ភ្នំពេញ ៖ តារាសម្តែងជើងចាស់ធ្លាប់មានឈ្មោះល្បីល្បាញកាលពីជាង១០ឆ្នាំមុន អ្នកស្រី ចាន់ តារាទី ថ្មីៗនេះបានជួបហេតុការណ៍គ្រោះថ្នាក់ចរាចរណ៍មួយដែលបង្កឡើងរវាងម៉ូតូម៉ាកឌ្រីមសង់C125 ស៊េរីឆ្នាំ២០១៥ ពាក់ស្លាក់លេខ 1CY-11 38 បើកបរដោយបុរសម្នាក់ក្នុងស្ថានភាពស្រវឹងបើកបរដោយល្បឿនលឿន បានជ្រុលចង្កូតទៅបុកចំពីមុខចំហៀងខាងស្តាំរថយន្តម៉ាកឡិចស៊ីស RX300 របស់នាង ដែលពាក់ស្លាកលេខភ្នំពេញ 2R-2133 ដែលកំពុងបើកបញ្ច្រាសទិសគ្នាបណ្ដាលឲ្យរថយន្តបាក់កាងពីមុខ និងបែកធុងទឹក។ ចំណែកបុរសខាងលើដួលសន្លប់ប្រមាណ៥នាទីទើបដឹងខ្លួនឡើងវិញ។
អតីតតារាសម្តែងធ្លាប់ល្បីឈ្មោះអ្នកស្រី ចាន់ តារាទី បានប្រាប់កម្ពុជាថ្មីកាលពីវេលាម៉ោង១២ និង៣៥នាទីព្រឹក ថ្ងៃទី២០ ខែតុលាថា អ្នកស្រីពិតជាបានជួបគ្រោះថ្នាក់ចរាចរណ៍មែនកាលពីវេលាម៉ោង៨និង៣០នាទីយប់ ថ្ងៃទី២០ ខែតុលានេះ ប៉ុន្តែសំណាងដែលខ្លួនមិនរងគ្រោះថ្នាក់ ឬរបួសអ្វីនោះ។
តារាសម្តែងដែលឧស្សាហ៍លេចមុខជួយការងារសង្គម អ្នកស្រី ចាន់ តារាទី បាននិយាយរៀបរាប់ឲ្យដឹងទៀតថា នៅយប់ថ្ងៃកើតហេតុខាងលើនេះ គឺអ្នកស្រីបានធ្វើដំណើរត្រឡប់មកពីស្រុកកំណើតនៅឯខេត្តកំពង់ឆ្នាំង ហើយចូលមកដល់ភ្នំពេញក៏ជិះកាត់តាមផ្លូវ៣៧១ (បឹងទំពុន) ក្នុងគោលបំណងឆ្ពោះទៅផ្ទះនៅបុរីពិភពថ្មីចម្ការដូង ប៉ុន្តែស្រាប់តែមកដល់កន្លែងកើតហេតុ ក៏ត្រូវបុរសម្នាក់ស្ថិតក្នុងភាពស្រវឹងបានបើកម៉ូតូទៅបុកជាមួយរថយន្តនាងតែម្ដង។ បន្ទាប់ពីកើតហេតុបែបនេះអ្នកស្រីក៏បានចុះទៅសម្របសម្រួលគ្នាជាមួយភាគីម្ចាស់ម៉ូតូដើម្បីសុំឲ្យជួយចេញថ្លៃសំណងជួសជុលនៃការខូចខាតបន្តិចបន្តួចដែរ ប៉ុន្តែខាងបុរសម្ចាស់ម៉ូតូមិនព្រម ក៏សម្រេចឲ្យប៉ូលិសយកទៅខណ្ឌ។
