កំពង់ឆ្នាំង ៖ មុខរបរកត់កន្ទុយលេខ និងការចាក់ប្រដាល់ គឺជាល្បែងស៊ីសងនៅក្នុងក្រុងកំពង់ឆ្នាំងកំពុងរីករាលដាលគួរឲ្យកត់សំគាល់ ដែលបង្កឲ្យមានចោរកម្មនិងអំពើហិង្សានៅក្នុងគ្រួសារកើតមានឡើង។
ដើម្បីទប់ស្កាត់និងលុបបំបាត់ករណីនេះ នៅព្រឹកថ្ងៃទី២៨ ខែតុលា ឆ្នាំ២០១៥ លោកអភិបាលក្រុងកំពង់ឆ្នាំង និងសមត្ថកិច្ចពាក់ព័ន្ធ បានកោះហៅ អ្នកកត់កន្ទុយលេខ និងម្ចាស់ហាងកាហ្វេពាក់ព័ន្ធ មកប្រជុំផ្សព្វផ្សាយវិធានការរបស់គណៈបញ្ជាការឯកភាពខេត្ត គឺត្រូវបញ្ឈប់មុខរបរនេះនឹងត្រូវផ្លាស់ប្តូរប្រកបមុខរបរថ្មីវិញ។
លោក ហៃ មនោរម្យ អភិបាលក្រុងកំពង់ឆ្នាំង និងជាគណៈបញ្ជាការឯកភាពរដ្ឋបាលក្រុងកំពង់ឆ្នាំង បានលើកឡើងនៅក្នុងកម្មវិធីប្រជុំខាងលើនេះថា យោងតាមការណែនាំរបស់លោកអភិបាលខេត្ត និងជាគណៈបញ្ជាការឯកភាពខេត្ត បានដាក់វិធានការ៣ចំណុចក្នុងការលុបបំបាត់ល្បែងស៊ីសងនេះគឺ ១.កោះហៅអ្នកពាក់ព័ន្ធទាំងអស់មកប្រជុំផ្សព្វផ្សា យអំពីទិដ្ឋភាពច្បាប់ ហើយកំណត់ឱសានវាទរយៈពេលមួយខែ ត្រូវតែលុបបំបាត់ល្បែងស៊ីសងទាំងអស់ ដោយឲ្យអ្នកធ្លាប់លេងល្បែងស៊ីសង ត្រូវផ្លាស់ប្តូរប្រកបមុខរបរផ្សេងវិញ។ ២.បើអ្នកពាក់ព័ន្ធទាំងអស់នោះមិនព្រមបញ្ឈប់ ត្រូវកោះហៅមកធ្វើកិច្ចសន្យាបញ្ឈប់ការលេងល្បែងស៊ីសង តាមច្បាប់រដ្ឋបាលឲ្យបានច្បាស់លាស់និងម៉ឺងម៉ាត់ ជាមួយសមត្ថកិច្ច។ ៣.ករណីមិនរាងចាលត្រូវធ្វើការបង្ក្រាបចាប់ខ្លួន កសាងសំណុំរឿងតាមនីតិវិធី បញ្ជូនជនល្មើសទៅកាន់តុលាការខេត្ត ធ្វើការផ្តន្ទាទោសតាមបញ្ញត្តិច្បាប់។
លោកអភិបាលក្រុងកំពង់ឆ្នាំងបានបញ្ជាក់ថា ច្បាប់បង្ក្រាបល្បែងស៊ីសង មាត្រា៤៖
បានចែងថា អ្នកលែងល្បែងស៊ីសង ត្រូវពិន័យប្រាក់ ពី១ម៉ឺនរៀល ទៅ៥ម៉ឺនរៀលនិងត្រូវផ្តន្ទាទោសដាក់ពន្ធនាគារពី១សប្តាហ៍ ទៅ១ខែ។ ករណីមិនរាងចាល ត្រូវពិន័យប្រាក់ពី៥ម៉ឺនរៀល ទៅ៥លានរៀល។ មាត្រា៥៖ អ្នកបើកល្បែងស៊ីសង ត្រូវពិន័យប្រាក់ពី៥លានរៀល ទៅ២០លានរៀល និងត្រូវផ្តន្ទាទោសពី១ឆ្នាំ ទៅ៥ឆ្នាំ។
សមត្ថកិច្ចបានឲ្យដឹងថា នៅក្នុងក្រុងកំពង់ឆ្នាំងសព្វថ្ងៃនេះ ហាងកាហ្វេដែលមាន
អ្នកទៅមើលទូរទស្សន៍ចាក់ប្រដាល់មានតែហាងនៅក្រោយប៉ុស្តិ៍នគរបាលប្អេរមួយទេ ដោយឡែកអ្នកកត់កន្ទុយលេខតាមផ្ទះ និងនៅក្នុងផ្សារលើផ្សារក្រោមមានច្រើន ដែលនៅក្នុងនោះអ្នកមួយចំនួន គឺជាប្រពន្ធមន្ត្រីនគរបាល យោធា និងប៉េអិមផងដែរ ដែលរឿងនេះមន្ត្រីមានការពាក់ព័ន្ធត្រូវតែយល់ដឹង និងគួរតែធ្វើជាគំរូបញ្ឈប់ការប្រកបមុខរបរនេះឲ្យបានមុនគេ។
ចំណែកអ្នកលែងល្បែងស៊ីសងចំនួន៨នាក់ ដែលមិនបានមកចូលរួមប្រជុំតាមការអញ្ជើញ គឺសមត្ថកិច្ចត្រូវកោះហៅមកព្រមានជាលើកទី២ទៀត នឹងត្រូវឲ្យធ្វើកិច្ចសន្យាបញ្ឈប់ការលេងល្បែងតែម្តង៕
កោះហៅអ្នកពាក់ព័ន្ធលេងល្បែងស៊ីសងចាក់កន្ទុយលេខនិងចាក់ប្រដាល់មកប្រជុំបញ្ឈប់ការលេងល្បែងស៊ីសង
0 Comments