ភ្នំពេញ ៖ ក្រុមគ្រួសារជនរងគ្រោះករណីគ្រោះថ្នាក់ចរាចរណ៍រថយន្តដឹកដីបើកបុករ៉ឺម៉កម៉ូតូដឹកដែក នៅក្នុងទឹកដីខណ្ឌដង្កោបណ្ដាលឲ្យមនុស្ស២នាក់ទទួលរងរបួសធ្ងន់ធ្ងរកាលពីពេលកន្លងទៅថ្មីៗនេះ រហូតមកដល់ព្រឹកថ្ងៃទី១៦ ខែតុលា ឆ្នាំ២០១៥ នៅចំពោះមុខសមត្ថកិច្ចនគរបាលចរាចរណ៍ខណ្ឌដង្កោ ពួកគាត់ត្រូវទាមទារសំណងថ្លៃព្យាបាលចំនួន៦.០០០ពាន់ដុល្លារសហរដ្ឋអាមេរិក។ ប៉ុន្តែការណាត់ជួបគ្នារវាងភាគីទាំង២របស់សមត្ថកិច្ចនាព្រឹកថ្ងៃទី១៦ ខែតុលា ឆ្នាំ២០១៥នេះ ត្រូវបានរំសាយទៅវិញ ដោយសារភាគីខាងរថយន្តដឹកដីបង្កហេតុមិនព្រមចូលខ្លួនដោះស្រាយ ធ្វើឲ្យភាគីខាងជនរងគ្រោះមិនសូវសប្បាយចិត្តនោះទេ ខណៈដែលបងប្អូនរបស់គាត់ដែលជាជនរងគ្រោះទាំង២នាក់ កំពុងតែសង្គ្រោះបន្ទាន់នៅមន្ទីរពេទ្យព្រះកុសុមៈ ហើយរហូតមកដល់ពេលនេះ គឺពួកគាត់ត្រូវចំណាយលុយផ្ទាល់ខ្លួនសម្រាប់ថ្លៃព្យាបាលសរុបប្រមាណជាង៤.០០០ដុល្លារមកហើយ។
សូមបញ្ជាក់ឲ្យដឹងថា កាលពីវេលាម៉ោង១៥និង១០នាទីរសៀល ថ្ងៃទី០៥ ខែតុលា ឆ្នាំ២០១៥ នៅចំណុចតាមបណ្ដោយផ្លូវព្រៃស កែងផ្លូវលំ ចូលវត្តឫស្សីសាញ់ ស្ថិតក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ មានករណីគ្រោះថ្នាក់ចរាចរណ៍មួយកើតឡើង បង្កដោយរថយន្តដឹកដី មួយគ្រឿង បើកបុករ៉ឺម៉កម៉ូតូដឹកដែក បណ្ដាលឲ្យយុវជន២នាក់ទទួលរងរបួសធ្ងន់ធ្ងរ ត្រូវបានរថយន្តសង្គ្រោះបន្ទាន់របស់មន្ទីរពេទ្យបង្អែកដង្កោជួយអន្តរាគមន៍ដឹកយកទៅសង្គ្រោះនៅមន្ទីរពេទ្យភ្លាមៗ ។ ចំណែកអ្នកបើកបររថយន្តបង្កហេតុមិនស្គាល់អត្តសញ្ញាណនោះទេ ក្រោយពីកើតហេតុបានរត់គេចខ្លួនបាត់ស្រមោល ដោយបន្សល់ទុករថយន្តនៅកន្លែងកើតហេតុ។
យុវជនទាំងពីរនាក់ដែលរងរបួស ទី១-ឈ្មោះ ឈាន វិន ភេទប្រុស អាយុ២១ឆ្នាំ មុខរបរជាងដែក ស្នាក់នៅឃ្លាំងដែក សង្កាត់បឹងទំពុន ខណ្ឌមានជ័យ មានស្រុកកំណើតនៅស្រុកកោះធំ ខេត្តកណ្តាល (អ្នកបើករ៉ឺម៉ក) និងទី២-ឈ្មោះ ឡា ឡយ ភេទប្រុស អាយុ១៥ឆ្នាំ មុខរបរជាងដែក មានស្រុកកំណើតនៅឃុំព្រែកអំបិល ស្រុកស្អាង ខេត្តកណ្តាល (អ្នកជិះពីក្រោយរ៉ឺម៉ក)។ ប្រជាពលរដ្ឋដែលឃើញហេតុការណ៍ប្រាប់ឲ្យដឹងថា មុនពេលកើតមានករណីគ្រោះថ្នាក់ចរាចរណ៍ គឺជនរងគ្រោះទាំង២នាក់បានបើករ៉ឺម៉កដឹកដែកមួយគ្រឿងធ្វើដំណើរតាមបណ្ដោយផ្លូវបេតុងព្រៃស ក្នុងទិសដៅពីលិចទៅកើត លុះមកដល់ផ្លូវកែងបត់ចូលវត្តឫស្សីសាញ់ ស្រាប់តែមានរថយន្តហ៊ីយិនដាយមួយគ្រឿង ពណ៌ស ពាក់ស្លាកលេខ ភ្នំពេញ 3B-1111 បើកចេញពីកន្លែងចាក់ដីខាងជើងវត្តឫស្សីសាញ់ ដោយបានបើកបរក្នុងល្បឿនយ៉ាងលឿន ហើយបានជ្រុលបុករ៉ឺម៉កដឹកដែកពេញទំហឹង បណ្ដាលយុវជន២នាក់ដែលកំពុងរួមដំណើរលើរ៉ឺម៉កខ្ទាតចេញ និងធ្លាក់ពីរ៉ឺម៉ក ត្រូវរថយន្តកិនម្នាក់បាក់ជើង និងម្នាក់បែកក្បាល ស្ថិតក្នុងសភាពធ្ងន់ធ្ងរ ហើយត្រូវបានរថយន្តសាមុយរបស់មន្ទីរពេទ្យបង្អែកដង្កោដឹកបញ្ជូនយកទៅសង្គ្រោះភ្លាមៗនៅមន្ទីរពេទ្យ។ ចំណែករ៉ឺម៉កវិញ ត្រូវរថយន្តដឹកដីនោះកិនពីលើខ្ទេច រងការខូចខាតទាំងស្រុង ហើយហេតុការណ៍នេះបានធ្វើឲ្យមានការភ្ញាក់ផ្អើលដល់សមត្ថកិច្ចចុះពិនិត្យជាក់ស្ដែងដល់កន្លែងកើតហេតុផងដែរ។
សមត្ថកិច្ចបញ្ជាក់ថា ក្រោយពីកើតហេតុរថយន្តបង្ក និងរ៉ឺម៉កម៉ូតូដឹកដែករបស់ជនរងគ្រោះ ត្រូវបាននគរបាលចរាចរណ៍វាស់វែងអូសយកទៅរក្សាទុកបណ្ដោះអាសន្ននៅអធិការដ្ឋាននគរបាលខណ្ឌដង្កោដើម្បីរង់ចាំដោះស្រាយតាមច្បាប់៕
ករណីរថយន្តដឹកដីបើកបុករ៉ឺម៉កម៉ូតូដឹកដែកនៅខណ្ឌដង្កោ គ្រួសារជនរងគ្រោះទាមទារសំណង៦.០០០ដុល្លារ
0 Comments