ព្រះសីហនុ ៖ លោកមេធាវីជា ហៃ ដែលគេអះអាងថាជាកូនប្រសាលោកគង់ ស្រីវ អនុប្រធានតុលាការកំពូលក្រុងភ្នំពេញនៅរសៀលថ្ងៃទី២០ ខែតុលា ឆ្នាំ២០១៥នេះ ត្រូវបានសមត្ថកិច្ចប៉ូលិសការិយាល័យព្រហ្មទណ្ឌស្នងការដ្ឋាននគរបាលខេត្តព្រះសីហនុធ្វើការឡោមព័ទ្ធចាប់ខ្លួននៅក្នុង ហាងរកស៊ីទិញ លក់ និងបញ្ចាំមួយកន្លែងត្រង់ចំណុចខាងមុខក្លិបកម្សាន្ត(៣៣៣) តំបន់ជាប់របងមន្ទីរពេទ្យបង្អែកខេត្ត(ពេទ្យចំការចេក)ស្ថិតនៅក្នុងភូមិលេខ៤ សង្កាត់លេខ៤ ក្រុងព្រះសីហនុ រួចបញ្ជូនខ្លួនភ្លាមៗទៅកាន់ស្នងការដ្ឋាននគរបាលខេត្ត ពាក់ព័ន្ធបណ្ដឹងចោទប្រកាន់ប្រើអំពើហិង្សា និងលួចសហាយស្មន់ ប្រពន្ធអ្នកដទៃ។ ក្នុងហេតុការណ៍ចាប់ខ្លួននេះបានបង្កឲ្យមានការភ្ញាក់ផ្អើលមនុស្សម្នាស្ទើរមួយក្រុងព្រះសីហនុ។
លោកម៉ែន វន្នី នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តព្រះសីហនុបានបញ្ជាក់ឲ្យដឹងថា លោកជា ហៃ ជាមេធាវី ត្រូវបានបុរសម្នាក់ឈ្មោះ គុណ ប៊ុនថា ដាក់ពាក្យប្តឹងចោទប្រកាន់ចំនួន២ករណី គឺករណីប្រើអំពើហិង្សា និងករណីលួចសហាយស្មន់ ប្រពន្ធរបស់គាត់ឈ្មោះឯម រ៉ានី។
សមត្ថកិច្ចប៉ូលិសក្រោយពីទទួលបានពាក្យបណ្តឹង ក៏បានចុះទៅធ្វើការភ្លាមៗ ខណៈពេលរូបគាត់(លោកមេធាវីឈ្មោះ ជា ហៃ)កំពុងមានវត្តមាន នៅក្នុងហាងរកស៊ី សេវាកម្មបញ្ចាំខាងលើ ក្នុងគោលបំណងអញ្ជើញឲ្យចូលខ្លួនតាមសម្រួល ទៅបំភ្លឺនៅស្នងការដ្ឋាននគរបាលខេត្តព្រះសីហនុ ពាក់ព័ន្ធនឹងបណ្តឹងចោទប្រកាន់ខាងលើ។ ប៉ុន្តែដោយសាររូបគាត់មិនព្រមទៅតាម ការអញ្ជើញ សមត្ថកិច្ចក៏បង្ខំចិត្តអនុវត្តន៍តាមនីតិវិធីច្បាប់បង្កឲ្យមានភាពភ្ញាក់ផ្អើលក្នុងពេលនោះតែម្តង។
នៅចំពោះមុខសមត្ថកិច្ចលោកមេធាវី ជា ហៃ បានធ្វើការបដិសេធទាំងស្រុងទៅនឹងបណ្តឹងចោទប្រកាន់ខាងលើ ដោយលោកបានធ្វើការបញ្ជាក់ថា រវាងលោក និងស្ត្រីឈ្មោះ ឯម រ៉ានី គឺជាដៃគូរកស៊ីដាក់ហ៊ុនជាមួយគ្នាក្នុងហាងសេវាកម្ម ទិញ លក់ និងបញ្ចាំ(យីហោអានី) នៅកន្លែងកើតហេតុខាងលើ ហើយក៏គ្មានទំនាក់ទំនងអ្វីពាក់ព័ន្ធរឿងស្នេហានោះទេ។ ក្រោយពីប៉ូលិសធ្វើការសាកសួរចប់ លោកជា ហៃត្រូវ បានដោះលែងវិញភ្លាមៗ បន្ទាប់ពីមានមេធាវីរបស់គាត់ឈ្មោះឈុន ជ្រា បំពេញបែបបទសុំធ្វើការធានា។
