេទ្យខេត្ត ព្រោះថា កន្លងមកនិងបច្ចុប្បន្ន ពួកគាត់ជួបការលំបាក ជាខ្លាំងក្នុងការធ្វើដំណើរ ជាពិសេសនៅរដូវវស្សា។
ជួប ជាមួយលោក ចេង ជា មេភូមិឈើទាល ឃុំត្បែង រូមជាមួយនឹងប្រជាពលរដ្ឋជា ច្រើនគ្រួសារ ដែលមានលំនៅដ្ឋាន នៅតាមបណ្ដោយ ផ្លូវលំនេះ បានប្រាប់ អ្នកសារព័ត៌មានថា កំណាត់ផ្លូវលំនេះ ហៅថា ផ្លូវតារាម មានប្រវែងប្រមាណ១០គីឡូម៉ែត្រ តភ្ជាប់ពីឃុំត្បែងទៅ ឃុំ និងពេជ ស្រុកកំពង់ស្វាយ បច្ចុប្បន្នមានការខូចជាច្រើនកន្លែង,មានជង្ហុកដក់ទឹកតូចធំជាច្រើន និងបែក ភក់ ស្វិតរាប់គីឡូម៉ែត្រតែម្ដង ដែលធ្វើឲ្យប្រជាពលរដ្ឋជួប ការលំបាកក្នុងការធ្វើដំណើរ ជាខ្លាំង។
លោកមេភូមិបានបន្តថា មូលហេតុដែលនាំឲ្យផ្លូវនេះខូចឆាប់រហ័សនោះ គឺដោយរថយន្ត ធុនធំ ផ្ទុកធ្ងន់ ធ្វើចរាចរនៅលើផ្លូវនេះ ជាប្រចាំ តួយ៉ាងដូចរថយន្តដឹកដីជាដើម។ លោកស្រី កែ ផៃ មេឃុំត្បែង បានប្រាប់ឲ្យដឹងថា ចំពោះកំណាត់ផ្លូវលំនេះ គឺអាជ្ញាធរភូមិ ឃុំបានធ្វើសំណើទៅ អេ ឌី បី និងកងវិស្វកម្ម ហើយបានបញ្ជូនសំណើនេះ ទៅថ្នាក់ខេត្ត រួច ហើយ។
លោកស្រីមេឃុំ បានបន្តថា កាលពីប៉ុន្មានថ្ងៃមុននេះ នៅវេទិកាសាធារណៈ ឯកឧត្ដម ប្រ ធានក្រុមប្រឹក្សាខេត្តគឺឯកឧត្ដម ឈឹម ឈន់ បានប្រាប់ថា សំណើនោះគឺខាងអេ ឌី បី បានទទួល ហើយប៉ុន្តែលទ្ធផលបែបណាគឺមិនទាន់ដឹងនៅឡើយទេ។
លោកស្រីមេឃុំបានបន្តឲ្យដឹងទៀតថា បើយើងតាមមូលនិធិឃុំនិងថវិកាបដិភាគ របស់ ប្រជាពលរដ្ឋគឺកម្រិត ដែលមិនអាចជួសជុលកំណាត់ផ្លូវលំនេះបានទេ មានតែដាក់សំណើទៅលើ។ លោក អ៊ឹម ថន អភិបាលស្រុកកំពង់ស្វាយ បានប្រាប់អ្នកសារព័ត៌មានថា បញ្ហាផ្លូវ ជា តម្រូវការអាទិភាព របស់ប្រជាពលរដ្ឋនាពេលបច្ចុប្បន្ន ដោយឡែកកំណាត់ផ្លូវតារាម ដែលស្ថិតនៅ ឃុំ ២ គឺ ឃុំត្បែងនិងឃុំ និងពេជនេះ គឺអាជ្ញាធរស្រុក ដាក់បញ្ចូលទៅក្នុងគម្រោងអន្តរឃុំ និងបានតាម ដានសំណើដែលបានដាក់ទៅហើយនោះ ជាប្រចាំ ដើម្បីជាប្រយោជន៍ប្រជាពលរដ្ឋនិងសង្គម។
លោកអភិបាលស្រុកបានបន្តថា ចំពោះការអភិវឌ្ឍន៍ គឺបានបន្ថែមល្បឿននៅគ្រប់ទីកន្លែង ក្នុងក្របខណ្ឌទូរទាំងប្រទេស ប៉ុន្តែថ្វីត្បិតយ៉ាងនេះក្ដី វានៅតែមិនតុល្យភាពនឹងមហិច្ឆតានៃការ អភិវឌ្ឍន៍នោះទេ ដោយឡែកដូចជានៅក្នុងស្រុកកំពង់ស្វាយជាដើម គឺផ្លូវ ស្ពាន ត្រូវបានជួសជុលនិង ស្ថាបនាថ្មី ជាច្រើន ប៉ុន្តែនៅតែមិនទាន់បំពេញតាមតំរូវការរបស់ប្រជាពលរដ្ឋបាននោះទេ ពោល ប្រព័ន្ធទឹក ភ្លើង ជាពិសេសផ្លូវនេះឯង ប៉ុន្តែទោះជាយ៉ាងក្ដីក៏លោកសំណូមពរសុំឲ្យក្រសួងឬស្ថាប័ន ដែលបានទទួលបានសំណើសុំជួសជុលកំណាត់ផ្លូវលំខាងលើនេះ មេត្តាជួយបំពេញតាមតម្រូវការ របស់ប្រជាពលរដ្ឋបានឆាប់រហ័សផង៕
ប្រជាពលរដ្ឋ២ឃុំសំណូមពរ ថ្នាក់ខេត្តកំពង់ធំ និងថ្នាក់ជាតិ ជួយជុលកំណាត់ផ្លូវលំកំពុងជួបការលំបាក
0 Comments