កំពង់ធំ ៖ ព្រះសត្ថាបារមី សៀង សុខ ព្រះមេគុណខេត្តកំពង់ធំ និងជាព្រះមុនីរង្សីព្រះរាជាគណៈកិត្តិយស ព្រះអង្គបាននាំយកអំណោយចែកជូនដល់គ្រួសារទីទាល់ក្រ និងគ្រួសារជនពិការចំនួន ៨១គ្រួសាររួមសហការជាមួយសាខាកាកបាទក្រហមកម្ពុជាខេត្តកំពង់ធំ ចែកជូនដល់លោកយាយលោកតាគ្រួសារក្រីក្រដែលកំពុងតែជួបនូវផលលំបាកខ្វះខាតនៅព្រឹកថ្ងៃទី២១ ខែតុលា ឆ្នាំ២០១៥ ។
លោក ឌុក ស៊ីដា នាយិកាសាខាកាកបាទក្រហមកម្ពុជា ខេត្តកំពង់ធំបានមានប្រសាសន៍ថា ក្រោមការយកចិត្តទុកដាក់របស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានការកាកបាទក្រហមកម្ពុជា បានជំរុញឲ្យមានភ្នាក់ងារស្ម័គ្រចិត្តកាកបាទក្រហម គ្រប់បណ្ដាស្រុកក្រុង ក្នុងខេត្តកំពង់ធំ ក៏ដូចជាខេត្តដ៏ទៃ ក្នុងការចុះជួយមើលថែពីសុខទុក្ខរបស់ ប្រជាពលរដ្ឋ ដែលបានជួបប្រទះនិងគ្រោះមហន្តរាយនានា ដើម្បីចាត់វិធានការចុះជួយឲ្យបានទាន់ពេលវេលា ឆ្លើយតប និងគ្រោះមហន្តរាយ ដែលអាចនិងកើតឡើង ក្នុងសកម្មភាពភ័យធម្មជាតិ និងភ័យវិបត្តិផ្សេងៗ ដែលបានកើតឡើង នៅក្នុងភូមិសាស្ត្រ និងសូមឲ្យបងប្អូនប្រជាពលរដ្ឋ សហការផ្តល់ព័ត៌មានទាំងឡាយណា ដែលពាក់ព័ន្ធទៅនឹង សុខទុក្ខនៅក្នុងមូលដ្ឋាន កន្លងមកសាខាកាកបាទក្រហមកម្ពុជា ខេត្តកំពង់ធំ ដែលមានឯកឧត្តម អ៊ុត សំអន ជាប្រធាន បានយកចិត្តទុកដាក់ដល់ជីវភាពប្រជាពលរដ្ឋរងគ្រោះ និងខ្វះខាត បានចែកអំណោយ និងសាងសង់លំនៅដ្ឋានជូន គ្រួសារក្រីក្រជាច្រើនកន្លែងផងដែរ។
ព្រះសត្ថាបារមី សៀង សុខ ព្រះមេគុណខេត្តកំពង់ធំ និងជាអនុប្រធានកិត្តិយសសាខាកាកបាទក្រហមកម្ពុជា សាខាខេត្តកំពង់ធំ បានមានសង្ឃថេរៈដីកាថា ដោយព្រះអង្គយល់ឃើញថា ញាតិញ៉ម ពុទ្ធបរិស័ទមួយចំនួន ជួប និងភាពខ្វះខាត និងទីទាល់ក្រ ទើបចង់ជួយរំលែកភារៈរបស់រាជរដ្ឋាភិបាល ជាមួយនឹងកាកបាទក្រហមចែក រំលែកស្បៀង និងគ្រឿងឧបភោគបរិភោគមួយចំនួនដល់គ្រួសារទីទាល់ក្រ ដែលជាទឹកចិត្តរបស់ញាតិញោមបានយកមក ប្រគេនដល់ព្រះសង្ឃ ហើយក៏ជាតួនាទីរបស់ព្រះសង្ឃមួយដែរ ក្នុងការចូលរួមជាមួយវិស័យមនុស្សធម៌ ដោយព្រះសង្ឃមិនមែនត្រឹមតែឆាន់ហើយសឹងនោះទេ គឺព្រះសង្ឃ ត្រូវចូលរួមចែករំលែកទ័យទានដល់ញាតិញោម តែអាត្មាឲ្យតែ អង្ក តែ និងគ្រឿងឧបរិភោគតែប៉ុណ្ណោះ ដោយអាត្មាមិនឲ្យឆ្នាំងដល់ញាតិញោមទេឆ្នាំងគឺទុកនៅវត្ត ទុកឲ្យញាតិញោមរកឆ្នាំដោយខ្លួនឯង តែបើអាត្មាឲ្យឆ្នាំងទៀត ញាតិញោមមិនមានការប្រឹងប្រែងខ្នះខ្នែងទេ ដោយខ្លួនឯងទេ។
ក្នុងពិធីចែកអំណោយដល់គ្រួសារទីទាល់ក្រ ក្នុងមួយគ្រួសារទទួលបាន អង្ក២៥គ.ក មី ២០កញ្ចប់ ទឹកត្រី តឹកស៊ីអ៊ីវ ២ដប ស្ករស ១គ.ក តែ១កញ្ចប់ ទឹកក្រូច ៤កំប៉ុង ថវិកា១ម៉ឺនរៀល និងធូបទៀន ជូនដល់លោកយាយ លោកតា និងគ្រួសារទីទាល់ក្រ ស្ថិតនៅវត្តឥន្ទ្រីយ៍សំវរៈ ហៅវត្តកំពង់ធំស្ថិតនៅក្រុងស្ទឹងសែន ខេត្តកំពង់ធំ៕
ព្រះតេជគុណខេត្តកំពង់ធំ និងកាកបាទក្រហម ចែកអំណោយដល់គ្រួសារទីទាល់ក្រ៨១គ្រួសារ
0 Comments