*ថវិការបស់គណៈកម្មាធិការជាតិរៀបចំការបោះឆ្នោត (គ.ជ.ប) កើនឡើងជាង៧០០ ភាគរយសម្រាប់ឆ្នាំ២០១៦
ភ្នំពេញ ៖ គណៈកម្មាធិការជាតិរៀបចំការបោះឆ្នោត បានសម្តែងក្តីបារម្ភពីជំនួយរបស់សហភាពអឺរ៉ុប ដែលផ្តល់មិនទាន់ពេលវេលា ពីព្រោះការចុះឈ្មោះបោះឆ្នោតនឹងចាប់ផ្តើមពីថ្ងៃទី០១ ខែមីនា ឆ្នាំ២០១៦ ប៉ុន្តែមកដល់ពេលនេះ នៅមិនទាន់បានចុះហត្ថលេខាលើអនុស្សរណៈយោគយល់គ្នា អំពីការផ្តល់ជំនួយនៅឡើយទេ ដើម្បីឲ្យប្រាកដថា នឹងមានចំនួនទឹកប្រាក់ប៉ុន្មានសម្រាប់ធ្វើការងារ។
ការបារម្ភនេះ បានធ្វើឡើងបន្ទាប់ពីជំនួប ពិភាក្សាការងាររវាងតំណាង គ.ជ.ប ដឹកនាំដោយលោក គួយ ប៊ុនរឿន អនុប្រធានគ.ជ.ប ជាមួយតំណាងសហភាពអឺរ៉ុប កញ្ញា ហ្វីអូណា រ៉ាមស៊ី (Ms. Fiona RAMSRY) ប្រធានផ្នែកសហប្រតិបត្តិការ កញ្ញា វៀជីនី ឡាផ្លី ថាយ (Miss Virginie LAFALEUR TIGHE) អនុព័ន្ធផ្នែកអភិបាលកិច្ចល្អ និងសិទ្ធិមនុស្ស និងជំនាញការពីររូបដែលត្រូវចូលមកធ្វើការនៅទីស្តីការ គ.ជ.ប គឺ លោករ៉ូណាន ម៉ាកឌឺម៉ត (Mr. Ronan McDermott) ផ្នែក IT និងកញ្ញា ម៉ារីយ៉ា (Ms. Maria Macchiaverna) ផ្នែកបណ្តុះបណ្តាល និងអប់រំអ្នកបោះឆ្នោត កាលពីរសៀលថ្ងៃទី២០ ខែតុលា ឆ្នាំ២០១៥។
លោក គួយ ប៊ុនរឿន បានលើកឡើងពីការផ្តល់ជំនួយរបស់ភាគីសហភាពអឺរ៉ុប និងមានការព្រួយបារម្ភចំពោះជំនួយអាចមកមិនទាន់ពេលព្រោះថា មកទល់ពេលនេះពុំទាន់មានការចុះហត្ថលេខាលើអនុស្សរណៈយោគយល់គ្នាអំពីការផ្តល់ជំនួយទេ ដើម្បីឲ្យប្រាកដថា នឹងមានចំនួនទឹកប្រាក់ប៉ុន្មាន និងសម្ភារៈដែលត្រូវផ្តល់ជូន គ.ជ.ប នឹងត្រូវមកដល់នៅពេលណា។
លោកបន្តថា បើពិនិត្យទៅលើផែនការចុះឈ្មោះបោះឆ្នោត ដើម្បីបង្កើតបញ្ជីបោះឆ្នោតថ្មី ដែលនឹងត្រូវធ្វើនៅថ្ងៃទី០១ ខែមីនា ឆ្នាំ២០១៦ និងពិនិត្យទៅលើនីតិវិធីនៃការផ្តល់ជំនួយរបស់សហភាពអឺរ៉ុប អាចមានការយឺតពេល។
ឆ្លើយតបទៅនឹងការលើកឡើងរបស់ភាគី គ.ជ.ប នេះ កញ្ញា ហ្វីអូណា រ៉ាមស៊ី បានមានប្រសាសន៍ថា សហភាពអឺរ៉ុប មានការពេញចិត្តចំពោះដំណើរការកែទម្រង់ការបោះឆ្នោតនៅកម្ពុជា ហើយនៅថ្ងៃទី២៨ ខែតុលា ឆ្នាំ២០១៥ សហភាពអឺរ៉ុប នឹងធ្វើការសម្រេចលើថវិកាសម្រាប់ជួយដល់គ.ជ.ប បន្ទាប់ពីនេះនឹងមាននីតិវិធីទាក់ទងនឹងការទទួលជំនួយពីសហភាពអឺរ៉ុប។
