ភ្នំពេញ ៖ ស្តូបអនុស្សាវរីយ៍មិត្តភាព កម្ពុជា- រុស្សី ត្រូវបានសម្ពោធជាផ្លូវការនាព្រឹកថ្ងៃទី២៧ខែតុលាឆ្នាំ២០១៥ក្រោមការអញ្ជើញជាអធិបតីភាពពីសំណាក់លោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីនិងលោក DMITRY TSVETKOV ឯកអគ្គរដ្ឋទូតរុស្ស៊ីប្រចាំកម្ពុជា រួមទាំងថ្នាក់ដឹកនាំមន្ត្រីរាជការស្ថាប័នដែលពាក់ព័ន្ធជាច្រើនរូបទៀត។
ស្តូបអនុស្សាវរីយ៍នោះគឺ ជានិមិត្តរូបបង្ហាញឲ្យឃើញនូវចំណងមិត្តភាពនិងកិច្ចសហការរវាងប្រទេសទាំងពីរដែលកើតមានតាំងពីយូរលង់ណាស់មកហើយ ហើយកាន់តែរឹងមាំថែមទៀត។
លោកបណ្ឌិតសភាចារ្យ សុខ អាន បានថ្លែងអះអាងថា ការសម្ពោធស្តូបអនុស្សាវរីយ៍មិត្តភាព កម្ពុជា-រុស្សី នាពេលនេះគឺដើម្បីរំលឹកដល់កិច្ចសហប្រតិបត្តិការជាមិត្តភាពដ៏ល្អរវាងប្រទេសទាំងពីរ ជាពិសេស រំឮកដល់អនុស្សាវរីយ៍នៃការសាងសង់គ្រឹះស្ថានឧត្តមសិក្សាបច្ចេកទេសដ៏ចំណាស់ជាងគេមួយនៅកម្ពុជា គឺវិទ្យាស្ថានបច្ចេកវិទ្យាកម្ពុជា កាលពីប្រាំទសវត្សរ៍មុន។
ទន្ទឹមនឹងការថ្លែងអំណរគុណយ៉ាងជ្រាលជ្រៅចំពោះសហព័ន្ធរុស្ស៊ីក្នុងកិច្ចសហប្រតិបត្តិការដ៏ជិតស្និទ្ធកន្លងមក លោកឧបនាយករដ្ឋមន្ត្រីក៏បានថ្លែងនូវការកោតសរសើរចំពោះកិច្ចខិតខំប្រឹងប្រែងរបស់ស្ថាបនិកវិទ្យាស្ថាន ក៏ដូចជាគណៈគ្រប់គ្រង សាស្ត្រាចារ្យ មន្ត្រីរាជការ និងបុគ្គលិកសិក្សាទាំងអស់ ក្នុងការបណ្ដុះបណ្ដាលធនធានមនុស្ស និងការអភិវឌ្ឍន៍វិទ្យាស្ថានបច្ចេកវិទ្យាកម្ពុជា រហូតក្លាយជាគ្រឹះស្ថានឧត្តមសិក្សាបច្ចេកទេសនាំមុខគេមួយនៅកម្ពុជា។
លោក សុខ អាន បានអះអាងម្តងទៀតថា ស្តូបអនុស្សាវរីយ៍នេះ គឺជាសក្ខីភាពឆ្លុះបញ្ចាំងឲ្យឃើញយ៉ាងច្បាស់នូវកិច្ចសហប្រតិបត្តិការជាមិត្តភាពដ៏ល្អ និងយូរអង្វែងរវាងកម្ពុជានិងរុស្ស៊ី ដែលកើតមានឡើងចាប់តាំងពីទសវត្សរ៍ឆ្នាំ១៩៥០មក។