អ្នកស្រី ចាន់ តារាទី បានបន្ថែមថា អ្វីដែលខ្ញុំចង់បានពេលនោះគឺចង់ឲ្យភាគីម្ចាស់ម៉ូតូព្រមទទួលកំហុស និងសម្រួលជួយចេញថ្លៃសំណងនៃការខូចខាតរថយន្តខ្លះតែប៉ុណ្ណោះ ព្រោះរថយន្តខ្ញុំ ពេលហៅជាងទៅមើល គឺត្រូវចំណាយលុយធ្វើអស់ដល់៣៨០ដុល្លារក្នុងការជួសជុល។ ម្យ៉ាងទៀតកាលដែលខ្ញុំធ្វើបែបនេះគឺចង់ព្រមានទៅមនុស្សដែលបើកបរនៅពេលស្រវឹងមិនគិតអំពីបញ្ហានៃការបង្កគ្រោះថ្នាក់ដល់អ្នកដទៃដែលកំពុងប្រើប្រាស់លើផ្លូវជាមួយសោះ ដូចករណីនេះជាដើម។
ដោយឡែក បើយោងតាមសាក្សីអ្នកឃើញហេតុការណ៍បាននិយាយថា ដំបូងឡើយគេឃើញរថយន្តរបស់តារាសម្តែងអ្នកស្រី ចាន់ តារាទី បានធ្វើដំណើរតាមបណ្ដោយផ្លូវ៣៧១(បឹងទំពុន)ទិសដៅឆ្ពោះមករកចំណុចស្ពានដែកចម្ការដូង ប៉ុន្តែនៅពេលធ្វើដំណើរមកជិតដល់ស្ពាន ស្រាប់តែរថយន្តរបស់តារាសម្តែងរូបនេះបង្អង់ល្បឿនបម្រុងបត់ឆ្វេង ខណៈនោះស្រាប់តែមានម៉ូតូមួយគ្រឿងទៀតបើកបរដោយបុរសម្នាក់បើកបរក្នុងល្បឿនយ៉ាងលឿន ទំនងដូចជាស្រវឹងផងនោះ ក៏បានរេចង្កូតទៅបុករថយន្តរបស់អ្នកស្រី ចាន់ តារាទី ចំពីមុខយ៉ាងពេញទំហឹងតែម្ដង។
ប្រភពបានបន្តថា ក្រោយពេលកើតហេតុ ភ្លាមៗនោះគេឃើញតារាសម្តែង ចាន់ តារាទី បានបើកទ្វារចុះពីលើរថយន្តមកធ្វើការសម្រុះសម្រួលគ្នាជាមួយភាគីខាងម៉ូតូដែរ តែដោយសារការនិយាយចរចាមិនត្រូវគ្នា ក៏សម្រេចឲ្យខាងមន្ត្រីសមត្ថកិច្ចប៉ូលិសចរាចរណ៍ធ្វើការស្ទូចនាំយកទាំងរថយន្ត និងម៉ូតូ ទៅរក្សាទុកនៅអធិការដ្ឋាននគរបាលខណ្ឌមានជ័យដើម្បីដោះស្រាយគ្នានៅពេលក្រោយ។
ចំពោះលទ្ធផលនៃដំណោះស្រាយគ្នារវាងអ្នកស្រី ចាន់ តារាទី និងភាគីម្ចាស់ម៉ូតូ នៅអធិការដ្ឋាននគរបាលខណ្ឌមានជ័យយ៉ាងណានោះយើងមិនដឹងនៅឡើយទេ ព្រោះខាងសមត្ថកិច្ចកំពុងទាក់ទងហៅខាងបុរសម្ចាស់ម៉ូតូ និងអ្នកស្រី ចាន់ តារាទី ចូលទៅដោះស្រាយគ្នានៅរសៀលម៉ោង២ ឬ៣រសៀលថ្ងៃទី២១ ខែតុលា ប៉ុន្តែគេក៏មិនដឹងថាភាគីទាំងសងខាងចូលខ្លួនដោះស្រាយឬមួយយ៉ាងណាទេ៕
ចាន់ តារាទី ៖ ខ្ញុំមិនចង់បានអ្វីលើសពីសំណងនៃការខូចខាតរថយន្តទេ
0 Comments