ភ្នំពេញ ៖ លោក នុត ពុធដារ៉ា អភិបាល នៃគណៈអភិបាលខណ្ឌដង្កោ រួមជាមួយព្រះគ្រូ កុង ពិសី ចៅអធិការវត្តសំបួរមាស បានធ្វើពិធីចែកអំណោយជូនដល់ប្រជាពលរដ្ឋក្រីក្រ និងលោកតា លោកយាយប្រមាណ៣៥០គ្រួសាររស់នៅក្នុងភូមិសំបួរ និងភូមិម័ល សង្កាត់ដង្កោ ដោយក្នុង១គ្រួសារទទួលបានថវិកា១ម៉ឺនរៀល និងឃីត១កញ្ចប់ (រួមមាន អង្ករ៣គីឡូក្រាម មី៤កញ្ចប់ តែ៤កញ្ចប់ ទឹកសុទ្ធ២ដប ទឹកក្រូច២កំប៉ុង និងទឹកដោះគោ២កំប៉ុង) កាលពីព្រឹកថ្ងៃទី២០ ខែតុលា ឆ្នាំ២០១៥ នៅវត្តសំបួរមាស ស្ថិតក្នុងភូមិសំបួរ សង្កាត់ដង្កោ រាជធានីភ្នំពេញ។
លោក នុត ពុធដារ៉ា អភិបាល នៃគណៈអភិបាលខណ្ឌដង្កោបានថ្លែងអំណរព្រះគុណយ៉ាងជ្រាលជ្រៅចំពោះទឹកព្រះទ័យរបស់ព្រះគ្រូចៅអធិការវត្តសំបួរមាស ដែលព្រះគ្រូតែងតែគិតគូរពីការលំបាកនានារបស់ប្រជាពលរដ្ឋក្រីក្រក្នុងមូលដ្ឋាន ដោយបានធ្វើពិធីចែកនូវអំណោយជូនដល់ប្រជាពលរដ្ឋក្រីក្រ និងតែងតែបានប្រគល់នូវទេយ្យវត្ថុនានាដល់សាលាខណ្ឌដង្កោ ដើម្បីធ្វើការងារមនុស្សធម៌ផងដែរ។ ដែលនេះជាគំរូមនុស្សធម៌ដ៏ល្អប្រពៃរបស់ព្រះគ្រូចៅអធិការ និងជាការឆ្លុះបញ្ចាំងនូវការផ្សារភ្ជាប់គ្នាយ៉ាងស្អិតរមួត រវាងវិស័យពុទ្ធចក្រ និងអាណាចក្រ។
លោកអភិបាលក៏បានលើកឡើងពីការអភិវឌ្ឍន៍រីកចម្រើនរបស់ប្រទេសជាតិ ក្រោមការដឹកនាំ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធ្វើឲ្យប្រជាពលរដ្ឋមានជីវភាពធូរធារ និងមានការរីកចម្រើនលើវិស័យព្រះពុទ្ធសាសនាផងដែរ៕
ប្រជាពលរដ្ឋ៣៥០គ្រួសារទទួលបានអំណោយពីលោក នុត ពុធដារ៉ា និងចៅអធិការវត្តសំបួរមាស
0 Comments