លោកគុណ ប៊ុនថា ដែលជាដើមបណ្តឹងបាននិយាយរៀបរាប់ប្រាប់ឲ្យដឹងថា ប្រពន្ធរបស់គាត់ឈ្មោះឯម រ៉ានី និងឈ្មោះជា ហៃជាមេធាវី នេះគឺជាអ្នករកស៊ីបើកសេវាកម្មហាង ទិញ លក់ និងបញ្ចាំដាក់ហ៊ុនជាមួយគ្នា។
លោកបានបន្តថា ក្រោយពីប្រពន្ធរបស់លោករកស៊ីដាក់ហ៊ុនជាមួយឈ្មោះ ជា ហៃ រួចមក រូបគាត់ និងប្រពន្ធតែងតែមានបញ្ហារកាំរកូសជាប្រចាំគឺមិនបានយកចិត្តទុកដាក់ក្នុងគ្រួសារនោះទេ តែផ្ទុយទៅវិញប្រពន្ធគាត់បែរទៅជាទៅយកចិត្តទុកដាក់ជាមួយ ឈ្មោះជា ហៃ យ៉ាងល្អូកល្អើន យ៉ាងស៊ីសង្វាក់ ហាក់ដូចជាប្តីយ៉ាងដូចច្នេះដែរ ហើយទៅណាមកណាគឺទៅជាមួយគ្នា ត្រសង និងនៅជាមួយគ្នាក្នុងបន្ទប់ តែមួយគ្នា(ក្នុងហាងបញ្ចាំ)ជាហេតុធ្វើមានការរិះគន់ពីសំណាក់ប្រជាពលរដ្ឋដែលរស់នៅក្បែរៗនោះយ៉ាងចាស់ដៃ។ អ្វីដែលគួរឲ្យកត់សម្គាល់បំផុតនោះគឺបុគ្គលឈ្មោះជា ហៃ នេះ តែងតែមកពីក្រុងភ្នំពេញ មកដេកស្នាក់នៅក្នុងបន្ទប់ ក្នុងហាងបញ្ចាំក្នុងមួយសប្ដាហ៍៣ទៅ៤ថ្ងៃ ព្រមទាំងមានអង្គរក្សមកជាមួយ២ទៅ៣នាក់ផងដែរ។ ក្រោយពីរពិនិត្យឃើញទង្វើបែបផិតក្បត់របស់ប្រពន្ធគាត់ និងឈ្មោះជា ហៃ រូបលោក និងក្រុមគ្រួសារបានព្យាយាមនិយាយជាមួយប្រពន្ធឈ្មោះឯម រ៉ានី ឲ្យឈប់រកស៊ីដាក់ហ៊ុន ជាមួយឈ្មោះជា ហៃតទៅទៀត។ ប៉ុន្តែជាលទ្ធផលប្រពន្ធគាត់ និងឈ្មោះជាហៃ នៅតែមិនព្រម និងនៅតែបន្តធ្វើការទំនាក់ទំនងជាមួយគ្នាលើសដើម។ អ្វីដែលគួរឲ្យឈឺចាប់ជាងនេះទៅទៀតនោះគឺពួកគេទាំងពីរនាក់ បានរួមគ្នាបង្កហិង្សាមកលើរូបលោក(គុណ ប៊ុនថា)ទាំងកម្រោល ខណៈពេលរូបលោកឃើញពួកគេនៅជាមួយគ្នា ដោយគ្រាន់តែរូបលោកធ្វើការសួរនាំបន្តិចបន្តួចប៉ុណ្ណោះ។ ជាចុងក្រោយរូបលោកគ្មានជម្រើសក៏បានដាក់ពាក្យបណ្ដឹងសូមឲ្យសមត្ថកិច្ចប៉ូលិសធ្វើការតាមផ្លូវច្បាប់តែម្តង ដោយសង្ឃឹមថារូបលោក នឹងទទួលបានភាពយុត្តិធម៌ និងកិត្តិយសក្នុងនាមជាប្តីស្របច្បាប់៕
លោកមេធាវីជា ហៃ ត្រូវប៉ូលិសឡោមព័ទ្ធចាប់ខ្លួនផ្អើលពេញក្រុងព្រះសីហនុពាក់ព័ន្ធលួចសហាយស្មន់ប្រពន្ធគេ
0 Comments