ពោធិ៍សាត់ ៖ វត្តមានលោកសំ ថាន់ ប្រធាននាយកដ្ឋានកិច្ចការរដ្ឋបាល និងនីតិកម្មរដ្ឋបាលជលផល, លោកកើត គា ប្រធានការិយាល័យវិវាទកម្មរដ្ឋបាលជលផល និងលោកភុំ វិមល នាយខណ្ឌរដ្ឋបាលជលផលពោធិ៍សាត់ និងអនុប្រធាន ប្រធានផ្នែក ព្រមទាំងក្រុមជំនាញមន្ត្រីជលផលទាំងអស់បានរូតរះមកទាំងព្រឹកព្រលឹមជួបជុំគ្នាដោយស្ងាត់ស្ងៀមនៅស្នាក់ការផ្នែកជលផលក្រគរ នាព្រឹកថ្ងៃទី១៦ ខែតុលា ឆ្នាំ២០១៥ ដើម្បីប្រកាសផ្ទេរផ្ទួនដោះដូរទីតាំងភារកិច្ច ធ្វើការងារមន្ត្រីជំនាញសង្កាត់ជលផលទាំងបីសង្កាត់យ៉ាងប្រញាប់ប្រញាល់បញ្ចប់ភ្លាមៗតែម្ដង។
បើតាមលោកសុង លី មន្ត្រីរដ្ឋបាលជលផលពោធិ៍សាត់បានឲ្យដឹងនៅព្រឹកថ្ងៃទី១៦ ខែតុលានេះថា ការប្រកាសផ្លាស់ប្ដូរគោលដៅគ្រប់គ្រង ការងារជលផល គឺប្រកាសទាំងបីសង្កាត់តែម្ដង ដោយលោកផេម សុខុន អតីតនាយសង្កាត់កំពង់លួង និងលោកសោម រិទ្ធី ជាអនុ ក្នុងផ្នែកក្រគរត្រូវទៅគ្រប់គ្រងទទួលខុសត្រូវនៅសង្កាត់ជលផលបាកាន ដែលមានទីតាំងឈរជើងនៅចំណុចដីរនាថ ចំណុះឲ្យផ្នែកបាកាន។ ដោយឡែកលោកភុន វណ្ណា អតីតនាយសង្កាត់ជលផលបាកានជាមួយនឹងលោក ហម ណារិន អនុប្រធានសង្កាត់ ត្រូវមកទទួលភារកិច្ចការងារទទួលខុសត្រូវបង្ក្រាបបទល្មើស និងមើលថែអភិរក្សមច្ឆជាតិនៅ សង្កាត់កណ្ដៀង ចំណុះឲ្យផ្នែករដ្ឋបាលជលផលក្រគរ។ លោកសុង លី បន្តថា ចំពោះលោក ពិន វុទ្ធី អតីតនាយសង្កាត់ជលផលកណ្ដៀងជាមួយលោក សុខ រិន ជាអនុប្រធានសង្កាត់ ត្រូវបានដោះដូរទទួលកិច្ចការងារគ្រប់គ្រងបង្ក្រាបបទល្មើសនៅសង្កាត់កំពង់លួង ចំណុះឲ្យផ្នែករដ្ឋបាលជលផលក្រគរដដែល។ ក្នុងពិធីប្រកាសដ៏ស្ងៀមស្ងាត់នោះ លោកភុំ វិមល នាយខណ្ឌជលផលពោធិ៍សាត់ ក៏បានឡើងអានពីរបាយការណ៍ពីការខំប្រឹងប្រែងរបស់ជំនាញជលផលដែលបានចុះបង្ក្រាបបទល្មើសនេសាទបានច្រើនកន្លែងនាពេលកន្លងមក រួមទាំងការជួបឧបសគ្គមួយចំនួន ពេលដែលជំនាញចុះទៅបង្ក្រាបបទល្មើស ក្នុងការជួបជាមួយជនល្មើស និងបំពេញសំណុំរឿងទៅតុលាការដើម្បីឲ្យថ្នាក់ដឹកនាំបានដឹង។ ចំពោះការប្រកាសសមាសភាពផ្លាស់ប្ដូរភារកិច្ចទីតាំងការងារគ្រប់គ្រងទាំងបីសង្កាត់នេះ ក៏មានការស្ដីបន្ទោសភាពអវិជ្ជមានរបស់សង្កាត់ទាំងបីពីសំណាក់លោក សំ ថាន់ ប្រធាននាយកដ្ឋានកិច្ចការរដ្ឋបាល និងនីតិកម្មរដ្ឋបាលជលផលផងដែរ ដែលមន្ត្រីទាំងនោះធ្វើឲ្យឆកល្វែងមានបទល្មើសកើតឡើង។ លោកសំ ថាន់ ក៏បានកោតសរសើរនូវភាពវិជ្ជមានពីស្នាដៃរបស់សង្កាត់ទាំងបីក្នុងការបង្ក្រាបបទល្មើស ការពារតំបន់អភិរក្សទទួលបានការគាំទ្រពីថ្នាក់ដឹកនាំ និង សូមឲ្យបន្តការការពារបង្ក្រាបបទល្មើសនេះតទៅទៀតឲ្យដូចភ្លៀងរលឹម។ ការប្រកាសស្ងាត់ស្ងៀម និងធ្វើដោយប្រញាប់ប្រញាល់នេះត្រូវបានមតិមហាជនជាច្រើនរិះគន់ថា ផ្នែកជំនាញជលផលប្រកាសដូរសង្កាត់ទាំងផ្ទាំង ហើយលួចលាក់ដូចមានអាថ៌កំបាំងអ្វីមួយអីចឹង។ តែយ៉ាងណា ក៏មានមតិមួយចំនួនតូចនិយាយថា គេប្រកាសស្ងាត់ស្ងៀមអញ្ចឹងហើយបានល្អព្រោះមិនចង់ឲ្យពួកប្រព្រឹត្តបទល្មើសនេសាទខុសច្បាប់ដឹង ហើយក៏ជាផ្លាស់ប្ដូរបទពិសោធន៍ ទីតាំងបង្ក្រាបបទល្មើសឲ្យមានប្រសិទ្ធភាពផងដែរ។ ប៉ុន្តែការលើកឡើងខាងលើ ដែលសុទ្ធតែមានហេតុផលនេះ ក៏ត្រូវបានក្រុមអង្គការឃ្លាំមើល និយាយពេញត្រចៀកដល់អ្នកយកព័ត៌មានថា រង់ចាំមើលបន្តិចទៅនឹងដឹងហើយថាតើជំនាញដែលថ្នាក់លើផ្លាស់ប្ដូរភូមិសាស្ត្រគ្រប់គ្រងបង្ក្រាបបទល្មើស និងការការពារ មានប្រសិទ្ធភាពជាងមុន ឬក៏មានកើនឡើងបទល្មើសជាងមុននៅតាមគោលដៅរបស់ពួកគេគ្រប់គ្រង៕
ផ្ទេរផ្ទួនដោះដូរទីតាំងការងារទាំងបីសង្កាត់ក្នុងខណ្ឌជលផលពោធិ៍សាត់
0 Comments