ពិធីសារស្ដីពីកិច្ចព្រមព្រៀងសាងសង់ពហុកីឡាដ្ឋានជាតិមរតកតេជោ កិច្ចព្រមព្រៀងផ្ដល់ថវិកា កិច្ចព្រមព្រៀងវិនិយោគលើវិស័យឧស្សាហកម្ម និងកៅស៊ូ កិច្ចព្រមព្រៀងការបណ្ដុះបណ្ដាលវិនិយោគ និងកសិឧស្សាហកម្ម និងកិច្ចប្រមព្រៀងទិញអង្ករពីកម្ពុជាក្នុងមួយឆ្នាំ១០ម៉ឺនតោន ដែលចាប់អនុវត្តពីឆ្នាំ២០១៦តទៅត្រូវបានចុះហត្ថលេខា ក្រោយជំនួបពិភាក្សាការងាររវាង សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិង ឯកឧត្ដម ស៊ី ជិងពីង ប្រធានាធិបតី នៃសាធារណរដ្ឋប្រជាមានិតចិន នារសៀលថ្ងៃទី ១៥ ខែតុលាឆ្នាំ២០១៥ នៅវិមានរដ្ឋទីក្រុងប៉េកាំង។
តាមបេសកជនពិសេសរបស់ទូរទស្សន៍ជាតិបានឱ្យដឹងថា ក្នុងជំនួបដែលពោរពេញដោយភាពស្និតស្នាលនេះ ឯកឧត្តម ស៊ី ជីងពីង បានសំដែងនូវការស្វាគមន៏សម្តេចតេជោនាយករដ្ឋមន្ត្រីដែលបានដឹកនាំគណៈប្រតិភូអញ្ជើញចូលរួមកិច្ចប្រជុំនៅទីក្រុងប៉េកាំង។ ឯកឧត្តម ស៊ី ជីងពីង បានមានប្រសាសន៏អបអរសាទរសម្តេចតេជោដែលទទួលបានការគាំទ្រជាប់ជាប្រធានគណបក្សប្រជាជនកម្ពុជា។ ឯកឧត្តម ស៊ី ជីងពេញ បានមានប្រសាសន៏ថា ឆ្នាំនេះព្រះមហាក្សត្រកម្ពុជាបានយាងចូលរួមខួបទី៧០នៅប្រទេសចិន ។ ឯកឧត្តម ស៊ី ជីងពេញ បានមានប្រសាសន៍បន្តថា កន្លងទៅនេះគណបក្សកុម្មុយនីស្តចិនតែងតែគាំទ្រដល់កម្ពុជា ហើយកម្ពុជាក៏មានទំនាក់ទំនងល្អជាមួយនឹងប្រទេសចិនជាយូរលង់ណាស់មកហើយ។ ជាការឆ្លើយតបសម្តេចតេជោនាយកដ្ឋមន្ត្រី បានមានប្រសាសន៏ថ្លែងអំណរគុណដល់ឯកឧត្តម ស៊ី ជីងពីដែលបានអញ្ជើញសម្តេចចូលរួមកិច្ចប្រជុំពិសេសរបស់គណបក្សនយោបាយអាស៊ី និងថ្លែងអំណរគុណដល់ឯកឧត្តម ស៊ី ជីងពីង ដែលបានអបអរសាទរសម្តេចជាប់ជាប្រធានគណបក្សប្រជាជនកម្ពុជា។ សម្តេចតេជោក៏បានមានប្រសាសន៏អបអរសាទរដល់ប្រទេសចិនដល់បានប្រារព្ធខួបលើកទី៧០ និងអបអរសាទរនូវសមិទ្ធផលដែលចិនមានការរីកចម្រើន ជាពិសេសចិនជាប្រទេសបានចូលរួមចំណែកផ្តល់វិភាគទានដល់ប្រទេសកំពុងអភិវឌ្ឍន៏ សម្ដេចក៏បានគាំទ្រដល់គោនយោបាយសេដ្ឋកិច្ចផ្លូវសូត្រ ដែលជាគំនិតផ្ដួចផ្ដើមពីរដ្ឋាភិបាលចិន។ ដោយឡែកទាក់ទិននឹងធនាគារវិនិយោគហេដ្ឋារចនាសម្ព័ន្ធអាស៊ី