លោកបណ្ឌិតសភាចារ្យក៏បានរម្លឹកនូវការចង់ចាំថា នៅក្រោយថ្ងៃរំដោះ ៧ មករា ១៩៧៩ រដ្ឋជាសមាជិកអតីតសហភាពសូវៀត ជាពិសេសរុស្ស៊ី បានផ្ដល់នូវការគាំទ្រដ៏សំខាន់ដល់កម្ពុជា សម្រាប់ការកសាងប្រទេសឡើងវិញ បន្ទាប់ពីត្រូវបានបំផ្លិចបំផ្លាញស្ទើរទាំងស្រុងលើគ្រប់វិស័យ ដោយរបបប្រល័យពូជសាសន៍ប៉ុលពត តាមរយៈទំនាក់ទំនងសេដ្ឋកិច្ច និងពាណិជ្ជកម្ម ខណៈដែលប្រទេសមួយចំនួនបានដាក់ការហ៊ុមព័ទ្ធមកលើកម្ពុជា។
លោកបណ្ឌិតសភាចារ្យបានសង្កត់ធ្ងន់ថា ពេលនោះជំនួយមនុស្សធម៌ ដែលអតីតសហភាពសូវៀតផ្ដល់ឲ្យកម្ពុជា បានជួយរំលែកនូវបន្ទុកដ៏ធ្ងន់ធ្ងររបស់កម្ពុជាក្នុងកិច្ចការកសាង ស្ដារ និងអភិវឌ្ឍប្រទេសឡើងវិញ ចេញពីបាតដៃទទេ នៅក្នុងទសវត្សរ៍ឆ្នាំ១៩៨០។ ទន្ទឹមនេះទៅទៀត នៅក្នុងវិស័យអប់រំ សហព័ន្ធរុស្ស៊ី និងអតីតសហភាពសូវៀត ក៏បានចូលរួមចំណែកយ៉ាងច្រើនផងដែរ នៅក្នុងការបណ្ដុះបណ្ដាលធនធានមនុស្សសម្រាប់កម្ពុជា ទាំងនៅកម្ពុជានិងនៅអតីតសហភាពសូវៀត។
គិតមកដល់ពេលបច្ចុប្បន្ននេះ មាននិស្សិតជាង ៨០០០នាក់ បានទៅសិក្សានៅសហព័ន្ធរុស្ស៊ី និងអតីតសហភាពសូវៀត ហើយអតីតនិស្សិតទាំងនោះមួយចំនួនបាននឹងកំពុងបម្រើការក្នុងជួររដ្ឋាភិបាលផងដែរ។
លោកឧបនាយករដ្ឋមន្ត្រីបានលើកឡើងថា វិទ្យាស្ថានបច្ចេកវិទ្យាកម្ពុជា គឺជាសមិទ្ធផលមួយ ក្នុងចំណោមសមិទ្ធផលជាច្រើនទៀត ដែលកើតចេញពីកិច្ចសហប្រតិបត្តិការដ៏ជិតស្និទ្ធរវាងកម្ពុជា និងអតីតសហភាពសូវៀត ហើយបាននឹងកំពុងដើរតួនាទីយ៉ាងសកម្មក្នុងការបណ្ដុះបណ្ដាលធនធានមនុស្ស លើវិស័យវិស្វកម្មបច្ចេកវិទ្យា និងរួមចំណែកដល់ការអភិវឌ្ឍន៍ប្រទេសឲ្យកាន់តែរីកចម្រើនថែមទៀត។
គួរបញ្ជាក់ថា យោងតាមរបាយការណ៍រដ្ឋមន្ត្រីក្រសួងអប់រំបានបង្ហាញថា ជារៀងរាល់ឆ្នាំ និស្សិតវិទ្យាស្ថានបច្ចេកវិទ្យាកម្ពុជា ប្រមាណ ៧០% ទទួលបានការងារធ្វើភ្លាមៗ បន្ទាប់ពីការបញ្ចប់ការសិក្សា៕
បណ្ឌិតសភាចារ្យសុខ អានអញ្ជើញចូលរួមសម្ពោធស្តូបអនុស្សាវរីយ៍មិត្តភាព កម្ពុជា- រុស្សី
0 Comments