កញ្ញា ហ្វីអូហា រ៉ាមស៊ី បានបន្តថា នៅដើមឆ្នាំ២០១៦ ជំនួយនេះអាចនឹងមកដល់។ ទាក់ទិននឹងបញ្ហានេះដែរ យោងតាមសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦ ដែលបានពិភាក្សា នៅក្នុងកិច្ចប្រជុំគណៈរដ្ឋមន្ត្រីកាលពីព្រឹកថ្ងៃពុធ ទី២១ ខែតុលា ឆ្នាំ២០១៥ រាជរដ្ឋាភិបាលគ្រោងនឹងបង្កើនថវិកា ទៅដល់គណៈកម្មាធិការជាតិរៀបចំការបោះឆ្នោត (គ.ជ.ប) ដល់ទៅជាង២៨ លានដុល្លារសម្រាប់ឆ្នាំ២០១៦ ដែលចំនួននេះ មានកំណើនជាង៧០០ ភាគរយ បើប្រៀបធៀបនឹងឆ្នាំ២០១៥។
បើតាមសេចក្តីព្រាងច្បាប់ថវិកាជាតិឆ្នាំ២០១៦ ថវិកាសម្រាប់ គ.ជ.ប មានចំនួន១១៤៨៣៩លានរៀលដែលស្មើនឹងជាង២៨,៣ លានដុល្លារអាមេរិក មានសមាមាត្រស្នើនឹង១ ភាគរយនៃចំណាយចរន្តថវិកាជាតិ។ ទំហំថវិកានេះមានកំណើន៧៦៣,៥ភាគរយ ធៀបនឹងឆ្នាំ២០១៥។
បើតាមសេចក្តីព្រាងច្បាប់ ការបង្កើនថវិកាដល់ គ.ជ.ប គឺសម្រាប់ការគាំទ្រទៅដល់ការកែទម្រង់ការបោះឆ្នោត ជាពិសេសការចុះឈ្មោះបោះឆ្នោតតាមប្រព័ន្ធកុំព្យូទ័រ។
ទាក់ទងបញ្ហានេះ លោក គួយ ប៊ុនរឿន អនុប្រធាន គ.ជ.ប មានថ្លែងប្រាប់បណ្តាញព័ត៌មានថា ការបង្កើនថវិការបស់ គ.ជ.ប ដោយសារឆ្នាំ២០១៦ ជាឆ្នាំសម្រាប់ការចុះឈ្មោះបោះឆ្នោត ហើយ គ.ជ.ប បានប្រើប្រាស់បច្ចេកវិទ្យាទំនើប និងមន្ត្រីច្រើនជាងមុន រហូតដល់ជាង៧០០០ នាក់។ លោកបន្តថា ក្រុមការងារ គ.ជ.ប ប្រមាណ២៤០០ក្រុម ដែលក្នុងមួយក្រុមមានគ្នា៣ នាក់ នឹងធ្វើការនៅតាមមូលដ្ឋានសម្រាប់ការចុះឈ្មោះបោះឆ្នោត។
បើតាមលោក គួយ ប៊ុនរឿន អះអាងថា ការងារចុះឈ្មោះបោះឆ្នោតមានរយៈពេល៣ ខែសម្រាប់ប្រជាពលរដ្ឋទៅដល់ជាង១០ លាននាក់នៅទូទាំងប្រទេស។ លោកឲ្យដឹងទៀតថា សម្រាប់ឆ្នាំក្រោយៗទៀត គ.ជ.ប នឹងពិនិត្យមើលជាក់ស្តែង ថាតើនឹងត្រូវបង្កើនថវិកាទៀត ឬយ៉ាងណា អាស្រ័យទៅតាមគម្រោងជាពិសេសការអប់រំប្រជាពលរដ្ឋ និងការផ្សព្វផ្សាយពីការបោះឆ្នោត និងលទ្ធិប្រជាធិបតេយ្យ៕
គណៈកម្មាធិការជាតិរៀបចំការបោះឆ្នោតបារម្ភពីជំនួយរបស់សហភាពអឺរ៉ុបផ្តល់មិនទាន់ពេលវេលា
0 Comments