សម្តេចបានមានប្រសាសន៏ថា ជាកត្តាសំខាន់ណាស់សំរាប់ប្រទេសកម្ពុជា និងប្រទេសក្នុងតំបន់ កម្ពុជានឹងរៀបចំអនុម័តនូវឯកសារទាំងឡាយដើម្បីចូលរួមជាមួយធនាគារវិនិយោគហេដ្ឋារចនាសម្ព័ន្ធអាស៊ី។ សម្ដេចក៏បានថ្លែងអំណរគុណដល់រដ្ឋាភិបាលចិនដែលតែងតែយកចិត្តទុក្ខដាក់ព្យាបាលព្រះរាជសុខភាពរបស់ព្រះមហាក្សត្រ និងសម្តេចព្រះមហាក្សត្រីកន្លងទៅនេះ ។នៅក្នុងជំនួបនេះសម្ដេចតេជោនាយករដ្ឋមន្ត្រីបានមានប្រសាសន៍ស្នើដល់ភាគីចិនឲ្យជួយបណ្តុះបណ្តាលដល់យុវជន និងស្ត្រីកម្ពុជា ជាពិសេសកិច្ចសហប្រតិបត្តិការឲ្យកាន់តែស៊ីជម្រៅ ។ សម្ដេចតេជោនាយករដ្ឋមន្ត្រីក៏បានថ្លែងអំណរគុណនូវជំនួយដែលភាគីចិនជួយដល់ការសាងសង់ពហុកីឡាដ្ឋាននៅកម្ពុជាក្នុងឱកាសដែលកម្ពុជាធ្វើជាប្រធានស៊ីហ្គេមនៅឆ្នាំ២០២៣។ សម្តេចតេជោក៏បានស្នើឲ្យភាគីចិនទិញអង្ករកម្ពុជាឲ្យបានមួយឆ្នាំ១០ម៉ឺនតោន និងស្នើឲ្យរដ្ឋាភិបាលចិនមានកូតាថែមទៀតក្នុងការនាំអង្ករពីកម្ពុជាចូលប្រទេសចិន និងនាំចូលនូវកៅស៊ូកម្ពុជាមកកាន់ប្រទេសចិនផងដែរ។ សម្តេចក៏បានស្នើសុំឲ្យរដ្ឋាភិបាលចិនជំរុញអ្នកវិនិយោគទៅកាន់ប្រទេសកម្ពុជា។ឆ្លៀតក្នុងឱកាសនេះសម្តេចតេជោបានអញ្ជើញឯកឧត្តម ស៊ី ជិងពីង ទៅទស្សនកិច្ចនៅកម្ពុជាផងដែរ។ ជាការឆ្លើយតប ឯកឧត្តម ស៊ី ជិងពីង ចង់ឃើញកម្ពុជានិងចិនមានកិច្ចសហប្រតិបត្តការថែមទៀត ឯកឧត្តម ស៊ី ជិងពីងបានមានប្រសាសន៏ថា សម្តេចតេជោនាយករដ្ឋមន្ត្រីគឺជាបងប្អូនពិតនៃប្រទេសចិន និងបន្តបណ្តុះបណ្តាលធនធានមនុស្សសំរាប់ប្រទេសកម្ពុជា ។ ឯកឧត្តម ស៊ី ជិងពីង បានបញ្ជាក់ថា នឹងជំរុញឲ្យមានកូតានាំអង្ករពីកម្ពុជាចូលប្រទេសចិនឲ្យបាន១០ម៉ឺនតោនដូចអ្វីដែលសម្ដេចតេជោនាយករដ្ឋមន្ត្រីស្នើសុំ និងជំរុញអ្នកវិនិយោគ អ្នកទេសចរណ៍ចិនទៅកាន់ប្រទេសកម្ពុជាឲ្យបានកាន់តែច្រើន ជាពិសេសភាគីចិនបានឯកភាពផ្តល់ជំនួយឥតសំណងដល់កម្ពុជាចំនួន១ពាន់លានយ័ន និងជួយកសាងមន្ទីរពេទ្យនៅខេត្តត្បូងឃ្មុំផងដែរ៕
កិច្ចព្រមព្រៀងមួយចំនួន៥ ត្រូវបានចុះហត្ថលេខាក្រោយជំនួបរវាងសម្ដេចតេជោ និងឯកឧត្ដមប្រធានាធិបតីចិន
0 Comments